2007年5月19日星期六

5-19(sat) 芒姐@蘋果 (5月號之三) + 溏心風暴

電 視 撈 飯 (2007-05-18)
http://appledaily.atnext.com/template/apple/art_main.cfm?iss_id=20070518&sec_id=462&subsec_id=830&art_id=7114100

陳 豪 脫 胎 換 骨

《 溏 心 風 暴 》 踏 入 倒 數 階 段 , 大 契 、 大 鮑 相 繼 過 身 , 唐 家 的 爭 產 好 戲 正 式 登 場 。 猶 記 得 第 一 集 頭 五 分 鐘 得 得 地 拿 著 鮑 魚 去 找 細 契 , 望 與 她 庭 外 和 解 , 被 大 罵 野 種 的 一 幕 , 相 信 會 是 往 後 爭 產 戲 份 的 重 頭 戲 。 但 我 最 想 知 道 的 , 是 為 何 常 常 聳 頭 聳 肩 、 真 的 活 像 「 低 低 o地 」 的 得 得 o地, 能 在 末 段 爭 產 戲 份 搖 身 一 變 , 成 為 淡 淡 定 定 的 話 事 人 , 以 唐 家 長 子 身 份 走 出 來 與 細 契 談 判 , 箇 中 的 蛻 變 實 在 耐 人 尋 味 !

《 溏 》 劇 那 種 久 違 了 的 倒 敍 拍 攝 手 法 , 真 的 很 有 90 年 代 經 典 長 劇 《 大 家 族 》 或 《 巨 人 》 的 影 子 ; 留 心 一 看 , 原 來 此 劇 的 監 製 正 是 當 年 台 慶 劇 的 御 用 監 製 劉 家 豪 , 難 怪 劇 集 有 種 似 曾 相 識 的 感 覺 , 唯 獨 欠 缺 了 當 年 台 慶 劇 御 用 男 主 角 萬 梓 良 。 不 得 不 讚 一 讚 陳 豪 的 演 技 , 他 這 次 脫 胎 換 骨 的 演 出 , 雖 然 真 的 浮 誇 了 點 , 但 成 功 令 人 忘 記 了 他 一 貫 的 型 男 形 象 , 加 上 他 在 劇 中 的 老 套 造 型 、 傻 呼 呼 的 說 話 語 氣 及 表 情 , 演 活 了 天 真 又 癡 情 的 得 得 o地。 還 有 他 那 個 「 你 阿 媽 搵 你 , 你 阿 爸 搵 你 … … 」 的 手 機 鈴 聲 , 配 合 得 得 o地 的 人 物 性 格 簡 直 相 得 益 彰 ; 難 怪 此 鬼 馬 鈴 聲 與 細 契 主 唱 的 主 題 曲 《 講 不 出 聲 》 均 成 為 近 期 城 中 最 熱 之 選 。

監 製 還 特 意 找 來 另 一 位 人 氣 小 生 林 峰 客 串 演 出 得 得 o地 的 情 敵 一 角 , 陳 豪 的傻 頭 傻 腦 與 林 峰 的 文 質 彬 彬 形 成 強 烈 對 比 ; 一 向 演 慣 正 氣 陽 光 男 孩 的 林 峰, 這 次 突 破 演 出 一 腳 踏 兩 船 的 花 弗 靚 仔 律 師 , 最 後 還 要 死 於 非 命 。 當 然 , 女 fans 最 妒 忌 的 是 獲 兩 男 力 爭 的 常 在 心 。 雖 然 此 劇 的 焦 點 落 在 一 眾 老 戲 骨 身 上 , 但 在 年 輕 一 輩 中 , 可 說 是 群 星 拱 照 鍾 嘉 欣 !



