8-17(wed) 再睇星期五

上個禮拜o既“再睇星期五”, 我真係要勁勁勁推介呀! 禮拜四睇預告已經好期待…事關o個集個嘉賓係林海峰, 佢係我其中一個好欣賞o既dj/節目主持…有佢o既節目一定笑死! 以好嚴肅o既方式去笑死你…我真係要學o下佢!

嘩, 呢集真係好好睇, 係咁多集“再睇星期五”中最好笑o個集…呀jan果然有一手! 佢把聲好好聽, 講o野好抵死, 好有腦, 好絕, 好型, 好欣賞佢…亦好懷念軟硬! 但唔明點解佢會揀彭bell囉, 仲要當年係佢極度迷戀彭bell o個隻…完全唔明! 佢咁有條件, 咁有才華, 彭羚就真係除o左唱高音唱得好之外, 既無才華, 亦無樣貌 (尤其係“愛過痛過亦願等”o個期個look…好得人驚! 個嘴畫到又大又紅, 同米老鼠個friend唐老鴨有得揮! 雖則隻歌係幾好聽…之後話佢整完, 但個樣仍然係咁)…客觀講真係一d都唔襯…不過無得講o既, 鍾意就係鍾意, 可能佢o地“一nup一dug” (我真係唔識打)係好鬼o岩呢!

森美仲搞笑, 真係全個節目幾乎無出過聲咁, 好似真係好驚呀jan! 吳君如話成個商台o既人其實都好驚呀jan, 佢成日都好似黑面神咁…話d新dj以“呀jan肯同我傾偈”為榮! 佢話呀jan直頭係商台o既“精神領袖”...帶領住全台dj, 同埋年年叱吒都係由林海峰去決定個大概念同埋所要sell o既“精神”!

吳君如講得最o岩o既係: “商台好講精神, 講價值觀”…我有500個認同呀…正如我每年 “叱吒頒獎禮”o既觀後感, 都係話佢地不斷“吹眠d聽眾同埋煽動d歌手o既情緒”…我直頭以為自己聽緊d保險公司培訓show去幫人洗腦! 最?膽係我年少時一度認為“叱吒”係咁多個頒獎禮最公平公正公開o既一個…真係天真無邪, 容易比人呃! 俞琤…你係勁o既! 其實呢個世界, 又邊有公平o既頒獎禮o架?!

吳君如話, 林海峰個人實在太低調, 其實有d o野自己叻少少咪誇d o黎講囉, 唔洗客氣o架嘛…我覺得佢又係講得好好好o岩囉!

仲有, 林海峰佢o地3姊弟其實真係好似樣, 尤其d神態! 睇林海峰個樣又搵到林姍姍o既神態, 睇“東張西望”見到林曉峰, 又彷彿聽緊呀jan講o野!

今集真係好好睇…屋企諗住cut有線, 相信無得睇 “再睇星期五”會係最大o既損失! 哈!