2006年9月5日星期二

9-5(tues) 草蜢2006演唱會

(又係好長好長o既一篇日記, 不過唔打算分幾篇喇…請自行找廁所位!)

好多朋友都話等緊我講草蜢2006演唱會, 哈哈! 我尋晚終於睇o左喇…本來係加開o既尾場, 點知臨尾又再加多場…世事永遠都係咁樣…算吧啦!

今次去睇之前特登唔睇任何相關新聞, 費事好似上次“軟硬演唱會”咁唔覺意睇o左d “大飲茶” 咁(sorry, 人o地好似改o左名叫“東張西望”好耐…但係我仍然覺得“大飲茶”呢個名最貼切亦最親切!), 無晒驚喜!

就咁樣…o係我講對呢個演唱會o既評語之前, 我必須refer大家去番舊年o個三篇關於草蜢“2005我們的演唱會”o既評論…因為有好多事件o既“來龍去脈”, “起乘轉合”或者係芒姐對於草蜢o既感覺等等, 講o左就費事重覆…同埋我恐怕有好多o野係上次會寫得有感覺過今次囉! 所以請大家o係睇我以下對今年演唱會o既評論前, 去溫一溫故知新先…


2005-10-20(thurs) 草蜢-我們的演唱會(上)



2005-10-21(fri) 草蜢-我們的演唱會(中)



2005-10-22(sat)草蜢-我們的演唱會(下)



2006-5-3(wed) 草蜢真唱.真音樂會



(2005年的棒棒+本人唯一擁有的草蜢精選cd)

哈哈…我自己都有去睇o左一次我上年寫o既呢幾篇o野, 好彩睇一睇, 如果唔係好多o野都唔記得o左…一個relaxed d o既人寫o野果然係有heart d, 今日的我被工作煎熬, 每日好似打仗咁, 又無啦啦俾人用d奇怪理由想accuse我“專業失當”…實在係反轉豬肚, 所以寫o野都無上年寫得咁有heart囉! 亦唔排除返工返得太累, 會影響o左睇演唱會o既心情同體力!

Um…其實整體o黎講都絕對係一個高質素o既演唱會…尤其係對於舊年無睇過o既朋友而言, 我相信會更加好睇! 如果我無睇到去年“我們的演唱會”o既話, 我相信論氣氛同埋整個流程, 可能今次o既演唱會應該更加高分!

但我確實係有睇過, 又不能完全抽離地當自己無睇過去評分…因為正如我o係舊年o既評論講到, 所有o野第一次都係最好睇o既…正因為舊年係我成世人第一次睇草蜢演唱會 (sorry, 作為我個年代o既人, 我承認係有d“背”…但尋日同人o地個秘書傾開 [註: 唔係我本人個廿歲出頭o既秘書妹妹…據我所知, 呢位秘書小姐應該同我一樣大, 並唔係好似我秘書咁細我一round], 我話夜d會去睇草蜢演唱會…佢話: 係咩? 我都唔知草蜢開演唱會o既? 我話: 唔係呀嘩? 個個我o地個年代o既人, 都應該會碌到去睇草蜢啦! 佢話: 我以為草蜢係我家姐個年代o架喎! 我o地應該係四大天王o既年代o架嘛! 我話: o下? 草蜢唔係同四大天王同一個年代咩?! 嚴格o黎講, 草蜢係早少少, 但係四大天王走紅o既九十年代初期, 亦正是草蜢當紅時期呀! 真係唔知係我早熟定咩喇?! 不過我認同應該係大我o地幾年o既人最最最迷草蜢o既…因為草蜢走紅時正值佢o地o既少年時期嘛!)…所以覺得特別好睇, 同埋真係超出我預期中咁好睇…o個種感動同震撼, 我到今時今日仲記得!