解 謎 似 亞 視

至 於 無 綫 原 本 於 10:30 檔 播 映 的 內 地 劇 《 一 生 為 奴 》 , 播 了 數 周 後 突 然 被 腰 斬 , 改 播 由 大 俠 鄭 少 秋 夥 拍 「 正 字 王 」 王 貽 興 主 持 的 資 訊 節 目 《 謎 》 。 看 了 數 集 這 個 臨 危 受 命 的 節 目 , 暫 時 不 覺 得 太 吸 引 , 這 種 主 力 解 構 世 上 不 解 之 謎 的 外 購 紀 錄 片 , 不 知 為 何 感 覺 很 「 亞 視 」 ? 相 比 起 亞 視 同 時 段 播 映 的 《 第 一 手 真 相 》 , 後 者 某 些 片 段 比 前 者 還 要 吸 引 。 加 上 《 謎 》 節 目 本 身 的 整 體 感 覺 過 份 造 作 , 兩 位 男 主 持 的 造 型 及 口 頭 禪 不 在 話 下 , 還 要 安 排 應 屆 港 姐 季 軍 呂 慧 儀 充 當 花 瓶 , 以 「 謎 女 郎 」 身 份 在 節 目 中 穿 插 , 搔 首 弄 姿 遞 檔 案 , 但 卻 不 見 得 為 節 目 增 添 了 可 觀 性 。

撰 文 : 芒 姐


**************************************************************


嘩…真係好勁! 估唔到wikipedia都咁快手有晒“溏心風暴”d資料…仲要好齊全添:
http://zh.wikipedia.org/wiki/%E6%BA%8F%E5%BF%83%E9%A2%A8%E6%9A%B4


溏心d金句, 又確係hit…呢期去到邊度都有日講, 仲要係用於每個場合都好似幾applicable! 連我公司個“叔叔輩”同事, o係我呻緊話要上o左一整日好悶o既堂, 佢居然回個sms俾我話: "甜的吃, 苦的也吃"…真係笑爆嘴, 亦都證明真係幾乎人人都有睇呢套劇! 不過其實收視又唔係真係好高…平均都係33, 34點…阿旺都40幾點啦…!

溏心金句…又係幾得o既!

我鍾意呢幾句:

1) 甜的吃, 苦的也吃!

2) 呢度唔係法庭, 唔需要證據, 我對眼就係證據!邊個係人, 邊個係鬼, 我睇得出!

3) 未登天子位, 先置殺人刀!

4) 哭有時, 笑有時, 歡樂有時, 悲傷有時.

5) 耳聽三分假, 眼看未為真.

6) 不賢妻, 不孝子, 頂趾鞋, 無法治!

阿大契死o個場, 完全睇到邊d人好戲, 邊d係唔多掂囉! 楊怡同夏雨都喊得好真…但係阿歡黎諾懿真係好唔掂…眼淚都無滴, 真係唔該練o下d演技先啦! 仲有細契俾大契趕出屋o個一場, 佢又係喊得超假…哎! 失禮死人! 仲有最難頂當然係佢d懶音, 亳無改進…好似有語障咁, 好難聽! 佢同唐詩詠做一pair真係襯晒…懶音男女…perfect! 無綫真係待佢不薄, 次次都俾個懶音女伴佢襯番…上次”東方之珠”o既陳敏之先超經典! 仲有阿黎生個名…真係難怪阿司棋姐都話難記…你話叫黎懿諾都o岩音d呀! 之前睇d訪問話佢真名好似叫黎日昇, 其實呢個名咪仲好, 起碼無咁“kiu口charm手”!

或者應該叫阿才子先生王貽興教o下佢點改善懶音囉…反正王才子成日自命發音準確! 不過講真, 我又真係唔覺得阿“正字王” d廣東話發音標準到可以做正音大使…佢只係講得好過某些時下o既年青藝人…教人改正懶音, 其實佢又真係未夠班…同埋佢把聲真係…! 仲有佢o係"謎"度真係好造作…依家o既佢, 已經完全無晒才子o個d所謂o既才氣! 同埋唔該真係唔好叫咩"adam鄭"同"貽興王"…呢d真係爛到唔爛…聽到都毛管棟呀…肉麻當有趣的典範!

