7-21(fri) 我和殭屍有個約會

其實呢篇o野係兩年前“殭屍3”首播時打落, 但又未打晒, 終於掛住講第二d o野, 呢幾篇日記就無出到…既然適逢亞視依家深夜重播呢套戲, 呢幾篇“兩年前的日記”又有機會重見天日!



2004年12月我寫道:

我好想講番我之前一路講極都未講到o既“殭屍”…依家佢大結局都做埋, 我都未講到…實在太唔得喇!

亞視真係好絕情咁過o左成個禮拜都無重播過個結局…平時即晚就會重播o架啦嘛…咁樣對我太差喇! 不過算啦, 我連之前o個兩集到依家都未睇番…可知呢套劇其實有幾咁好睇! (芒按: 但依家我居然有d從來無睇“殭屍”o既friend話追緊呢套劇, 真係匪夷所思!)



我仍然鍥而不捨地唔放棄咁睇落去, 全因為一個情意結, 因為我係曾經係“殭屍”o既超級fans! 當年o既“殭屍1”, 真係好好好好好好好好好好好好睇o架! “殭屍1”雖然唔算係亞視o既大製作 (應該話直頭係小製作), 仲要曾經擺o左o係倉底好一段時間; 但o係98年一堆出真係有口皆碑, 不過收視依然低! 我當時都唔係特登捧場, 只係有晚夜晚12點幾溫溫o下考試無啦啦手痕“手禁”過去睇o下亞視做緊咩, 見到咁騎呢…咪即場睇上癮囉!


(好頂癮o既一張poster…一d都唔配合“殭屍”個神秘feel, 以為係港台“太陽計劃”或者 “y2k”節目囉!)

亞視確係精於製作呢d天馬行空+你估佢唔到o既劇種…亞視o既敢於創新, 係唯一一樣無線永遠都比唔上佢o既o野…呢d就係大台o既壓力!

當年我都真係好落力咁睇, 每晚12點準時o係個電視前面“捕”蛋咁“捕”, 即使有錄影機都要趕返屋企即場睇 (雖然12點其實已經係當日o既第2場), 好少可日日都咁早返屋企!



我記得佢o岩o岩做o既時候亦都係我year1第1次考試…讀書就無咁熱心, 反而睇電視就好落力…仲晚晚同個同學仔discuss劇情添! 原來我o地呢個咁o既faculty都搵到好多電視精…! 仲有就係同另外d同學仔o係icq討論, 仲有晚晚上o個d newsgroup同埋亞視個殭屍網頁(呢個好似係“殭2”時先有)同其他殭屍迷研究劇情…直頭係中o左殭屍毒咁樣! 最衰就係o個時無呢個芒姐o既私人園地俾我發表謬論, 搞到我無得睇完每集同大家分享o下觀後感! 好後悔無早d成立呢個私日記, 因為讀書o既時候其實係最得閒, 最有時間去update呢樣o個樣!



第1輯真係好好睇, 劇情創新得o黎又幾“籮-直”, 簡直係啟發思考呀…唔似得之後o個兩輯 (尤其第3輯咁天馬行空)! 一開始日本o個part好好睇, 仲有之後o係“嘉嘉大廈”捉鬼都好正…總之成輯都好正! 完全係一大驚喜! 我睇o左咁多次仍然覺得好好睇! 當時連d不嬲唔睇亞視o既人都有晚晚追, 可見佢o既受歡迎程度!



睇完呢套劇我仲瘋狂迷上有型o既馬小玲同埋懶不?o既況天佑添! 當時有一日居然 (其實唔係太“居然”o既…佢o係條街行有幾出奇呀? 都無人會理佢o架啦!) 俾我o係銅鑼灣見到尹天照…直頭想搵佢簽名, 不過最後都係無咁做到…之後仲不停咁俾人笑我偶像係尹天照添! 99年亞視個台慶頒獎禮見到殭屍全劇演員大獲全勝…真係開心o左好耐o架! 不過依家o既佢就…哈! 其實已經一路跌watt o架喇…到佢今次o個壇“霸王硬食芒”事件之後…真係有10個唔該晒囉!


(況天佑+馬小玲)

“殭1”o既唯一敗筆就係有楊恭如呢個物體o係度! 佢個樣係靚, 但又係o個隻好克人憎樣…仲要d戲難睇到爆…幾靚都無用! 同埋佢d鄉音+好似透唔到氣o既聲線…好可怕!


(@嘉嘉大廈)

(下期續)