亦都因為咁, 我推介o左俾十萬五千個人睇 (誇張o左少少啦!)…除o左o係網上勁推介外, 亦都逢人推一次…所有我身邊o既朋友, 都必定聽過我讚上年o既草蜢演唱會有幾咁好睇! 雖然我唔係佢o地o既fans (正如我舊年所講, 從前唔係, 依家唔係, 嚴格o黎講從來都未試過係), 但好o野一定要推介…雖然我個人寸, 但係客觀呢樣o野, 我絕對做得到! 其實自上年個演唱會之後, 好多朋友因為search草蜢演唱會而search o左入o黎, 又有d朋友話我聽因為我d咁挑剔o既人都勁推介…點都要去睇o下! 所以我覺得佢o地話今年由三場變六場…我都應記一功囉! 不過唔洗多謝我o架喇, 只要下次開演唱會記住送多兩張vip飛俾我就得…咁我就會識do o架喇…哈! (希望無icac o既朋友睇緊!)


(2006年的棒棒+執屋時摷到的1991年草蜢封面大眾電視)

不過今次真係比上次多o左好多十零廿歲o既“小朋友”在場, 仲表現得好瘋癲添! 可能真係因為上次o既“我們的演唱會”有口皆碑, 之後o係k又勁點唱, dvd又熱賣, 吸引到d唔熟悉草蜢, 唔認識八十年代o既小朋友一齊o黎湊熱鬧…同我o地一齊懷緬璀璨的八十年代!

其實個演唱會整體氣氛係比上次仲要好…如果大家覺得軟硬演唱會氣氛好, 你可以去睇埋草蜢先, 咁就會知咩係熱血沸騰…真係全場都癲晒囉! 不過個高潮位實在來得太早, 十點鐘就企晒起身, 但係唱完一輪快歌又冷靜番落o黎唱慢歌…以為再有第二輪高潮, 點知唱多隻“飛躍千個夢”再玩番上年叫大家一齊分part唱“忘情森巴舞”就完喇…未免將d高潮位計錯o左少少囉! 我個人認為應該唱埋慢歌跟住一氣呵成落去唱晒所有快歌, 大家一齊high到完場咁就perfect喇!

至於d歌曲, 其實舊年我已經講過“芒姐’s choice” o架喇…快歌最喜愛“失戀”, 因為好輕快又好開心…舊年演唱會唱o左半隻, 今年終於唱晒成隻…正! 最鍾意佢o地d typical o既八十年代舞步, 你話簡單又唔係好簡單, 但人人都可以跟住跳到囉…o個個踩 “甲由” (依然係唔識打, 唔該一眾好心人話我聽個倉頡碼!) 舞步, 同埋waiter捧餐舞步…都係經典中o既經典!

仲有“飛躍千個夢”啦…呢首簡直係為草蜢度身訂造, 有點題作用o既歌…最鍾意就係o個句“共跳入高空飛躍…飛縱…到半空”…一人唱兩隻字…好有合作無間o既感覺囉!

當然唔少得當年最hit o既“忘情森巴舞”…我o地年代o既年青人/小朋友, 有邊個會唔識做o個個“撥頭擺腦fing手”動作呀? (做得好唔好睇又係另一回事啦) 可惜今次好似無唱另外兩首我都好鍾意o既快歌“ABC”同埋“紅唇的吻”…! Oh仲有隻半快半慢o既“半點心”又係無唱, 我都好鍾意呢隻o架嘛! 不過我明白, 有好多歌上次唱o左, 今次又唱就未免太無新意嘛…但我個人仍然希望會聽到囉!

仲有, 點解今年唱woobomba仍然係無劉小慧o架? 點解?! 反正湯寶如同關淑怡都返番出o黎, 應該搵齊六個人再唱過啦…我好期待再睇小慧同湯記跳呢隻舞o架喎…我一聽到個前奏, 就諗起佢o地幾個o係個mv+廣告度拿住個籃球唔知點郁o個個樣…好搞笑!



至於慢歌就首推“歲月燃燒”…無法, 情意結! 未睇 “我本善良”之前, 都覺得呢首歌幾好聽, 但係睇埋套戲之後 (再quote多次…係第23集講浩男出獄後有月蝕睇, 佢同伊明互相諗起對方時播o既襯底音樂…歌詞同劇情完全fit in囉!)…就更加喜歡…可能真係配合埋劇情更加相得益彰! 之前睇報導話“我本善良”係第一套加入粵語流行曲做配樂o既劇集…果然係掂囉…揀歌真係揀得不能再好, 呢隻歌配埋落o個個場景度, 可以話係天衣無縫, 對套劇同隻歌都起到互惠互利之效! 上次只係o係medley唱o左半隻, 今次有得聽晒成首…正啊! 可惜無o左另外兩首又係好好聽o既“黃昏都市人”同埋“夜了”!

