2-20(mon) 義不容情

接liza姐“名曲滿天星” o個個節目“超級靚聲演鬥廳”, 比阿姐個節目仲要差d! 唯一係聽張偉文唱“一生何求”時播番“義不容情”o既片段非常吸引! 睇番黃日華, 劉嘉玲, 周海媚, 仲有我偶像溫兆倫同邵美琪o既片段…超精彩呢! 我記得o個時讀小學四年級, 睇藍潔瑛上吊o個part睇到差d喊…大家都知我好少會咁o架嘛! 仲有阿楊思琦小姐個男友李泳豪 (依家改o左名叫李永豪…但唔見佢改o左名運勢好o左幾多? So far都未見過d半途改名o既藝人改完名會紅? 要多謝guestbook朋友提醒…唔知點解之前會寫錯o左自認同阿嬌有宿世姻緣o既李泳漢?!)…細個o個時真係好得意, 同埋d戲好好…唔知點解大個o左會撈得咁唔掂?!

聽番隻主題曲, 睇番d片段, 真係好經典, 好想睇番呀…我覺得無線真係應該重播番“義不容情”! 其實自89年後我都無睇過喇…隔o左十幾年, 依家o係網上d人仲有熱烈討論呢套劇…特別係最尾出現o個個紅色高跟鞋女人究竟係劉嘉玲定係黃日華個妹何嘉麗呢? 我覺得其實幾明顯係何嘉麗囉! 仲有當年個摺幸運星熱潮…都真係好激o架! o個時真係有好多同學仔返學校摺星, 仲逼我一齊摺…但因為我無天份, 亦懶係型唔會跟風o架嘛, 所以摺o左幾粒我就無玩lu!



上次寫“八十年代的美麗傳說－TVB當家花旦”都有寫過“義不容情”…但講真, o個時又唔係太有衝動去睇番呢套戲…不過依家我想睇喎…幾時重播呀?

要數劉嘉玲電視生涯的代表作，相信觀眾們必會投《義不容情》（1989）一票。當時她剛與富家公子解除婚約復出拍劇，但演技並沒有因此而生疏，演出令人刮目相看。她在劇中與黃日華的一段刻骨銘心愛情，多年來仍為觀眾津津樂道。當年她為黃日華摺「幸運星」的一段，更掀起全港一片摺「幸運星」熱潮；走在街上，無論男女老幼均在摺「幸運星」，可見此劇的威力。大結局時，劉嘉玲究竟有否回到黃日華身邊，至今仍是大家爭論的話題。《義不容情》的經典程度無容置疑，多年來投選十大最受歡迎電視劇，它必定榜上有名；相信與其扣人心弦的劇情及演員們絲絲入扣的演出不無關係。”

仲有, 睇番d舊劇片段, 阿霆鋒媽狄波拉後生時真係幾靚女, 靚過謝婷婷多多聲!

呢幾日又睇番d舊帶, 有一段係“俠骨仁心”?面o既“爆笑”片段…我記得當時year 3有個broadening course要做project, 我同d同學仔book o左main lib一間房睇帶, 順手帶埋呢段片返去推介俾d同學仔睇…笑到大家抽筋! 如果早d知道可以咁book間房睇帶, 我應該一入大學就日日帶同學仔去煲舊帶…點解永遠都係要到year 3先發現呢d好地方?

呢段片段爆笑之處, 就係你睇埋字幕都唔知佢佢兩個講緊咩英文?! 同吳鎮宇o係“沖上雲霄”度唸“l-pane”不想伯仲…鄧特希一定係陶大宇+關詠荷過唔去, 正如“沖上雲霄”監製一定係同吳鎮宇過唔去一樣…整咩咁玩佢o地?! 同劇大部份演員d英文都好過佢o地啦…你搵周嘉玲, 馮德倫, b哥哥, even呂頌賢或者楊恭如…邊個都好, 點都會講得好過佢o地…我真係未聽過有人可以講英文講得咁趣緻!


( “俠骨仁心”搞笑“睇電視學英文”片段)


原來套新戲“天幕下的戀人”o既監製係王心慰…上年呢個時期上o個套“甜孫爺爺”都係佢o既作品, 唔怪知得個style有d似…睇o黎都應該幾唔錯o下, 尤其係輕鬆小品從來都work o架啦! 今日“娛樂直播”仲附送男主角鄭嘉穎接受佢表弟王賢誌訪問…成個訪問不停emphasize佢o地“老表”o既關係…但整個訪問都好悶!

依家“東張西望”仲加埋以前個中大謝霆鋒-高皓正 (填“全靠你教我渣車”o個位)做主持, 佢都做得ok喎! 起碼無amigo咁懶係o野 (雖然我唔否認佢係做到幾好, 同埋真係擦得d人好開心)!