9-24(sat) 懷舊之夜-湯鎮業

尋晚終於睇o左“再睇星期五”之“懷舊之夜-湯鎮業”…呢個名稱係吳君如改o既, 我又覺得幾o岩喎…畢竟佢o地兩個相識廿幾年, 而八十年代o既當紅藝人, 對依家o黎講又的確可以話係“懷舊”…亦都係因為懷八十年代的舊, 所以正是我杯茶!

呢集又係好好睇呀, 全集充滿笑位…睇o左咁多次“再睇星期五”, 發現吳君如真係有d料到…起碼引到我呢d咁“冷漠”o既人笑! 同埋好欣賞佢o既大癲大肺, 爽朗 & 豁達…亦都好佩服佢當年同湯鎮業搞到咁 (我係指被人話佢係第三者介入湯鎮業同翁美玲, 間接導致翁美玲自殺…其實我相信當年吳君如同湯鎮業真係無o野, 頂多只係大家都爛玩o者!), 依家又可以完全無o野咁搵佢上o黎訪問, 仲大講當年好friend, 差不多日日都會相約苗僑偉同戚美珍去游水 (亦都confirm o左“翁美玲之死”o個篇講到到“?排遣朋友的鬱悶，苗僑偉邀湯鎮業到淺水灣游泳，同行的還有戚美珍和另一“無線”藝員吳君如。”o既真確性)…不過咁又係o既, 都過錯咁多年…所有o野都已成過去啦!

吳君如話o係呢廿年o黎大家經歷o左咁多, 尤其湯鎮業o既遭遇…依家咁樣再見番令佢好唏噓! 湯鎮業當年係迷倒萬千少女o既當家小生, 依家雖然由幾個月前o既大肥佬變到fit番少少, 但都同其他幾虎差好遠…可能正如吳君如所講, 佢缺乏o左一股衝勁, 一份野心…對所有o野都懶懶閒…唔似得劉華咁永不言倦, 到四十幾歲都要keep到自己最靚仔! 吳君如話:“華仔咁姿整, 點解你可以由得你自己咁?” 但湯鎮業個人就咩都無所謂…由始至終性格都懶懶閒…話拍戲要7點起身好辛苦, 所以都費事好似苗僑偉咁復出…哎, 死啦! 佢呢種態度好鬼死似我…唔好話我聽我廿年後會變成佢咁…真係唔好咁嚇我! 啋啋啋啋啋!!!! 幫我一齊touch wood呀!



佢o地仲有講好多關於五虎o既o野…吳君如話點解永遠d聚會只係得四虎, 係咪佢o地同梁朝偉唔o岩? 哈哈…佢當然話唔係, 只係話偉仔圈子窄d, 叫親佢都唔出o黎…即使劉嘉玲成日出去蒲, 佢都係自己一個o係屋企買飯盒食…根據湯鎮業同吳君如o既形容, 其實偉仔真係幾孤癖o個隻喎!

佢o地又話原來當年好多人入訓練班都係因為黃日華…好似劉嘉玲咁…! 吳君如都話當年係黃日華幫手招考佢o地, 而當時黃日華已經好有名; 去考訓練班可以見到大明星…好高興咁話! 連劉華都話當年去考訓練班時見到黃日華o係度派form…心諗連派form個師兄都咁靚仔, 搞到佢好怯! 原來我之前睇d報導話當年d花旦最鍾意o既男明星係黃日華果然所言非虛…好明顯當年佢係五虎之中最受歡迎o個個! 但係依家o既佢, 成就同劉華或者偉仔差好遠…可能又係好似佢o地講, 黃日華太無野心, 太安份守己喇!



最搞笑係吳君如問森美:“其實你識唔識湯鎮業o架?”…唔係呀嘩?! 五虎畢竟都經典過, 亦係八十年代o既icon…佢咁經典, 森美點會唔識呀? 森美話晒都大過我o地一個round 呀, 五虎正正係佢少年時代最紅o既偶像…迷倒萬千少男少女o架嘛!

仲有, 佢o地解開o左最大o既疑團, 原來做“前世冤家”o個個湯鎮宗係佢大佬…因為d人成日都分唔清邊個係呀哥, 邊個係細佬…就好似吳啟華同吳啟明咁! 當年覺得湯鎮宗樣衰過湯鎮業好多…但都o左依家, 又唔係差好遠喇!

呢個訪問都真係幾有趣, 都係尋日o個句: 所有五虎fans同埋者八十年代fans都不容錯過…錯過o左可以睇番重播, 事關有線最大特色係重播完又再重播嘛!