仲有一首心水推介, 上次都講過, 今年再講多次, 就係“心中的歌”…無辦法, 除o左好聽之外, 又係情意結…記得小學時成日搭校車時都o係“晨光第一線”聽到淑梅姐播呢隻歌! 當時已經覺得好好聽…仲成日自己o係屋企唱添…哈哈! 上個禮拜睇草蜢上“娛樂直播”訪問, 主時問佢o地最鍾意自己邊隻歌, 蘇志威都係話揀“心中的歌”…果然係有taste! 抵我三個之中最buy佢!

咁其實佢o地三個都各有長處o既, 阿細就比較funny d, 阿智就比較有創意囉…哈哈! 佢作d曲都唔錯! 至於傑仔, 咁無可否認, 佢當年真係最靚仔, 而佢把聲又的確係三個之中最響亮, 唱得最好o個個…抵佢咁多年霸住個主音位o既! 不過可唔可以唔好再唱“失落園”呀?! 我同意呢隻歌係好好聽, 亦都係佢o既代表作…但係真係已經唱到爛o左, 毫無驚喜! 不過我都明白如果唔唱呢隻歌, d fans會好失望o既…但係我尋晚聽到呢隻歌時, 唯一諗起o既就係同一時段播緊o個套“CIB”入面o既emily…伍姑娘! 哈!



不厭其煩地講多次…其實以佢o地呢個年紀, 真係算好有活力, 跳得好好, 仲要齊o個o下好o野呀嘛! 同埋唱功基本上都係唔錯o架喇…尤其邊唱邊跳都有呢個standard, 算係十分之好! 但最好多專注o係自己o既強項=唱歌+跳舞…而唔好講太多無謂/肉麻o既o野, 更加唔好互相除大家件衫為o左show肌肉…寧願你一早唔著出o黎好過!

仲有, 其實有個疑問, 舊年個演唱會o既點題歌係“我們”, 今年有邊首呀? 好似同“我們”hit o既程度相差好遠咁o既?!

總結番今次呢個草蜢2006演唱會…都係o個句, 齋講內容+氣氛, 其實可能會好過上年添…但係因為我確實係o係唔夠一年之前睇過, 兩個演唱會時間相差太短, 而內容亦都差唔多…基於私人感情因素, 我會喜歡上次個演唱會多d!

如果佢話明係上次演唱會o既encore版, 咁可能我o既expectation又唔同, 但係呢個又好似sell到係一個全新o既演唱會, 咁我就會expect有多d唔同o既元素…所以overall我會俾佢九十五分啦 (對於芒姐呢d咁挑剔o既人…呢個絕對係超高分!)! 但係相信對於上年無去睇過呢個演唱會o既朋友, 一定可以拿足一百分!

我就講完喇, 如果有去睇到呢個演唱會o既朋友…可以o係度同大家分享o下你o既觀後感…特別係草蜢超級fans但又超中肯o既讀者Sandy啦…!



o係bma yahoo blogs裡面見到草蜢都有blog喎…得閒可以睇o下:

蔡一傑
http://hk.myblog.yahoo.com/bmaremuschoy


蔡一智
http://hk.myblog.yahoo.com/bmacalvinchoy


蘇志威
http://hk.myblog.yahoo.com/bmaedmondso


號外: 早前翻睇“華東水災”o既錄影帶, 居然發現流傳多年o既“蘇老闆在勁歌吃皺紙之謎”…哈哈哈…失傳o左咁多年, 大家終於都可以睇番 (如果你睇到o既話…因為餅帶好跳)!

