10-20(thurs) 草蜢-我們的演唱會(上)

各位朋友: 無錯, 我已經返o左o黎喇…大家唔洗再周圍打聽我幾時返o黎!

今次歐洲“我本善良”+“日落巴黎”之旅比我想像中好玩…好悠遊, 好抵死…有d樂而忘返, 樂不思蜀, 樂此不疲 (????)…總之玩到差d唔想返o黎! 但凡事“見好就收”係我兩年前o係倫敦一年所晤出o既最大道理…所以好彩今次一早set好o左要返o黎睇草蜢演唱會, 令兩個禮拜o既短暫歐洲之旅得以見好就收…關於呢次旅程o既日記又要待遲d先寫…因為我一定要講o下o岩o岩睇完o既草蜢-“我們的演唱會”!

事先聲明, 我一向o既評論都以“尖酸刻薄”見稱, 各位fans如果唔覺意睇到, 可以o係呢個位離開…費事到時某d明星網站又有fans轉貼o左我o既演唱會評論然後d“die hard fans”又話我言論太尖酸刻薄, 挑剔佢o地偶像! 我就唔會為其他人點睇而改變我o既寫作style, 唔係你杯茶請移玉步! 好! 事先俾o左warning, 可以開始講喇…不過講真, 今次演唱會真係200個精彩, 都無咩o野要挑剔!

記得對上一次俾最高分o既演唱會, 應該係2004年“郭富城演唱會”, 我話要俾95分佢, 因為無o野係完美o既 (但如果佢唔講o野, 我會俾足100分)…但係今次草蜢呢個演唱會, 挑剔如我都真係要俾夠105分…有5分我私人醒o既…因為真係好好好好好正!!!!!!!!!!!!!!!!!

從來都唔係草蜢o既fans…從前唔係, 依家都唔係, 一路都未試過係…但以一個非fans o既立場o黎睇, 我都可以俾足105分佢o地…可知精彩程度有幾咁高! 我直頭敢話呢個演唱會係我呢8年來 (自從year1“濫睇”演唱會年代開始) 睇過差不多100個演唱會之中, 最精彩o既一個 (唔係第一都係第二)!

平時每次睇完演唱會有人問我好唔好睇…而我通常都會話:“ok la”! d人話以我d咁挑剔o既人o黎講, “ok”其實已經係唔錯咁話…但今次我居然話“都幾好”, 好明顯草蜢呢次演唱會真係有二萬個精彩…不枉我特登飛返o黎睇! (其實只係天時地利人和配合?!)



http://www.grasshopperhk.com/

今次係我第一次睇草蜢o既演唱會, 十年前o個次我仲未開始我o既“狂睇演唱會旅程”(其實依家已經幾乎結束o左呢個“旅程”, 因為已經無o左以前對睇演唱會o既熱忱), 再之前就更加無人會帶我去睇呢d演唱會 (除o左歌神演唱會囉…), 我亦唔多好呢種活動! 根據我之前講過o既“第一次永遠是最好睇”o既定律…每個歌星o既第一次演唱會, 永遠都係最好睇o既, 因為通常都要儲好耐歌同埋儲好多觀眾緣先可以開到第一次演唱會; 而你第一次睇o既某歌星演唱會 (即使唔係o個個歌星o既第一次), 亦都會比之後幾次好睇, 因為有新鮮感…同埋之後都係萬變不離其中! 所以, 我今次會覺得呢個“我們的演唱會”咁好睇! 好期待咁去, 居然無失望而會…我覺得好感動囉!

佢o地仲要食正呢期o既懷舊風, 尤其係懷八十年代的舊…完全係my cup of tea!

唱o既歌全部都係我o地呢個年紀o既人最耳熟能詳o既歌, 陪住我們成長o既歌…無論係唔係草蜢o既歌迷, 相信點都有聽過十首八首…而對於我呢d電視精, 頒獎禮精, 就更加無一隻唔識 (誇o左少少, 其實都有3幾隻唔多識o既)! 而到o左我o地“呢把年紀”, 又最愛懷舊 (我就係懷得比人早o左d, 十多年前已經學人懷舊, 所以咁喜歡唔多屬於我o既八十年代初至中o既事物), 亦可以話最“有能力”(指經濟基礎)懷舊…過去o既o野, 永遠都係最美好o既; 成長o既片段, 亦最值得回味…而“草蜢”, 絕對係我o地成長o既八十年代尾至九十年代初, 樂壇一個好重要o既icon! 當年最紅o既組合係邊隊? 一定係草蜢!

你可能話係beyond…我就會話佢o地係平分春色囉! 因為兩group人其實唔同性質, 亦唔同market…一隊係跳舞組合, 一隊係樂隊…好似拿個橙同個蘋果比咁! 不過坦白講, 當年我絕對係支持beyond多d, 亦鍾意beyond d歌多好多…同好多人一樣, 我都會覺得草蜢年年壓住beyond拿叱吒組合金獎係“離晒大譜”! 覺得佢o地呢d“偶像派”, 點及“實力派”呀?! 但其實邊個係“偶像派”, 邊個係“實力派”…都好難去分界…歌仔都有得你唱…“難為正邪定分界”嘛! 只怪當年o既我太膚淺!

你話草蜢無實力咩? 我諗真係唔係囉…除o左跳舞勁之外, 佢o地其實都ok唱得o架喎…後期仲轉型做“唱作人”, d作品仲幾有水準添…難道你又敢話beyond唔係偶像?! 我有時覺得佢o地比任何歌手更“偶像”! 一講開八十年代樂壇, beyond o既地位彷彿比草蜢高好多…有d將佢o地“神化”o左! 某程度上, 可能因為家駒o既“英年早逝”…當年o既所有年青人 (包括我), 無不感到無比震撼…繼而對beyond產生比本來更特別o既“感情”(情況可能同翁美玲事件有點相似)!

今次草蜢呢個演唱會, 彷彿將我帶返最美好o既黃金年代…真係應該高歌一曲: “你是八十年代”呀! 個演唱會有幾精彩…聽日再講, 大家有興趣, 可以去睇o下呢個我o係網上搵到最完整, 資料最齊全o既草蜢網頁…有好多舊相片, 佢o地o既資料, 以前演唱會d花絮, 歌詞…應有盡有! 唔係睇番d資料, 都唔記得佢o地曾經係叱吒組合金獎六年霸…確係威o架?! Twins都未必有咁o既氣勢!

(待續)