仲有, 其實我個人認為常在心個角色都幾煩, 俾我寧願揀水擘擘…好少可個第三者會仲討好過個正印! 不過蒙嘉慧拍埋林峰度真係顯得好老…根本選角真係有d問題! 鍾嘉欣我係ok o既, 唔覺得太差, 亦唔覺得太好, 至少無楊思琦小姐咁反感, 但又真係唔覺得佢太靚喎 (雖然我身邊有好多朋友都幾buy佢)!

同埋唔知由幾時開始, 每集都要整個GIV投票, 但投埋D話題都係勁無聊…咩如果你係大鮑, 細契有o左你會唔會同佢結婚? 如果我係大鮑就梗係會啦…細契無話有o左佢都已經打算同佢結婚啦…咩問題o黎o架?!

25 Comments:

Anonymous 匿名 said...

烈火雄心II also use倒 敍 拍 攝 手 法

1:13 上午  
Anonymous 匿名 said...

also so many ppl don't like 蒙 嘉 慧
Source: http://singtao.com/yesterday/ent/0517fo01.html

1:18 上午  
Anonymous 匿名 said...

雖然我都覺得常在心有D煩, 但水擘擘連老友嘅男友都搞, 好過份姐, 況且, 佢可以拍咁多次拖, 又有咁多次做人第三者嘅經驗, 呢個女人梗有D問題嘅, 我就覺得蒙嘉慧個角色超乞人憎, 比細契更乞我憎!

雖然我都唔覺得鍾嘉欣特別靚, 不過佢都尚算順眼同上鏡(咁當然冇李嘉欣同林嘉欣咁省鏡啦), 同埋以一個冇受過演戲訓練嘅人來講, 我又真心覺得佢D戲已經算唔錯, 我有睇過佢響其他劇集嘅演出, 新人來講, 真係算係咁架喇, 同埋佢嘅態度真係幾好, 又低調又勤力, 真係幾唔錯架喇!

除左一班老戲骨, 我覺得楊怡D戲都好得, 個角色HANDLE得好好呀, 其實不嬲都覺得佢做戲好!

黎諾懿... 根本一開口就有鄉音, 有一幕講佢問陳法拉考ORAL考成點, 黎生竟然將ORAL讀到"柯佬", 冇野下嘛? "柯佬"! 唔明點解TVB經常安排佢做大學生或有錢仔, 佢橫睇掂睇都似一個大陸仔多D, D人仲話佢似DANNY添, 唔該唔好咁驚嚇啦!

王貽興先生真係幾可怕, 芒姐講得好, 佢把聲真係… 同埋佢o係"謎"度真係超造作, 本來睇秋官都勉強可以接受, 但一見王先生出現, 我就會熄電視! 仲有, 點解呂慧儀好似咁似吳麗珠咁嘅?

我好鍾意睇"溏心風暴", 好耐都未試過咁緊張追劇! 大鮑、大契固然好戲, 但我覺得其實細契D戲都唔差, 講開又講, 我最近先知道原來關菊瑛細過張國榮, "儂本多情"裡面, MISS TONG(菊姐個角色)仲話睇住JAMES(哥哥個角色)大, JAMES仲話由六歲開始已經響MISS TONG間大屋流連添...

其實我從來都唔覺得陳豪有邊忽吸引, 但今次睇到得得地對常在心咁好, 我都竟然有D鍾意佢添, 反而程亮好似不太討好, 又花心, 又不孝, 仲成日發脾氣添, 同"律政"阿BEN差好遠!

SORRY呀, 因為我太喜歡睇"溏心風暴"喇, 所以有好多野講, 搞到個留言鬼死咁長!

2:52 上午  
Anonymous 匿名 said...

比我做林峰都會偷食揀水擘擘
常在心作為一個女朋友黎講真係好唔得
小小野就發脾氣 又唔識體諒男友
但林峰又係衰三心兩意,爭唔落
水擘擘唔駛講 正一賤人加狐狸精
蒙嘉慧其實都幾慘 已經唔係話好紅
TVB仲要比個咁既角色佢
仲有你覺唔覺得佢好多懶音呀?