話說當時係“華東水災”o個期, 咩節目都會唱o下隻振災主題曲“滔滔千里心”…咁呢次勁歌金曲就請o左beyond, 草蜢同許志安上去, 臨尾再一人一句唱番隻“滔滔千里…淹天地”…點知到阿細唱o既時候, 有d皺紙跌落o黎, 佢居然一口食o左佢…好搞笑! 其實網上成日有人講起, 今天終於o係我d珍藏錄影帶度唔覺意見到:



又, o係youtube見到一段草蜢第一次跟梅姐o係紅館表演o既片段…都幾有記念價值啊:

28 Comments:

Anonymous 匿名 said...

日中(?)中日(?)

11:33 上午  
Anonymous 匿名 said...

哈! 我冒住俾人發現o既危險都要留一留言!!

首先多謝你捧草蜢場, 其實連草蜢自己都話估唔到, 今次回歸樂壇, 居然會吸納到一班新fans(或者應該話一批從前唔多認識/欣賞草蜢o既人), 我知道有好多舊年同今年都有去concert o既朋友, 係無睇過佢地11年前o係紅館個debut concert, 以前我細佬係勁憎草蜢(尤其係蔡一傑), 成日笑我無taste, 但長大o左o既佢舊年(其實今次都有)居然同班朋友去o左睇佢o地個復出concert, 我真係估佢唔到o羅!

好同意你講, 今次個concert係比上次個差少少, 舊年係因為大家都餓o左太耐, 加上樂壇又廢o左太耐, 陣懷舊風又吹得好厲害, 所以大家o既反應會咁好。我好認同, "我們的演唱會"o既成功係配合o左天時、地利、人和!

今次, 因為同上次開show時間好近, 新鮮感大減, 不過對fans同non-fans o黎講, 仍然係有唔同程度o既期待o既! 其實坦白講, 我唔覺得今次個演唱會有乜咁creative, 佢o地o係舞台上o既sexy/姣/大膽演繹, 坦白講, 早係11年前o既演唱會已經見識過, 甚至o係更早期o既各類小型演唱會度已經睇過, 佢o地個非洲森林動物主題, 以前o係"嗲噢"度亦已見過, 對我o黎講, 根本一d新鮮感都無! 佢o地雖然不斷強調今次係全新o既演唱會, 但係只有一首新歌, 仲要到差不多八月尾先plug上台, 咁個演唱會可以有幾創新呢?! 所以我之前一直對今次個show無太大期望, 或者咁講, 呢個仍然係一個高質素/值得睇o既show, 對一d從前唔太認識草蜢o既朋友o黎講, 仲應該好有新鮮感o添, 不過對於我o黎講, 我覺得佢o地口中所謂o既創意, 其實只不過係將從前o既大膽意念再番炒, 佢o地以前可能係走得太快, 太前衛, 從前不被接受/欣賞o既ideas, 今天反而成為大眾都認同o既創新意念, 我覺得有少少"遲來的春天"o既感覺!

其實我都幾估唔到班十零廿歲o既後生仔女會咁瘋癲, 老實講, 三隻蜢已經人到中年, 兩隻仲做埋老豆o添, 照道理其實都難吸引到班小弟弟小妹妹... 我呢d細細個就支持佢o地o既, 無論佢o地變成點, 無論佢o地仲有無創意, 就點都會去捧一捧場o既, 畢竟係陪住我o地長大o既, 無論如何總有點感情, 我唔知道其他舊fans點諗, 我自己就抱住同舊朋友聚一聚o既心態, 所以個show對我o黎講係好ok o既! 不過如果你俾我揀, 我會覺得95年個"三人主義演唱會"係最好睇(第一次嘛), 90年代我已經睇過佢o地好多live shows, 佢o地以前做乜show都好落力好落本, 最好o既o野其實我好耐之前已經睇過, 所以如果in terms of "好睇/創意程度", 我並唔覺得舊年同今年個show特別好睇... 舊年o個個令人好有感觸, in terms of "感人程度", "我們的演唱會"就最掂, 今次呢個, 少o左久別重逢、驀然回首o既感觸, 但就俾到機會大家開開心心癲番晚, 似一個開心party 多d!

