7-4(tues) 亞視五十年

有日睇開亞視, 終於見到上次台慶時佢話o個個咩“重拍50年來經典劇集”選舉…好搞笑…都唔明可以點重拍?


http://www.hkatv.com/special_events/06/bestdramavote/

“稱得上經典中的經典劇集，我們又如何再三回味？

亞洲電視快將踏入50周年，在過去的半世紀中，亞洲電視曾經製作多套膾炙人口的經典劇集。為了紀念這歷史時刻，我們希望透過觀眾的投票，選出一套最受歡迎的亞視劇集，讓我們可以在50周年台慶日子來臨之前，重新拍攝這套經典中的經典，讓它能重現觀眾眼前，再次被人仔細回味。”


哈哈…如果俾我揀, 我會選擇呢幾套:

7. 大地恩情
10. 甜甜廿四味
12. IQ成熟時
16. 青春三重奏
32. 勝者為王
34. 點解阿SIR係隻鬼
47. 我和殭屍有個約會
48. 縱橫四海
50. 情陷夜中環 (但絕對唔係“情陷夜中環2”…呢套實在爛得很, 仲要係愈睇愈爛o個隻! 但睇開又費事唔睇啦, 唯有勁fast forward咁睇, 但都有d頂唔順! 尤其d關係大兜亂…陳啟泰+陳寶轅+袁文杰三兄弟同張文慈+葉璇兩姐妹每個同每個都曾經有一手…實在太過亂咁o黎! 陳啟泰仲要睇住兩個佢心愛o既女人做o左自己弟婦…實在萬分騎呢! 呢d咁o既劇情…會唔會out o左d?! 上次“情陷夜中環”好精彩o架嘛…點解今次搞成咁?! 係咪無o左總駝主王晶呀?)



如果一定要我揀一套, 我當然會揀我最鍾意o既“IQ成熟時”啦…雖然o係呢個年代重拍, 都會幾騎呢o下…!

仲有, 數亞視經典劇集…點解會無我o地個年代d小朋友+年青人最熱愛o既“大提琴與點三八”o架?! o個時就算無睇開亞視o既朋友, 唔知點解都一定有睇過呢套劇o架喎!

原來依家夜晚11:50又重播“我和殭屍有個約會III”…咁都好, 雖然呢套劇係“殭屍”系列o既一大敗筆之作, 但我作為馬小玲+況天佑o既超級fans, 兩年前首播時都有追埋呢輯, 但係居然睇唔到結局 (因為大結局o個晚撞正我更喜愛o既“歡樂滿東華”, 但我又出o左街, 只係可以二選其一)…所以至今念念不忘!



仲有, 又要求救喇…有無人有睇過無線八十年代o既劇集“天降財神”? 主角好似有周潤發, 梁朝偉, 陳敏兒, 莊靜而等…我真係聽都未聽過! 一講“天降財神”, 我只係記得九十年代由歐陽波比同陳妙瑛主演o個套…最深刻o既場口就係新秀冠軍海俊杰食“金湯丸”kun (唔記得o左呢個字點打, 有無人可以話我知?) 死! 當時我o地笑o左好耐!

另一套係“太平天國”, 又係由陳敏兒主演, 仲有呂良偉同黃日華…呢套我好似有睇過, 但已經唔係好記得…有無電視精可以提供資料呢? 萬分感激!