12-1(thurs) 刑偵2結局之"我真係唔記得..."

原來話咁快就12月, 原來話咁快“刑偵2”已經大結局o左…呢幾集o既case好無聊, 而呢兩集就當然係keep住“我真係咩都唔記得”啦! 不過追o左咁耐o既“刑偵2”又再一次做完, 都有d失落感…記得當年播大結局o個晚, 我直頭想唔去補a.maths留o係屋企睇, 但諗諗o下都係錄起佢留番深夜自己一個睇好d…起碼唔洗俾人騷擾! 當年直頭“失落”到唔肯睇接住“刑偵2”播o既“天地男兒”…因為覺得佢“唔配”接住“刑偵2”播…實在太癲喇! 就係咁就錯過o左另一套其實都好好睇o既戲頭廿集…好彩佢都有成60集, 同埋好彩呢套戲o係幾年前都重播番!

好鍾意尋晚車匙醒番但咩都唔記得o既時候, 張大勇好嬲咁話:“點解你咩都唔記得o既o者?”唔知點解我覺得好好笑…仲笑o左出o黎！可能因為佢講出o左大家o既心聲! 太天意弄人喇…仲要無啦啦走去移民添…你係唔係路呀? 真係睇得人好激氣, 好無奈, 好唔甘心…好想一直睇埋落去睇到佢記得番為止…哎! 咁係咪要追埋第三輯?! 但係我自己先前已私人開倉睇o左少少第三輯…確係非常沉悶, 非常唔好睇…尤其係d人物性格有d人面全非…大勇同車匙真係變得好客氣咁!

o係醫院探病仲有一句對白係好啜核o既, 就係黃醫生最鍾意o既葉振聲話:“得唔得o架?! 資料就話可以輸入o者, 咁感情呢?”好抵死…大家即刻無o野講!

哎! 結尾主要係聽佢一日o係度“我唔記得喇”…“算啦, 感覺o既o野走o左係搵唔番”等…點解“刑偵2”要整個咁o既結局仲播曬全首“愛的輓歌”做ending呀? 我覺得好有“欺騙”o左所有追o左40集o既觀眾o既感覺! 好好醜醜你都俾個實在少少o既結局大家呀…唔好咁玩啦! 當年睇完個結局個心la住la住, 更有d被搵笨o既感覺…第一次覺得open ending係最廢o既ending! 簡直想講粗口! 睇o左40集得個桔…咁o既ending邊個寫o架?


(如果你係記得我o既, 你返轉頭啦…跟住車匙真係拎番轉頭…咁即係點呀? 玩咩?!)

呢期差館d夥記仲加入o左張松枝…好令人諗起當年英倫o既“旺記張松枝”! 原來呢個單元仲有何婉盈出o左兩下添…我完全唔記得佢到咁後期仲o係無線做緊喎?! 跟住又有埋佢個男友魏駿傑…佢兩個當時係咪仲係一齊呢?!

仲有, 點解做張大勇個妹張小柔o既黃悅, 又係拍o左一套劇就唔見o左呢? 佢都幾有趣呀…雖然有d九唔搭八, 但最九唔搭八係佢好似仲同霑叔一齊主持過唔知“江山如此多fun”定係“聯中傳奇”…可能就係貪佢鬼鬼o地講唔正廣東話呢個尷尬身份啦! 唔知佢依家去o左邊呢?!

最頂癮係有詹秉熙…佢呢廿年o黎都係唔知幾時出返o黎, 又唔知幾時消失o左…呢個cycle o係廿年o黎keep住發生! 最騎呢o既係佢居然係當年夥拍張曼玉做 “劃出彩虹”o既男主角…但更騎呢o既係點解佢拍完呢套劇就無o左呢? 無線cast得佢做男主角, 一定覺得佢係得o架…點解呢套劇之後又忽然唔力捧佢呢? 睇到佢同拍檔張曼玉o係星途上o既重大差別…我都唔知佢當年拍o左套咁出名o既戲…係佢o既幸運定係不幸呢?!



唔知點解見到佢, 令我諗起我o既“ex-偶像”朱健鈞…兩個都有“豬豬地”o既樣, 又係被捧o左做一劇男主角跟住又係跌番落o黎, 然後繼續斷斷續續o係呢個圈見到佢o地做d 4線o既角色…好坎坷!

噢! Sammi! 你o係呢套戲o既表現實在令我太唔知講咩好…個look未免太浮誇喇, 我真係以為你拍緊mv…睇番“愛的輓歌”o既mv, 原來真係齋剪番“刑偵2”d片段…好慳水慳力! 連鄭秀文o係mv咪咀唱歌時個look, 都係同戲?面個ivy一樣, 黑曬衫再加副超! 原來唔止四哥拍床戲要戴超, sammi o係套戲都日光日白成日戴住副超…我諗可能四哥係佢偶像! 同埋o個o下暈真係令我好想笑…呢d咩劇情o黎o架?!

最經典o個part當然係“tiu 鏈”啦…我依家成日學佢o係度講:“你買tiu鏈俾我, 我又買番tiu鏈俾你…”獎門人叫我唔好太癲! 尋日又有一句好勁:“Jessie, 你仲話件婚紗好靚tim!”oh…tim tim tim tim tim…以前佢真係無咁誇o架, 即使依家都無咁誇…究竟96年o既佢, 受o左咩刺激呀?!“菊花tea”同“聖誕bell”係咪都係o係呢個年代發生o架?! 我記得佢仲有一力作係接受類似cnn訪問爆o左句“dog dog team”出o黎, 因為佢唔識狗仔隊o既英文=paparazzi!!! 我覺得幾有創意幾cutie喎!

同埋我覺得要佢同“賤男”做一對真係好可憐…sorry呀, sammi!