你o個晚無唱"abc"咩? 首新歌叫"將軍令", 好遲先派上台, 所以好多人都唔係好識唱! 其實我唔覺得"我們"特別好聽, melody係好舒服好易琅琅上口, 不過我又唔覺得特別好聽, 林夕o既詞亦唔見得好突出, 我知道佢想表達d乜, 但佢d詞好似唔係幾到肉, 有d力不從心咁, 所以我唔係幾明點解阿智成日都話呢首歌係佢o既all-time fav, 客觀地睇/聽, 其實係有好多歌比呢首出色o架喎!

以我記憶所及, 以前追隨草蜢o既人涵蓋不同o既age groups, 11年前, 我識o既fans大部分係70年代出生o既(不過都見過一個騎騎呢呢o既叔叔, 同一個有少少肥o既少婦), 70年代初o個批係元老級, 有d人已經同阿蜢身邊o既工作人員混熟o左o添, 70年代中o個批最die hard, 不過亦有批70年代尾o既係極度瘋狂, 我識得最細o個批當時讀緊P.6/F.1, 屈指一算, 今年都應該有23/24歲喇(所以我真係唔明點解今時今日仍然有人可以afford到時間不停咁跟出跟入, 邊請到咁多假呀?)!

哈哈, o個本大眾電視, 我都有!!

11:56 上午  
Anonymous 匿名 said...

我尋晚睇左最後一場, 係我第一次睇草蜢呀(舊年miss左)! 氣氛真係好正! “ABC”同埋“紅唇的吻"都有唱喎, encore唱仲左"半點心"! Perfect! 係爭左隻"原諒我是我"囉...anyway, 阿傑仔唱主音係?架, 佢吧聲最搶嘛(不過略嫌嗌左d)(sorry我都係百彈齋主)...蘚老闆唱果陣個key真係有少少off, 不過正如佢地自己所講, 佢地係一排隊組合, 唔係一隊樂隊!

12:00 下午  
Anonymous 匿名 said...

我都來趁趁熱鬧先。事先聲明,上次的演唱會,我沒有看,對於他們的演出,實在不錯。以他們這樣的年紀,又唱又跳,不是人人都得架。我睇的那晚,他們都沒有唱「ABC」及「紅唇的吻」,係失望架。
那一晚,我與朋友坐在24行,但都企晒起身,又跳又叫,哈哈,真係無幾何。
聽佢地既歌,令我覺得返番去80年代,正。

10:07 下午  
Anonymous 匿名 said...

monjeh

佢地有唱'ABC', '半點心', 同'紅唇的吻'喎~ (我睇第一場)

YOUTUBE 有好多佢地 MV 丫~ 當然有你最愛歲月燃燒

http://www.youtube.com/watch?v=6WQNkg7Pn7A

//wink

10:20 下午  
Anonymous 匿名 said...

題外話

Monjeh, 今期有壹週刊有鄧靄霖專訪ar, stories about her childhood, bad relationships with parents.....maybe you will be interested la!

Your fan,
CC

12:15 上午  
Blogger 芒姐 said...

cc,

真係有d咁o既事...多謝你話我知, 都可以買o黎睇呀! 不過今日蘋果登o左d令我好反感o既o野...我要同阿嬌一齊杯葛壹傳媒呀...!!!!!!!

1:30 上午  
Blogger 芒姐 said...

m,

oh...點解我o個場無?! 定係我思覺失調?!

我都有o係youtube睇到佢o地好多舊mv...八九十年代的mv確係令人懷念啊!

1:34 上午  
Blogger 芒姐 said...

敏兒,


係呀, 我相信以佢o地呢個年紀, 除o左城城, 都無人可以跳得咁勁o架喇!

基本上係無論坐邊行, 大家都企晒起身...一半係因為high, 一半可能係因為俾前面o既人遮住...哈哈!

1:37 上午  
Blogger 芒姐 said...

Tfil,

唔通我真係miss左? 不過都唔出奇, "半點心"好似就真係無喇! 哈哈…原來你都有留意到佢o地off pitch…其實我費事好似咁挑剔咁啦…阿細solo時係好明顯flat左少少…不過作為live performance我都覺得好可以接受o架喇!

1:38 上午  
Blogger 芒姐 said...

sandy,

哈哈…好同意你講"感人程度"o個一點…"我們的演唱會"就係有o個種“久別重逢、驀然回首”o既感觸…好中point!

