2-13(mon) 刑偵情意結(上)

哈哈! 呢期d重播劇真係幾好睇, 除o左期待已久o既“楚留番之蝙蝠傳奇”外…多年前睇o左n次o既“難兄難弟”, 原來再睇番都依然咁好睇…不過講呢兩套劇之前, 都要講番寫o左一段時間o既“刑偵情意結”…當係送俾自己o既一個回顧!

“刑偵”三部曲終於全部播映完畢, 對呢個曾經咁喜愛, 到依家仲有一份情意結o既劇集, 點都要作一次總回顧!

第一次一連三輯一氣呵成咁睇番, 的確係一個好好o既安排! (雖然當年o係佢首播第三輯之前, 我都特登o係暑假重溫番自己珍藏o既小量“刑偵”1+2o既精彩片段, 因為好記得第三輯係9月1日, f.7o既開學日首播o既…有個去o左寄宿o既同學仲俾o左n盒帶我幫佢錄起晒40集!) 咁樣一連睇晒三輯, 可以睇到d主角幾年o黎o既轉變…尤其係郭可盈!

雖然就算無線唔重播, 自己買vcd都可以一連三輯一氣呵成咁睇, 但係o係電視播又有一種唔同o既感覺…好眾志成城咁! 無線呢一著又係醒o既, 自從“創世紀”同“尋秦記”o係深宵時段重播創收視佳績, 佢o地就識得另創呢個深宵market, 仲會宣傳埋呢個時段o既重播劇集, o係廣告度都搵番筆啦!



咁耐無睇再睇番,“刑偵”確係無印象中咁好睇…但無可否認, 係一個情意結! 當年確係好興呢d查案戲o既, 但依家睇番, d案情亦無我想像中咁緊湊…最簡單而精彩反而係毫無expectation, 最小本製作o既“刑1”! 同埋我最impressed o既係十年後睇番, d劇情都唔覺得太娘喎!

D化妝都ok, 係接受唔到佢d服裝囉…真係好核突! 呢個未必關係咪out o左o既事, 而係當時已經算係好求其! 尤其係車匙…佢d衫真係肉酸到唔知點解無線可以由得個女主角咁樣著出街, 有一件灰色o既褸, 我都有件一模一樣o既, 係花園街買o既幾十蚊貨仔…唔係價錢o既問題, 係我之後著出街都覺得有d樣衰! 佢居然用o黎出鏡…實在太大膽!



不過真係不得不承認十年人事幾翻新, 當時陶大宇紅到幾乎每一個節目, 每一本雜誌都會見到佢, 郭可盈亦都係最紅o既新?花旦…但係十年後o既今日, 好多當時仲未出道或未上位o既姐仔, 依家都吃重過佢, 甚至?埋佢最恨o個個台慶“我最喜愛女主角”獎! 而陶大宇…回巢後都仲有得做男主角o既, 但論聲勢, 同十年前完全無得比, even阿義仔梁榮忠都紅過佢好多 (“車震”事件後就更加“人氣急升”啦!) 即使做張大勇情敵o既“百萬富翁”陳啟泰, 依家都比佢撈得掂! 仲有, even o係“刑1”某個單元做其中一個角色o既馬德鐘, 十年後都可以拍住當時已經係做女主角o既郭可盈做台慶劇“酒店風雲”o既男女主角…真係世事難料! 十年前o既馬德鐘, 又點會諗到自己十年後可以紅過當年o既萬人迷陶大宇呀?



當然, 最“十年人事幾翻新”o既, 係郭可盈個樣, 一compare番十年前同依家o既佢, 真係好明顯係唔同o左好多…唔知佢抽脂定磨腮骨, 但一定搞過d o野! 但係我覺得即使佢以前塊面勁包, 都好過依家個樣好似barbie咁, 有二百個artificial…睇番晒三輯, 佢都係o係“刑2”最好樣, 起碼對眼無咁artificial!



反而蘇玉華就係另一種“十年人事幾翻新”…居然係十年後反而young o左好多, 正確d o黎講係十年來逐漸young落去! 正如我之前寫“奪命真夫”o個幾篇時講過, 第一次o係電視認識蘇玉華係95年o既“刑1”…o個時覺得呢位阿姑個樣好老, 點解會搵佢配baby face o既梁榮忠…好似老佢成十年咁! 當時佢個打扮又娘, 又好厚粉, 直頭以為佢40幾歲…反而十年後o既今日, 佢居然似30幾歲! 好神奇! 其實佢o係“刑2”已經young o左d, 再一年比一年young…佢真係一個奇蹟!

仲有一個“十年人事幾翻新”o既, 相信係古巨基! 第一輯由佢主唱o既主題曲同插曲, 同佢其他十年前o既歌一樣咁kum聽…陽光男孩形象確係討好! 唔知點解, 十年後佢會變成全個樂壇最作狀o既歌手…以前自然活潑o既佢, 去o左邊呢? 好懷念o個個年代o既古巨基同埋佢o既歌曲!

一聽到主題曲個前奏, 就已經令人好興奮, 彷彿回到十年前! 當時特登買o左隻古巨基碟, 有主題曲“感情真相”同埋插曲“對你始終癡心一往”…兩首歌都好好聽! 但最頂癮係佢將歌詞最尾一句“在路上驀然遇上”唱成“在路上慕然遇上”…當時我都懷疑o左一陣究竟係咪我o地不嬲都讀錯呢? 唔通係“慕然回首”??? 後尾發覺, 其實d歌星好多字都唔識讀, 可能連監製都走漏眼無留意到, 就整o左個咁o既version出o黎!

正如之後幾年陳eason隻“天下無雙”有句應該係“不削我對生命眷戀”…但佢讀o左“不悄我對生命眷戀”… 之後佢唱live都好似有改番, 但cd就出晒, 收都收唔番 (我仲有佢呢隻簽名碟添…因為早年佢d碟不是十分賣得, 佢老豆會買起一大jar再叫佢簽晒名送俾朋友[頭兩隻仲要連送d人都唔係太願要o個隻], 而我個friend個爸爸就係佢其中一個朋友, 所以我有幸獲得簽名碟乙隻…但係呢隻碟開始佢就紅喇, 之後都無呢支歌仔唱lu!)…佢有一次接受訪問都好似有講過讀o左字o既問題, 話覺得好遺憾…咁又係…所以唔肯定隻字點讀真係唔好亂錄…否則錯o左就“一世”喇!