6-7(wed) “最想非禮女藝人”
繼“巴士阿叔”之後, 呢幾日搞到滿城風雨o既商台架勢堂“最想非禮女藝人”事件都算經典! 講真, 其實我一向都唔係太buy森美小儀 (即係ok啦, 但唔係時下青年覺得咁好笑咁正…我覺得好一般囉! 同埋唔該森美唔好扮型囉!)….不過今次事件, 我又覺得社會人士o既反應有d小題大造…當然係唔鼓吹呢種行為, 但明知係搞o下gimmick, 又需唔需要搞到咁大呀?!
依家又要停播節目, 又停佢o地職兩個月…我又覺得唔洗囉! 佢o地o既行為係有d唔恰當, 但道o左歉咪算囉! 最正都係亞視囉…反應奇快…尋晚無啦啦整o左個“全城熱話之電台投票風波”節目去剖析呢件事, 仲要放o係十點半時段, 對正無線o既”15/16”, 邪住o個兩位主持…好抵死! 不過整個節目真係悶到呢…仲要搵埋三五七個所謂“專家”去o翕d你我都o翕得出o既”性別歧視”等言論, 再搵埋律師去講解”非禮”o既定義…都頗為無聊, 極奇小題大造!
真係不得不佩服香港人o既“快”…除o左亞視即刻整o左個咁o既節目, 無線亦好快咁諗到搵正牌阿叔同林敏驄o係巴士拍o左段宣傳無線世界盃o既片段…真係有諗頭! 仲有好多其他廣告都即刻用呢條橋…真係不得不寫個“服”字!
呢期d電台都算黑…繼商台“架勢堂”風波, 今日睇新聞仲勁, 話港台幾個dj俾icac拉o左…包括何重恩, 拿拿淋, 仲有我不嬲最頂唔順o既kawaii…佢雖然面目可憎, 但又唔似會做埋d咁o既o野呀?!
另一個超精彩節目係逢禮拜二張玉珊博士o個個“修身堂秀出美麗人生2006”! 好好笑呀呢個節目, 連d同事都熱烈討論! 其實年年我o地都會o係度講呢個節目, 因為實在太好笑, 太精彩! 每次都有新花神, 新驚喜!
今集個肥哥哥都幾搞笑…佢本來係個光頭阿叔, 減完其實都不太得, 但懶係幫佢重新執過個image, 一日到黑lup住頂帽, 再懶型咁雙手插袋…好搞o野! 跟住仲要搵個什麼“2005年最受歡迎修身主角”阿蕙同佢扮情侶, 幾十歲人著埋d學生裝…真係好難受! 之前睇報紙話呢個姐仔將會被張小姐力捧, 係佢用o黎取代欣宜o既秘密武器…咁呢位姐仔又係幾靚o既, 皆因佢就算好肥時都已經覺得佢幾好樣! 但係我記得佢上年好似係同個男友一齊修身話要準備結婚 (唔知有無記錯?), 點知修完身大家反而拜拜o左…個男友應該好後悔同佢去修身…哈!
跟住每次d主角最尾都一定會睇到喊, 連今集個男仔都要喊…最後再一定加句: “多謝張小姐”…一式一樣, 但趣緻呀!
連個做o左n輯o既什麼修身顧問mylene, 專係教人唔知咩bmi, 水份, 卡路里o個個呢…都變o左明星, 人人都識佢…有人o係中環見到佢, 仲懶巴閉咁o既樣!
posted by 芒姐 at 10:44 下午
16 Comments:
我尋晚睇完新聞，講「架勢堂」要停播，都特登開機聽?佢地節目(好明顯，平時唔聽開)，聽到森美一開始仲係用好開心既語氣做節目，有?心嗡，不過無計，做公眾人物，就係要對人歡笑背人垂淚。不過講真，我覺得攪到要停播，都幾無啦啦。我剛同事研究，乜唔係每個節目出街前，所有野都要經監製通過架咩?既然出得街，即係監製有問題啦，咁監製責任係咪比較大呢?同埋我想知監製係邊個囉?
監製就係森美本人!
芒姐, 你係咪已經終止左undo生涯? 祝你工作愉快呀! 不過你千祈唔好減產呀, 你每篇評論都係我精神食糧!
長期讀者...你整咩留咪d咁o既言去逐步"踢爆"我我我我我...? 好明顯你真係一位長期讀者同埋很可能我係識你o既, 否則你唔會識用"undo"呢個詞語...以我記憶所及, 我o係呢度都無再用...有咩你私下同我講嘛!
哈哈哈哈...敏兒, 我o地真係好夾! 我又係尋晚睇完新聞, 特登開機聽o下「架勢堂」...係第一次, 亦恐怕係最後一次...因為如果唔係因為呢件事, 我絕對無興趣聽森美小儀!
咁唔知佢o地話聽職期間唔可以接其他job, 包唔包括無線的"15/16"呢?! 定係15/16已經拍晒?!
YEAH! 俾個「五」先，哈哈。我估對15/16都有影響，因為原本15/16之後，係佢地?「架勢堂」仲有遊戲要玩，係有連繫的，仲每晚送一郃mac機，咁而家攪成咁，apple都有意見卦?