其實我都唔係100%sure佢o地有無唱 “abc”, 可能medley左, 又或者我遊o左魂都唔出奇!

如果以歌曲旋律+歌詞o黎計…“我們”絕對稱唔上什麼高質素…可能佢o地係加埋私人感情分先咁鍾意呢隻歌…畢竟對上一次有歌派台, 好能已經係好多年前…再聚埋一齊o既時候大家已經轉變o左好多…係感觸多d囉!

哈哈…睇番d舊大眾, 原來有好多期都有草蜢…基本上九十年代初搵來搵去都係o個十個人做封面…老黎+劉華+克勤+beyond+周慧敏+草蜢etc…仲要幾乎全部都係寶記o既歌手!

1:39 上午  
Blogger 芒姐 said...

雞,

唔得喎! 都係打唔到呀!

1:40 上午  
Anonymous 匿名 said...

mon jeh n sandy are really diehard fans.

my fav Grasshopper songs:
失戀,半點心,?月燃燒。

I also watch ?月燃燒 MV at m's youtube.

9:24 上午  
Anonymous 匿名 said...

shaw_mag,

其實我都唔係好die hard, 至少而家已經唔會乜都錄/買/撐/儲/讚, 年紀大啦嘛!

我諗芒姐只係欣賞草蜢o既stage performance同才華o者!

係呀, 呢三首歌真係好好聽, 好經典, 基本上, 佢o地o係寶記前期o既歌係最好聽o既, 佢o地o個時d唱片10隻歌起碼有7隻都係好好聽, 其餘兩隻係幾好聽, 剩番一隻係還可以o既... 我自己就覺得直至"與你在一起"(碟名)時期, 佢o地o既唱片仍然頗具水準, 不過到o左"音樂昆蟲"(碟名)時期o既歌曲質素就明顯有d下滑, 直到o係寶記最後一隻唱片"草蜢音樂店", d歌先好聽番少少(因為比較大路), 可惜之後簽o左滾石, 自此就... 然後一別十年, 真係回頭已是百年身!

11:12 上午  
Anonymous 匿名 said...

芒姐, 寶記o個段風光日子真係好令人懷念啊! 那段日子, 唔止草蜢, 基本上大部分寶記歌手d歌都好好聽, 學友啦, 克勤啦, 真係首首主打歌咁好聽! 寶記當年o既卡拉ok都明顯拍得靚過其他唱片公司(尤其同飛圖比)!

11:21 上午  
Blogger 芒姐 said...

Sandy,

咁無法...當時寶記係全香港最大o既保險公司(oh, sorry, 係唱片公司...唔知點解依家成日掛住保險公司?!), 比起依家o既英皇再勁多百倍...財雄勢大, 拍個mv都唔同d啦...不過以前反而鍾意買"天碟"或者"飛圖"d卡拉ok碟返屋企唱多過寶記d咩"真開心"(係咪呢個名?)系列...因為d歌好唱d!

我第一隻買番屋企唱o既碟o既第一隻歌, 居然係唱"face to face"o既"情迷milano"..."愛上你milano, 夢在浪漫街道, 啖著cappucino擁抱你..."哈哈哈...好鬼死令人懷念...依家唱k仲好鍾意唱呢d歌! 俾秘書妹妹笑我老餅...但其實我只係老佢幾年, 但我唱o既歌係老佢廿年!

你講得好o岩...克勤/學友, even老黎當年d碟真係10隻歌有8隻都係勁好聽, 其餘兩隻都係ok好聽...同依家o個d無得比! 仲記得學友隻"真情流露"大碟, 10隻歌裡面有7隻都係上榜歌...依家一隻碟hit到3首, 都已經係好超班o架喇!

11:37 上午  
Blogger 芒姐 said...

shaw_mag,

哈哈...我從來都無試過係草蜢fans, 更遑論係die hard fans...sandy講得好o岩, 我係欣賞佢o地o既才華同埋stage performance...客觀地講, 佢o地o既演唱會真係幾得o既!

你講o個三隻歌, 我都好欣賞!