林峰雖然係客串 但佢都做得好好
初初真係覺得佢個角色係花瓶黎架咋
尤其是佢死左阿媽去搵常在心
同打輸官司發脾氣果兩場
佢D表情真係好得 
衰就衰在31集唔係現場收音
如果唔係就PERFECT

鐘嘉欣OK啦 唔叫做好好 亦都唔覺得佢好靚
佢的確有進步既 睇得出佢有努力過
但佢好多時講野同眼神都好唔自然
有D似楊思琦 不過鐘嘉欣當然好好多啦

我覺得BOSCO係呢套劇D戲真係失水準
完全無發揮
發嬲同平時講野分別只在於大細聲
之前佢賭場風雲都交到戲架
係呢套劇對住司琪姐果D真係見哂真章
仲有呀佢係唔係主角黎架
D戲好似仲少過林峰囉

之前都無咩點留意楊怡
依家發覺佢都幾得喎
可能佢以前既鄰家女孩路線規限哂佢既戲路啦
但TVB好似唔多捧佢 唉

1:23 下午  
Blogger Unknown said...

芒姐.....當初我同我o的屋企人睇到呢條問題時...同你既立場一模一樣...

"都跟左佢咁多年, 而家仲要有左, 咁都唔結緍!? 咩問題黎架!?"

點知....尋晚唔知你有冇睇個觀眾投票結果... 75%人反對結婚....只得25%人贊成....
睇到我成家O唒嘴....=_______=

3:12 下午  
Anonymous 匿名 said...

本來我對那位飾演「水mak mak」o既蒙小姐無乜話好感唔好感, 但自從一晚聽佢叫十次「al佛」(今晚仲要整個「day域」!)真係好難受!!!!!!!!!!

其實好心無線明知o的哥仔姐仔英文唔多掂, 就將o的人名改得簡單o的啦! 阿tom, peter咪算囉~ 又要懶型咁叫晒o的咩gilbert, alfred, david咁... 你話個個都好似鍾嘉欣咁就話o者, 再多幾個蒙小姐咁o既人, 隻耳仔真係好辛苦架!

10:52 下午  
Anonymous 匿名 said...

AMAZING~~
好認同你呀
蒙小姐中文多懶音都算啦
仲要成日「al佛」「al佛」咁
同吳唱k既「賣飛佛」有得揮呀真係!!
真係tvb係拍之前 可唔可以搵人執下佢地d讀音
佢個角色仲要係個四圍溝仔既空姐黎架!!

11:54 下午  
Anonymous 匿名 said...

哈哈,大家都睇得好投入啊~~
我本身一向都好buy楊怡,我真係覺得老中青花旦,青嗰一輩gei花旦中佢係最標青架啦,至少我覺得佢好過苦口苦面的胡杏兒好多,靚都靚d啦,雖然靚唔靚係好主觀~~佢喊嗰幾場都做得幾好,d眼淚好真囉~反而做佢老公gei黃宗澤真係好無發揮喎,講得啱啊,佢比起客串gei林峰仲面目模糊啊~~可能later爭產佢先有機會出下位掛?!
得得哋真係好得,其實我一向都覺得陳豪唔走型男路線仲好,好似佢喺《秀才遇著兵》入面咁,傻傻/憨直得來好討好~~
如果話阿歡唔似有錢仔,我覺得阿法拉姐姐仲唔似啊,佢嗰一口廣東話實在令第一晚睇gei時候gei我不自禁問,點解要搵一個講嘢都唔正gei大陸妹來做有錢大學生,一d都唔靚亦無嗰種有錢人家個女的氣質吖~~
鍾嘉欣係執到支好簽啦,雖然我都唔知佢憑咩,又唔係話佢做得唔好,只係佢真係唔夠討好喎~至少唔夠討好到戲中林峰同得得哋都情根深種於佢囉~哈哈~~

12:19 上午  
Anonymous 匿名 said...

