8-9(wed) 會考十年
話咁快又到一年一度o既會考放榜…更加話咁快…我考o左會考十年! 之前講都係話三年前考會考…五年前考會考…或者係七年前考會考…點知講講o下…咁就十年! 好驚!
人o地就拉闊黃金十年…我o地就居然係會考黃金十年!
咁就十年…由1996年至2006年, 我究竟做o左d咩有建樹o既o野, 有d咩輝煌o既成就?! 答案係無o既! 我由一個f.5學生, 變成今日o既xx…但係感覺上好似仲廢o左, 個成就感比起中學時代o既我, 係有減無增囉!
懷緬過去係我o既強項…多愁善感係我o既弱點! 好少o既事, 都會令我諗番起以前o既呢樣o個樣…今年見到新聞報導大肆宣揚會考放榜, 又特首為會考生打氣, 又話要搞好多活動去幫佢o地減壓, 又見到莊啟程門外如常地多o左好多可憐天下父母心o既“露宿者” (唔知我o地年代有無o既呢?! o個時我連莊啟程都未聽過!)…其實我想問好耐, 究竟d入學申請表係咪先到先得派完即止o既呢? 如果唔係, 點解要通宵去排隊呢?!…仲有仲有, 就係見到新聞報導話今年有廿五個十優狀元…真係會唔會多o左d呢?!
睇到呢d咁多o既新聞, 令我憶起十年前o既夏天…當日係香港之光李麗珊為香港拿o左第一面 (亦都係唯一一面) 奧運金牌凱旋榮歸o既大日子, 所以新聞o既focus居然唔放o係會考, 轉而放o左o係佢返長州o既盛況…睇番十年後o既珊珊, 已經係一女之母, 呢期好多節目都見到佢, 好明顯係要搵奶粉錢!
講真, 諗番起會考放榜前夕, 緊張我又唔係十分緊張, 反正都考o左又改變唔到個事實, 但唔係點[目訓]得著就總有o架喇…當年因為我o地係同商台“我未成年”o既dj芝see菇bee小姐同一屆考會考, 所以商台特登整o左個通宵節目去陪佢+所有會考生等放榜…不過個節目都幾悶o下! 十年後o既今日, 人o地已經貴為商台o既老神子, 大家姐…
我仲記得我唔知點解戚起條筋, fax o左去當時仲o係商台o既歐陽德勛個節目度點唱俾d同學仔聽…仲要讀埋出o黎, 有帶為證…原來我都曾經年輕過, 趣緻過!
其實睇開我日記o既朋友, 都知我好鍾意講會考…從來會考o既新聞, 都係我好關注o既o野…舊年有講過, 2003年都有講過…
當然, 隨住年紀漸長, 會考就好似離我愈o黎愈遠, 愈o黎愈唔關我事…但都要勉勵o下d會考生朋友仔…會考成績, 其實唔係大家想像到咁重要…當然, 係呢一刻一定係最緊要o個樣o野, 會考考得唔好好似個天lum o左落o黎咁…但會考剛好十年o既我望番轉頭得到o既啟示係…會考考得好其實又點呢?! 唔代表你往後會一帆風順, 因為人生依然充滿住唔同o既挑戰, 唔同o既考試…當年得到一個大眾覺得好o既成績, 十年後o既生活, 依然可能會過得好似我咁節dur…哈哈! 經驗話俾我o地知, 成績好, 地位高o既朋友, 往往反而係唔快樂o既…平凡是福嘛!
當然, 無可否認會考點都係人生一個重要o既關口, 重要o既里程碑…某程度上我覺得無考過會考, 直頭唔算o係香港讀過書…反而高考就真係無咩必要考喇…係一個torture, 一個大折磨! 但係會考…絕對可以話係所有香港學生o既集體回憶, 到你大個之後睇番…會為自己過o左呢一關而感到驕傲!
(另外, 今日睇新聞仲睇到話廣播署副署長吳錫輝退休, 港台為佢搞o左個歡送會…當然即刻望一望睇o下見唔見到佢老婆, 即係我“偶像”鄧藹琳auntie…哈哈哈! 果然見到佢喎…佢依家個look真係有d驚...仲有佢個兩個仔, 個樣都好…哈哈哈!)
posted by 芒姐 at 12:26 下午
14 Comments:
其實我聽過D學生講﹐application form係可以0係網上download架。不過梗係唔夠即日去排隊留名﹐等interview放心啦。你就咁放低張form就走﹐都唔知人地會擺到第幾priority先處理。
我(地)年代已有呢間學校﹐不過我當時只知係一間人名學校。係之後有個同學讀左一個月後﹐原校(我學校)有位﹐佢先放棄莊啟程學席番番黎讀。
聽番佢講先知間學校幾好﹐又新﹐又有D行大學制度﹐設施又完善。之後入大學我0個系都有唔少係呢間讀預科。你唔識﹐可能係因為你係香港島人啦。
會考﹐本來已同我無乜關係﹐但而家﹐又好似同我拉番近一D...
Dear Mon jeh,
Long time no chat! (But I visit your blog everyday ka!)