11:39 上午  
Anonymous 匿名 said...

o夷? 我都好鍾意"情迷milano"o架喎! o個時我勁留意樂壇(所以我都記得劉彩玉唱"紅太陽"), 乜o野音樂節目同variety shows都唔放過, 乜o野雜誌都買一餐, 91年個暑假我第一次見到草蜢真身, 又去太陽計劃音樂會, 見到好多歌星, o個個年頭, 我幾乎以為自己都係樂壇一份子啊! 真白痴!

o個陣時d歌真係好好聽, 就算我從來都無喜歡過老黎, 我都覺得佢d歌勁好聽! 有時我會諗, o個陣時其實有好多人都頗有潛質/實力(其實face to face都好ok o架, even張立基都有好多好聽o既歌), 不過當年樂壇實在有太多精英, 所以先容不下佢o地...

噢! 除o左"真開心", 仲有"碟聖"同"寶麗金POL-330XX"系列, 當年o既樂壇真係好熱鬧!

11:57 上午  
Blogger 芒姐 said...

Sandy,

OH, 我以前細個都成日想去太陽計劃o架, 不過又無人陪我去, 所以永遠都無坐言起行!

哈哈...我又係咩音樂節目都好鍾意睇, 咩鬼歌都要識唱晒先安落! 所以好多大show都仲會keep住d帶...雖然已經花晒! 得閒睇番, 仍然會覺得好好睇...又或者可能都係一個情意結啦!

曾經以為自己係樂壇一份子? 哈哈...我都係...真係好投入o架喎!

除o左"情迷milano", 我仲好鍾意"face to face相隔空氣...", 可惜呢隻卡拉ok好似無得唱咁o既...你有無見過?

哈哈"紅太陽"其實其實都幾ok o架喎...唔知你有無聽過佢同一個叫鄭梓浩o既男歌手合唱o既"一對妒忌的心"? 其實我覺得呢隻歌都好好聽, 但只係o係"週點"聽過佢o地唱, 同埋之後電台都有播o下, 但係無hit過囉!

張立基就當然係得啦...佢都hit過兩o下, 同埋佢d跳舞歌真係好掂...以前成日鍾意唱"electric is her world...electric girl...", "p-a-s-s-i-o-n..."同埋"唔該你啦張立基..."

oh, 好懷念那個百花齊放的樂壇啊!

12:51 下午  
Anonymous 匿名 said...

Agree with sandy. Poligram karaoke disk has much better qualite than 飛圖.

1:41 下午  
Anonymous 匿名 said...

其實最初都要有人帶先有得去見明星, 之後無人帶, 就乞求d同學仔陪我去(但係經常會俾人拒絕), 再過多一兩年, 就膽粗粗咁自己去, 去去o下就自然識到一班fans朋友, 我諗大部分fans都係咁開始佢o地o既追星生涯... 不過當時好多所謂o既fans朋友都幾得人驚, 同自己o既同學仔係完全唔同type, 不過以前為o左見偶像, 無計啦, 同埋同一大班fans一齊支持自己o既偶像, 其實都幾開心o架!

你講o個首係咪"in my dream"呀? big echo年代(唔係90年代尾o既hello kitty big echo呀, 係真係90年代初剛剛有karaoke box o既年代)可能有過, 不過而家就唔知喇, 就算有都可能俾人delete o左喇, 加州紅連"lonely"(個mv有阿蜢親自演出o架)同"永遠愛著您"(呢個就無阿蜢o既)都delete o左, 太過份喇! 我自己以前就好鍾意唱"情迷milano"同埋"一些", 呢兩首歌都好好聽呀!

我記得"一對妒忌的心"呀, d雜誌有登歌詞o架, 電台都有播o架, 其實當年o既劉彩玉都幾sweet, 不過當年樂壇實在有太多聲色藝俱全o既人, 無得留低都係正常o既... 我記得鄭梓浩, 佢同黎明詩、蔡興麟同期o架嘛, 哈哈... 佢都做過100分封面(封底)o架!

張立基d慢歌都ok o架, 我好鍾意"盼你此刻奔向我"同中版o既"你走了", 而家好少有咁好聽o既歌喇, 可能本地創作真係無cover version咁好聽啦!