係啦, 不停係咁「al佛」、「al佛」, 佛到耳仔都痺埋, 真係好難受!!!!!! 老實講, "david"都唔係d咩複雜名啦, 咁都講唔到?!! 有冇搞錯!!! 估唔到今時今日仲有人讀「day域」, 真羞家!

不過咁, 蒙小姐d英文咁"正", 咪同碗麵襯到絕lor!! 呀!!! 差d唔記得仲有阿"柯佬"黎諾懿... 哈! 唔怪得佢地三個咁friend!!!

12:21 上午  
Blogger 芒姐 said...

匿名,

哈哈...雖則話david唔係一個複雜o既名, 但係市面上又真係有好多人講唔到個"v"音,讀成"w"...我甚至聽過有d人反轉將"w"讀成"v"添...真神奇!

咁又係, 佢三個o係呢方面應該真係好夾到!

3:26 下午  
Blogger 芒姐 said...

鄧塔,

係囉..."溏心"果然受歡迎, 大家都睇得好投入! 雖然我唔覺得話真係好好睇, 但呢期都係得呢套最有吸引力同埋最能夠引起大家追看o既慾望!

楊怡一向都幾好戲, 不過我覺得佢呢期個樣有d唔同o左, 可能個妝濃o左好多, 成個感覺都唔同o左, 我反而鍾意清純look o既佢多d!

法拉姐姐真係唔多討好, 佢d鄉音真係聽得人有d辛苦...仲要一連兩線劇都有佢! 聽聞話會開套劇俾佢做女主角添...真係唔該晒!

一比較之下, 我都明點解tvb要捧鍾嘉欣o既, 咁至少佢形象好d, 同埋乖呀嘛! 不過今次佢真係執到支好籌, 雜誌又話原先係安排佢同蒙嘉慧個角色對調, 唔知係咪真呢?

3:32 下午  
Blogger 芒姐 said...

flyingbirdie,

蒙嘉慧d懶音當然勁啦...所以佢一出道拍電影都o岩, 起碼有配音!

佢又係慘o既, 俾個咁o既角色佢做, 第三者一定唔討好, 仲要佢又唔係天姿國色, 更加欠缺說服力...不過常在心個角色我真係覺得幾係煩, 俾我係程亮都唔揀佢! 三日唔埋兩日就發脾四!

鐘嘉欣係有進步o既, 同埋形象好, 不過演技真係有得改進...不過至少自然過楊思琦小姐好多!

楊怡其實一出道做"昏前婚後"我已經幾鍾意佢, 一開始留意佢當然因為佢似張可頤, 睇落佢又真係做得幾好, 仲要係新人喎...之後d"再生緣", "流金歲月", "智勇新警界", "學警雄心"等都做得好好...不過"學警出更"居然無o左佢, 實在太過份喇!

3:39 下午  
Blogger 芒姐 said...

AMAZING,

tvb雖然有一班竹升, 但係亦都有好多英文只屬小學程度加埋講廣東話都有嚴重語障的藝人們, 所以都好難避o架喇...唯有真係開個教人改善懶音o既節目, 由呢班藝人擔正做反面教材啦...

3:42 下午  
Blogger 芒姐 said...

Tommy,

係囉...以前匯應通d問題都話合理d, at least可以主觀d, 好似如果你係立生, 你會揀阿雪定係阿靜...但呢d根本係無得揀, 十個無聊! 觀眾投票呢d...其實係咪真係有投票呢樣o野都成問題, 係無線宣傳招數o者!

3:45 下午  
Blogger 芒姐 said...

HOLLIE,

蒙嘉慧個角色係乞人憎o架喇, 不過

係, 我都認同鍾嘉欣作為入行3,4年o既藝人, 演技算幾ok o架喇, 不過又唔覺得特別好o個隻囉...neutral啦...! 態度好呢樣值得加許, 抵無線捧佢! 不過又唔洗捧得咁勁, 上半年都已經播o左兩套佢擔o既劇, 仲要有一部係40集長劇添...