我都係不嬲都唔係太鍾意聽森美小儀，覺得都唔係幾好笑同埋有時笑得好夾硬。不過身邊既人都好鍾意聽又覺得好好笑。個人比較鍾意聽港台第二台。
我冇留意新聞呢，唔睇你個blog都唔知拿拿淋佢地俾icac拉？！即刻去睇先…
我都係唔鍾意kawaii。佢以前剩係做DJ時都覺得還可以，但之後想入娛樂圈時就唔鍾意了。
芒姐,好耐無見啦!!!哈哈~~
我都覺得巴士阿叔同「架勢堂」呢件事搞太大了~~係唔係而家的電視劇唔好睇,涼瓜又唔好睇,情2?c9又唔想睇,所以好悶呢~
我真係唔明,為什麼阿叔件事可以搞到咁大,佢日日咁上報紙,唔悶架咩?!仲有,呢件明明係醜事來架嘛(唔係唔醜?嘛,?巴士大大聲用粗口罵人),仲好似好光榮咁日日講~
架勢堂件事仲搞笑,婦女團體的網上簽署支持票有1000sth,森小的支持就有10000sth~講真,聽開的人都知佢兩個純粹搞下笑?,如果唔係,點會阮小儀係第一位?,好啦,你地?人投訴,咁咪道歉改題目囉,搞到而家要停播又有咩謂呢~~
唉,香港人都真係太悶了~哈哈
岩岩係咁兒larp larp新聞。你估港台事件係咪又好似上次咁，俾政府玩針對呢？？
我都覺得巴士阿叔事件好煩。即開頭因為段片上晒報都有ｄ驚訝（我估好多人都係掛）。但之後果位阿叔仲不斷地搏上報，好煩呀，好厭惡。
香港人既商機真係不斷架，你有無睇過呢兩款 TEE，好賣得下架！
握握手
http://hk.f1.page.auctions.yahoo.com/hk/auction/1111901399
未解決
http://hk.f2.page.auctions.yahoo.com/hk/auction/b4587657
問你死未？
After reading the newspapers briefly, I still don't understand why ICAC has arrested the 3 RTHK DJs. It looks like they had defrauded RTHK, rather than bribed anyone loh.
As for 森美小儀, I guess taking them off the air is a bit drastic. But then again, I think they deserve it, esp 森美. He is quite annoying. Well on the bright side, they can definitely stay home and watch the World Cup now.
I thought Commerical Radio only asked them not to take on new external jobs, so technically speaking, it won't affect 15/16. But TVB would probably kick them off in order to remain politically correct.
Moo,
Well, perhaps defrauding RTHK (i.e.the govt) also falls w/in the "investigation area" of ICAC...well, but it's so mo liu if those DJs really defrauded RTHK for less than $70,000...so cheap lor!
Haha, yes, 森美小儀 can watch World Cup freely...good for them! 15/16 has a "joint project" w/ 架勢堂...so now, they have to cut this part and this would adversely affect the ratings and perhaps the sponsors...TVB今次俾佢o地玩死!
雲,
d tee其實幾係靚, 我都想買番件! 呢兩件真係未見過, 之前睇報紙見到另外一d款, 都唔錯o下...但我驚著到出街會有好多人撞衫囉! 同埋一陣間以為我係巴叔個frd, 俾人打鑊甘我咪真係好甘?!
小茵,
巴叔d新聞真係幾乎睇到嘔, 但日日新鮮日日甘, 都難怪大家每日咁追睇...依家已經變成"真情"咁, 好似做連續劇一樣! 亦有d似當年"鄧家爭產"事件...每日睇睇到想死, 但唔睇又同人無話題啦!
港台dj事件真係好鬼核突, 如果真係為o左7萬蚊...真係接多幾份job算啦! 拿拿淋有名"富貴dj", 7萬蚊對佢o黎講真係唔知算係咩 (仲要唔知7萬裡面佢分到幾多?)...不過唔知事件來龍去脈...睇o下有咩發展囉?!
個kawaii由佢做"娛樂滿天星"(我仲係中學年代...即近十年前)已好唔buy佢, 好八婆, 好吵耳又好無point, 咁真係寧願聽蘭子喇(雖然佢都同樣吵耳, 但好笑d)...跟住又學人扮靚女去做名星, 又入tvb, 又搞石仔, 又豐胸...真係唔知佢想點?! 安份守己咪算囉!
哈哈...我其實已無聽電台好耐, 但要我揀, 我都會揀港台...即管話我老土囉...我覺得我已過o左聽商台o既年紀好耐, 中學時係會聽商台o既, 之後真係搵唔到一個dj可以吸引我聽 (林海峰太早我未起身)! 所以無o左呢個習慣好耐...都係忠於我o既電視行業吧啦!
鄧塔,
係呀, 好耐無見!
巴叔最終俾人打鑊甘, 都唔知係咪夾埋做場戲? 我就覺得唔會係四眼仔做喇...佢份人咁"餚底"!
森美小儀事件真係未免搞得over左...係, 係要教育下一代, 但d年青人都唔係低能o既, 唔係話搞個網上投票就真係會激起佢o地去非禮人...不過算啦, 呢d公民教育topic, 我o地都係唔方便討論咁多, 唔係一陣間d婦女團體又聯署炸o左我個blog, 或唔俾我o係任何地方寫blog兩個月...我都係收聲喇!
敏兒,
我仲特登o係佢o地last一晚節目開收音機聽o下佢o地有咩講...可惜聽到開頭, 到後尾又唔記得o左聽 (可見呢個節目對我o黎講係幾咁悶o下!)...可能呢次事件反而幫佢o地o黎個反宣傳, 多o左好多無o黎啦肺o既人聽佢o地個節目同埋睇15/16...包括我本人! 之後仲多人搵佢做訪問接job咁呢...好似巴叔咁! 所以佢o地都唔洗愁呀!
唔知15/16本身schedule左做幾耐, 但我睇都唔會做好多集o者, 應該都唔係太大影響o卦?!
發佈留言
<< Home