Ha Ha Ha...!我同你有同一個action，就係不停地o下見唔見到鄧藹琳......then I saw a 爆炸頭.....here she is!!!!!:P
According to me, 吳錫輝都保養得OK, 都有小小高層人士feel! ^__*
會考了N年的Mon jeh fan屎,
CC
哈哈...cc! 好耐無見!
我都覺得吳錫輝其實係keep得幾好, 幾有台型o個隻...反而鄧藹琳auntie依家個look, 我就真係有d不敢恭維!
反而以前佢就好靚 (at least有style囉), 吳生個樣就成個死飛仔咁, 依家剛剛調番轉, 男人同女人真係永遠都無公平o既!
miss "今次你應該知我係邊個啦"...你真係每次都有新名, 玩驚喜呀嘛?!
其實我諗如果成績唔達標, 就算排隊捕o係度都無用, 相反如果成績好d, 就算遲d o黎都會收...應該唔係先到先得o卦?!
講真, 我o係入大學之前, 都真係無聽過莊啟程...當然, 之後都識都d人係讀呢間學校, 同埋依家年年新聞都講, high profile o左好多, 雖然唔係傳統名校, 但係人都識啦!
岩丫...會考成績根本唔代表d咩...
我今年f7
想當年我同4個fd ce成績如下:
我:18
a:14
b:16
c:16
睇落去我應該最有機入u,但出黎結果係14分果個入左u,但我係冇offer架(我地al成績差唔多,我仲比佢好少少架)
so....我一d都唔覺得ce有幾重要囉
"懷緬過去係我o既強項…多愁善感係我o既弱點!"
通常喜歡懷緬過去o既人都係多愁善感o既(又或者應該話, 唔係多愁善感o既人都唔興懷舊)!
莊啟程好似係華東水災o個年已經有。其實我真係覺得門外o既父母偉大o架(雖然佢o地排o左都未必有用), 睇新聞仲見到有個婆婆幫自己個孫排隊o添, 真陰公! 唔知呢間莊啟程有乜收生準則o既呢... 睇新聞話有人20分入唔到, 但係舊年考到18分就已經走去開記招o既kellyjackie又竟然入到喎!
我剛o岩先知原來鄧藹琳係第三者... 我阿媽話港台人曾經好憎鄧藹琳同車淑梅, 因為兩個都恃住有高層老公做大靠山成日作威作福喎, 唔知係咪真o既呢?
Can you write down your thoughts.
喜有此理今晚大結局. 之後8點做 "喜有此理 - 天下無不散之筳席 "?
有D像"真情"最後last night, 觀眾可以打上去phone in.
Hey Mon jeh
There's an exhibition at World Trade Centre Causeway Bay that suits you very well! It's an exhibition of a lot of stuffs in the 80s, u'll definitely smile and have good memories when seeing those stuffs again!
Hung Hung
thanks hung hung!
i'll go and have a look on sat...hope it's still on!
ATV Super Fan,
哈哈...我都係前幾日唔覺意睇到亞視見到宣傳片先知道原來係結局篇...估唔到咁快就做完 (雖然都差唔多成年)...
雖然個節目其實幾粗製濫造, 但又幾好笑...不過我都無睇好耐喇, 特登錄o左個結局...睇完再話你知啦...
Sandy,
無錯, 鄧藹琳應該係第三者o黎...所以形象都係負面o個隻...不過我無經歷過o個段時間, 所以唔清楚有幾負面!
至於車淑梅女士, 我由細到大都好怕佢, 更加好驚聽到佢把"煩"音...彷彿額頭刻住"八婆"兩字, 成日搞風搞雨, 無無聊聊, 失禮自己...我完全唔明點解張文新會睇中佢...雖然早幾年港台唔知幾多周年搵番d舊人上去早節目, d人爆話當年係佢力追張文新...
佢兩位女士可以嫁到港台高層(即係政府高官...其實dj可以變做廣播署長, 都幾得意呀!), 仲要係兩位叔叔都算ok有型o個隻, 真係執到啦...
sandy,
我都覺得d父母太偉大...其實d仔女自己考得唔好, 應該自己受番...咁樣真係可憐天下父母心!
oh...kellyjackie點同呢...明星當然有特權啦, 有人幫間學校免費宣傳幾好呀...呢個世界永遠都係"朝中有人好辦事"o架啦!
不過咁...又或者係每年收生準則唔同, 又或者係o個個二十分同學中/英文唔合格呢...好似要好多呢d o野要加埋o架嘛...不過香港地, 最緊要都係有connection!
華東水災o個年先有, 即係得15年歷史o乍?!
匿名者,
其實入唔入到u又係好多因素o既, 我諗最緊要係你點擺o個廿個choice(仲係咪廿個)?!
我聽過有d成績唔係太差o既同學, 反而入唔到u, 但係有d比佢o地更差o既反而入到...好睇你排頭三位choice o既技巧!
講真, 唔可以話會考一d都唔重要, 因為你第時搵咩工, 通常都會叫你填會考+高考成績...畢竟佢o地係公開試, 點都比校內試更有代表性, 因為間間學校都有唔同評分準則嘛...會考考得好, 係有少量(係少量)著數o既...但係都好講你之後o既造化!
發佈留言
<< Home