楊怡演技係唔錯, 不過無線好似又無咁力捧佢喇!

黎諾懿o既"柯佬", 令我諗起佢o係"東方之珠"叫陳敏之做"茄woh"...真係可怕! 佢真係需要去上發音班!

不過oral o個集無啦啦俾機會阿陳法拉去晒英文又係怪雞...一家人食食o下飯講講o下中文, 無啦啦要demonstrate番考oral所講o既o野, 極奇突兀!

阿貽興王o既才子形象, 由本來已經無, 到依家簡直係負10呀! 好鬼驚!

哈哈...呂慧儀似吳麗珠! 都有少少, 不過我覺得吳日言似吳麗珠多d!

係喎, 計起上o黎細契好似真係細過哥哥...不過o係"儂本多情"佢兩個個角色又幾fit in喎...

3:55 下午  
Blogger 芒姐 said...

匿名,

咁其實蒙嘉慧應該開心先o岩, d人憎佢即係佢演得成功...不過依家d觀眾同三十年前都唔同啦, 係都係憎水擘擘o者, 又唔會憎佢真人o卦? 好似d人都唔會憎o左阿關菊英, 反而好受歡迎添!

4:01 下午  
Blogger 芒姐 said...

匿名,

真的嗎? "烈火雄心II"係咪都係王心慰拍o架?

4:02 下午  
Anonymous 匿名 said...

我都覺得林峰縯得好好,尤其前兩晚死阿媽果幾場戲,睇到我喊晒,之前仲以為呢個角色系個花瓶,求求其其靚靚仔仔,拍下拖就算交到功課喇,點知都比佢有得發揮,之前偸食個陣好嬲佢,但系宜傢真系好中意alfred,唔想佢死啊。睇落林峰D戲真系唔差wor。
得得地系好,但系我中意alfred多D,佢真系肯改過,點解常在心連呢個機會都唔肯比佢?常在心雖然唔算好靚,但系佢地兩個好襯。

9:02 下午  
Anonymous 匿名 said...

Re 佢真系肯改過,點解常在心連呢個機會都唔肯比佢?

因為"一次不忠, 百次不用"!!

9:11 下午  
Anonymous 匿名 said...

真的嗎? "烈火雄心II"係咪都係王心慰拍o架?

12:07 上午  
Anonymous 匿名 said...

ha ha, but i think 吳日言似李克勤多d, especially their big eyes and big mouths!!!

12:30 上午  
Anonymous 匿名 said...

我都覺得常在心好煩,無理取鬧不突止,仲成日喊嗰度難頂!俾著我實一早飛咗佢!照計佢同得得地應該係全劇最討好o既角色,結果搞成o甘。雖然得得地係好人,但佢有d低低地,我鍾意唔落。

我都覺得林峰做得幾好,尤其係死阿媽嗰兩場,feel到佢好慘。

12:51 上午  
Anonymous 匿名 said...

但我覺得程亮唔抵可憐!

3:11 下午  
Blogger 芒姐 said...

哎...常在心好煩, 程亮就衰花心, 水擘擘giu好友個男友又賤...真係無個抵幫...不過或者咁就正正反影現實, 無一個人係完全"中"o既, 總有d人性缺點...不過呢一段睇得我愈o黎愈煩厭, 細契o個段爭產亦都太乞人憎, 仲要拖多六集...反而想佢快d完o左佢算喇, 拖得太耐!

10:57 上午  
Blogger 芒姐 said...

仲有, O個段係咁不停"沒有常在心的日子"網誌都好煩...同埋O個單誹謗CASE勁雞...係咁O翕兩句就O翕完, 個大腳八又話係好SENIOR O既大狀, 唔係咁肉酸呀嘛?!

3:20 上午  

發佈留言

<< Home