8-30(tues) 巧遇廖碧兒

原來不知不覺間, “妙手仁心3”已經做到第27集…其實由佢開始播時, 已經話要討論o下, 但到依家都仲未寫完…希望唔洗等到佢播完先post到出o黎!

雖然篇o野未出到, 但我一路都有同d朋友discuss o下“妙手”…最搞笑係尋日咁o岩同一位讀者朋友講開廖碧兒, 我話我幾buy佢, 尤其係佢o既燦爛笑容…幾討好…! 點知, 一寫完封email落街食lunch, 就o係landmark撞到廖碧兒…真係好靚女喎 (其實objectively並唔係十分出眾…意思係平時o係街撞到d藝人, 通常都會“真人靚過上鏡”…好似o係landmark撞過幾次o既江欣燕+江欣慈<江希文>兩姊妹…但係廖碧兒就無咩大分別…不過依然討好…至少我鍾意!)

唔知點解我見到佢之後異常高興…真係唔知自己幾時變o左廖碧兒fans?! 反而同行o既同事們, 有一半都話見佢唔到…真係o徙料! 我以為d“o靚仔”見到呢“ting”靚女明星應該比我更興奮o架嘛…

點知佢o地話:“係咩? 見唔到喎! 咁即係都唔係非常靚啦! 如果唔係點會無留意到?! 但就算係…你都唔洗咁興奮呀?”
我:“係呀, 好興奮o架…o岩o岩同人講起佢, 一落街就撞到佢, 你唔興奮咩? 你唔覺得好靚咩?”
佢o地: “咁你依家洗唔洗走返轉頭攬住佢合照一張呀?!”

哎…原來我係最興奮o個個…點解會咁o架?! 我以為d男仔應該比起女仔更buy佢…陽光笑容+天使面孔+魔鬼身材喎…夫復何求?!

真係激死人…無理由大家見到廖碧兒會反應咁冷淡o架?! 唔通我真係高估o左佢o既受歡迎程度?! 但我真係幾興奮喎…要明白, o係街撞到同特登去睇show係兩回事, 感覺亦有所不同!



跟住返到公司同無去到食飯o既同事講話我o地頭先見到廖碧兒, 你今次走寶喇…佢話: “啊! Ok啦! 我覺得佢對眼做o左laser之後好似無晒光彩!”
我: “係咩? 佢做o左laser咩?”
佢: “係呀, 佢原本好深近視o架!”
我: “但做o左laser對眼會無晒光彩o架咩?!”
佢: “梗係啦…天然o既眼睛係會精靈d, 有光彩d…做o左laser眼神會呆滯d o架…你無留意到咩?”
我: “真係無喎?! 我以為淨係話做o左laser之後如果有青光眼就無得醫…但唔知會無晒光彩喎…不過係咁o架啦, 所有o野都係有利必有弊!”

真係又上o左寶貴o既一課 (雖然內容未經證實)…簡直係現實版o既”妙手仁心”!

經佢講完之後, 我尋晚睇 “妙手”見到廖碧兒, 總係覺得佢對眼無以前咁精靈…又或者係事後孔明啦…真係唔知…! 請各位醫生朋友賜教! (唔係醫生o既朋友當然都歡迎賜教啦, 唔係一陣間又話我歧視非醫生朋友呀!)