7-1(sat) 1994年度香港小姐選舉

前幾篇講開“走樣二號”+曾經係信和賣相天后o既港姐冠軍譚小環小姐…其實早前我先o岩o岩重溫o左好經典o既94年港姐總決賽片段! 呢屆係其中一屆我覺得好好睇o既港姐選舉, 係成個節目都好好睇, 佳麗質素亦都唔錯…另外一屆o既心水選擇係1991年…又係好好睇, 不過留番下幾篇先講!

94年港姐最精彩之處莫過於李綺虹o既“個人表演”…o係決賽前佢都唔算係熱門, 淨係拿o左個“最受傳媒歡迎獎”…點知佢o係決賽一鳴驚人, 一夜間變成全城熱話, 風頭完全蓋過冠軍譚小環! 我記得第二日返到學校 (因為o個幾年港姐提早o左係5-6月舉行, 所以當時大家仲未放暑假, 連試都未考添) 所有同學o既話題都離唔開之前一晚o既港姐決賽, 大家仲即席扮番李綺虹o既超精彩對答…真係笑爆咀!

相信有睇過呢屆港姐o既朋友都可能仲隱約記得呢個環節, 因為當時都曾經引起一陣哄動…話說選出五強 (包括小環, 綺虹, 活麗明, 張可頤同埋黃[金己]瑩) 後, 有個環節係要五位佳麗互相遊說對方做一樣o野 (以轉幸運輪轉到咩項目o黎決定)…譚小環首先抽到李綺虹, 跟住李綺虹又抽到譚小環…佢兩個o既對話已經超爆笑! 到最後成晚俾人o既感覺都係超緊張o既張可頤又抽到超淡定o既李綺虹, 一個口窒窒, 一個定過[手台]油再句句啜核到爆…好大contrast!

剪輯o左當中最好笑o個段李綺虹遊說譚小環“認低威”片段…真係好頂癮! 咩“但係我無同你去中學喎!”…同埋“最多我成日跟住你…你認啦…”真係笑死你無命賠!


(譚小環vs李綺虹之認低威)

呢d說話爆笑得o黎其實又有d串…但係由李綺虹呢d鬼妹仔講出o黎, 你又唔會覺得串囉! 佢呢隻真係好typical o既面懞心精, 絕對唔係d人以為佢“是但o翕當秘笈”, 睇真d其實佢講好多o野都係有舖排o既, 句句都計算過個笑口o係邊, lead住成個conversation…一個字: “醒”! 仲要個個佳麗都吹佢唔漲! 你睇下台下無論觀眾定係高層定係落選佳麗都笑聲不絕, tum得大家好開心!

當年全香港o既人睇完呢個環節之後都對佢另眼相看…出晒位, 好受歡迎…連我都好欣賞佢! 我記得我後來仲寫過信俾佢添, 仲要係英文信…哈哈! 應該係佢加入“開心華之里”o個期…本來已經係“華之里”fans, 見到佢加入埋就更加高興啦…點知過o左無耐到譚小環加入, 套劇即刻被腰斬去播套什麼“梅花三弄”…好可憐! 我好鍾意睇“華之里”o架嘛, 佢仲要有幾集拍o左o既劇情都唔播, 聲都唔聲就摺埋o左 (我o個時有寫信去 “香港電視”投訴, 叫佢播番o個d拍o左但未播o既片段…不過最後佢都無聽我講, 連一個正正經經o既ending都無!)…譚小環果然係無運行! (正確o係講係行o左一日…就係佢當選o個日囉!)



不過譚小環o係決賽當晚的確係最sharp, 亦都係十多年來見到佢最靚o既一日, 就只此一天! 睇番佢o個時個樣, 真係飽滿好多, 靚好多, 開心好多…同依家瘦蜢蜢, 成日都好愁咁o既樣, 真係完全無得比! 瘦o左真係唔一定會靚o左! 睇番片段, 佢o個日個樣真係幾sweet幾可愛, 笑容滿面, 好討好o個隻囉…仲要表現得好淡定, 答問題又好得體…勝在樣樣都平均! o係呢段片都可以睇到譚小環當時真係有好多fans!

至於李綺虹就係勝在殺你一個措手不及, 有超水準表現…不過呢d通常拿唔到冠軍, 最o岩拿季軍…好似胡杏兒一樣! 而亞軍阿wood又係好typical亞軍look…最靚+高頭大馬+有少少yim悶o個隻!

至於五強o既其餘兩位…黃紀瑩真係好嫩, 18歲卜卜脆, 真係too young, too simple, 仲sometimes na?ve添…同埋佢真係一個“懶音怪”…當年仲要係超嚴重o個隻! 不過齋睇個樣又真係幾靚, 抵佢拿“最上鏡”, 當選之後仲即刻搭上古天樂!

反而年紀最大, 經驗又最豐富o既張可頤 (91年佢同另外三個女子組隊PP GALS, 叫做做過o下歌星, 入過o下娛樂圈!), 表現就最差! 太明顯地好緊張得失, 反而表現得好唔掂…答d好簡單o既問題答錯晒不特止, 仲要感覺過份aggressive, 非常唔討好; 而且當時個樣反而好老. 又唔多靚 (後來唔知點解一年比一年後生, 尤其係幾年後o既“難兄難弟”年代, 真係靚o左好好好好好好多)…仲要佳麗互選個個都揀佢出局…人緣真係麻麻! 但又真係最有演藝潛質…所以最終, 咁多個之中都係佢最紅! 反而冠軍譚小環就只可以做d二線尾三線頭o既角色…其實佢o地o係同一套戲碰頭都應該有d尷尬…一個做主角, 一個做大配角…好似o係“九五至尊”咁…但係當年o既選美結果就剛剛相反!



其實o個屆港姐質素亦都真係幾高, 其他落選佳麗仲有好多個都有留o係娛樂圈發展…好似陳芷菁, 康華…仲有我o地最“喜愛”o既淩祖絲 (鍾潔怡)!!!

個節目本身都好好睇…o個年個主題係treasure island, 全晚節目有晒theme, 又選新島主 (但互選時個個都推舉陳芷菁囉!), 又咩劍俠瑭煌 (何家勁), 蛇魔女 (關淑怡), 餓狼 (張學友), 太陽之子 (黎明)…每part都有個theme, 跟住再串成一整個故事…舖排得非常之咁好! 最衰就係當年將準決賽餅借o左俾個同學, 跟住佢一去不返, 追都追唔番, 搞到我個港姐錄影帶collection有一大缺陷!

最後仲有一part勁好笑o既, 就係由對上一屆冠軍阿莫可欣小姐幫新一屆冠軍譚小環人加冕, 點知佢加冕完, 拿錯o左supposedly係用o黎送俾得獎佳麗扎花, 仲要死都唔放…o個個拿扎花出o黎o既男人不停示意叫佢俾扎花譚小環, 點知點極佢都唔明, 死命拿住…最終個男人唯有將o個扎原本用o黎送俾頒獎嘉賓o既花俾o左譚小環…莫可欣真係咁多年來都咁odd囉!

1994年港姐佳麗一覽表