哈哈, 當一般人o既志願係做醫生/律師/會計師/工程師/教師/社工時, 我年少時o既志願係做歌星o既經理人啊... 只可惜, 當我踏出校園o既時候, 唔止娛樂圈, 係整個香港都急速衰退, 時也命也, 我成日都諗, 如果我早10年8載出世, 一定會多好多機會!

2:40 下午  
Blogger 芒姐 said...

哈哈, 我細個都想做歌星/唱片騎師o架...哈哈哈哈! 從來無想過我的志願係做你列舉o既任何一個"有為"職業 (有o既...老師囉...個個細路都曾經有段時間想做老師o卦...因為o個時day day對住嘛!)...點知依家真係"事與願違"地做o左其中一樣, 簡直引以為憾呀!

咁你依家去做mani第二囉...未遲呀!

我講o個首係face to face第一首主打同名歌"face to face"...哈哈哈...好好聽o架..."face to face相隔空氣..."再配以好似"情迷milano"o既騎呢手勢!

係啦, d卡拉ok成人都delete晒d舊歌...好多都好經典又好想唱番o架嘛! "一些"以前仲有, 依家都好似唔見埋!

係呀, 劉彩玉o個期仲有你講o既鄭梓浩,黎明詩,蔡興麟,仲有後來同佢一齊做"都市閒情"o既鄭鄭瑞芬...紅得起o既sammi同埋彭bell! oh, 仲有周影...我好鍾意唱佢隻"情路茫茫"...還有"lmf"(李美鳳)o既"熱愛can't let you go"...好騎呢, 好好笑...好有趣o既一隻歌...實在太多太多喇!

張立基d歌...都真係幾唔錯...唔知後來點解講到佢好似癲o左咁...仲要同蔡楓華一齊開演唱會!

7:07 下午  
Anonymous 匿名 said...

我想做林姍姍多d喎, 陳家瑛都幾堅, even陳淑芬auntie都幾型, mani就好似唔夠pro, 唔知係因為佢黐lay筋定係因為佢d仔仔女女大部分都唔唱得呢, 我總係覺得佢唔pro(不過其實有本事令楊受成咁信佢, 又有本事捧紅咁多人, 佢都應該係堅o既)!

哈哈, 曾幾何時, 我都有幻想過做梅姐o既女徒弟o既, 不過呢個念頭一瞬即逝, 因為實在係太妄想喇, 同埋梅姐o係91年已經宣佈唔唱歌! 我又無諗過做dj, 不過就試過自己玩錄音扮陳海琪, o個時真係好低b!

我記得周影呀, 梁繼璋個girlfriend嘛, 除o左"情路茫茫", 我仲好鍾意改編自鄧麗君名曲"我只在乎你"o既"讓我愉快愛一次", o個陣時我覺得佢都幾靚o架! 鄭瑞芬係咪曾經同林保怡合唱過o架? 唔知點解有個咁o既印象... 哈哈, 李美鳳首"熱愛can't let you go"真係幾經典, 如果我無記錯, 呢首歌好似同sammi首"Valentino"同期plug o既!

9:07 下午  
Anonymous 匿名 said...

鄭瑞芬+林保怡 = baby baby

11:50 下午  
Blogger 芒姐 said...

哈哈...我又真係唔知道鄭瑞芬同林保怡有首"baby baby"添...

呵呵...亦都唔知周影曾經係梁繼璋個女友...真係"背"喇!

"讓我愉快愛一次"都幾好聽...不過我都係最鍾意"情路茫茫"...因為d音好怪, 好有趣!

係呀, 你無記錯"can't let you go go..."係同"valentino名字你改得多麼的好..."同期...o個期仲有"護花使者", "一起走過的日子", "一夥不變心"...哈哈哈...講呢d老餅o野真係永遠都講唔完啊!

12:38 上午  
Anonymous 匿名 said...

係咁打, blogger出唔到呢兩個字, 奈何

1:10 下午  
Blogger 芒姐 said...

雞,

但word都唔得喎..."日中"即係"al"嘛?! 但無字出..."中日"即"la"嘛? 就出o左隻"衵"出o黎囉!

6:08 下午  
Anonymous 匿名 said...

新年快樂!!

3:25 下午  

發佈留言

<< Home