12-16(fri) 世貿在香港

尋日o岩o岩先話應該去睇o下咁難得一見o既反世貿示威, 點知今日真係俾我陰差陽錯之下撞到班示威者…真係約埋都無咁橋!

本來都想去銅鑼灣睇o下遊行o既“盛況”, 但最終都無去到…夜晚o係金鐘諗住行去中環, 點知金鐘廊無啦啦封o左路, 就特登行落去樓下睇o下, 點知o係遠東金融中心出面, 真係見到一大批示威者…主要應該係d南韓女農民. 不過今次更平和, 只係見佢o地著晒聖誕老人衫o係度飲o下o野, 唱o下歌, 跳o下舞…仲有d遊客同佢o地影o下相!

機會難逢…我就緊係學人做o下記者, 逼埋去影o下相…o係金鐘都俾我遇到d咁“有趣”o既場面, 緊係唔可以放過! 後來佢o地飲完o野, 就開始大鑼大鼓一邊哎“Down WTO”一邊行入地鐵站, 好似話下一站sogo喎! 就係咁, 我影完相+video就散水喇!

呢期o既反世貿示威真係“精彩”…日日都捕住電視睇o下有咩新花樣! 愈睇愈覺得d示威者都幾醒, 其實應該係佢o地d領袖醒至o岩! 每日都好有部署好有策略…又表演o下“長今舞”, 展現o下民族意識, 行?o左又坐o下, 舒展o下筋骨…最impressed o既當然係尋日o既三步一跪拜啦…真係做得好好…咁先至觸動人心o架嘛! 即刻贏晒分!

其實再之前o個日o既搶盾牌事件都係一個good move, 首先做足準備, 以最便宜o既方法蓋住雙眼, 搶完盾牌再貼反wto貼紙, 之後又還番晒俾人, 再幫手清埋場添…真係好有手尾!

睇到一篇關於呢一日o既新聞…唔知點解, 我依然覺得好搞笑…

“世貿會議第二天，警方與反世貿的非政府組織示威人士埋身交鋒升級，昨日就有六次激烈衝突，韓國農民五度突擊警方，輕易搶走警方十七塊盾牌。不過，激烈的韓農在衝擊過後，還是和平地交還盾牌，一名韓農領袖稱：「香港警察很溫柔，我們蠻尊敬他們……其實警察也是挺可憐的！」

警方以盾牌陣及胡椒噴霧迎戰，雙方埋身推撞，先爆發了第一輪互探虛實的衝突，吸收了首天與港警交鋒的經驗，韓農示威者昨日顯然有備而來，負責衝擊警方的前面十幾名示威者都用了保鮮紙包臉，又有頭巾蒙面，免被胡椒噴霧射中。

韓農示威者在半小時內共進行了五次衝擊，先是起腳踢盾牌，然後趁機搶走盾牌，最後是派出一隊以背脊擋盾牌的勇士湧向警方，在警方用盾牌推前之際，另一批人便成功順勢把警方的盾牌搶到手，如是者五輪衝突，警方已失去十七塊盾牌，雖無警員受傷，但已令示威者聲威大振。

至於形象激烈的韓農，在示威衝突的勇狠令人大開眼界，而他們服從指揮的紀律性，以及示威完畢之後各人自行清理垃圾的專業表現，更令港人印象深刻。

韓農領袖徐延醫，昨日就與香港警方兩日衝突後談論對香港警察的印象時，竟然以溫柔來形容香港警察，他說：「香港人可能奇怪示威者與警方的關係為何『時敵時友』，事實上，在韓國這情況很平常，示威者更會與警察在衝突過後互遞香煙。他認為香港警察很有克制和忍耐能力，其包容示威者的態度很值得尊敬，徐延醫總結多年示威經驗，突然也吐出一句真性情的話：「警察其實也挺可憐的！」”

真係好搞笑…又“互探虛實”又”時敵時友”, 衝突完仲握晒手…真係好好笑! 同埋真係好似打仗咁…有晒部署有晒策略…學到好多o野, 孫子兵法都無咁精彩! 除o左“大開眼界”…我都諗唔到第二個形容詞!

香港平時d遊行都係齋行, 今次南韓人示範o左點先可以令呢個咁沉悶o既活動entertaining d…我諗除o左我之外, 所有香港人都大開眼界!

頭先去食o野時隔離又o係度講呢件事, 佢o地話雖然今次香港舉辦世貿會議係勞民傷財(我好同意), 但都有好o既一方面…就係對香港人一次好好o既教育(我更同意)…大家親身體驗過, 先知道係咩一回事, 亦都會更透徹了解其他人o既苦況!