8-3(thurs) 愛情全保
今日打大風, 落大雨…o係六十幾樓“居高臨下”o既office望出窗, 見到d雲同d雨係咁瘋狂o地亂郁…好有衝動打爆隻窗, 睇o下d雨點湧入o黎…直頭好似拍災難片咁…哈哈! 我係有被虐狂o架!
最唔掂係個天文台, 都唔知點做o野o架?! 打到咁勁都唔掛八號…係咪玩o野呀? 醒半日假俾我o地都好呀! 今日行中環條天橋, 直頭好似同d風鬥力咁…呢d咁o既時刻, 緊係留o係屋企個被竇內最開心嘛! 搞到人全日都無咩mood做o野, 但其實又有超多o野未做, 真係好難搞, 不如索性放一日假抖o下開心d!
依家無咩時間睇電視, 對一個電視精o黎講真係好節dur…返工返到天昏地暗 (在我的standard來說) , 無線兩線“新劇”都未有機會講…大陸版神鵰我唔會講, 因為根本無咁早返到屋企, 即使返到屋企亦無興趣睇…本身已經唔係我杯茶, 仲要係大陸版…我o地個年代o既人, 緊係覺得劉華版最得, 其他咩版本都唔掂…細我o地十年o既, 又可能會覺得白面古天樂o個個版本最正…每個年代都有佢o既“經典”, 講來講去又係o個句: “情意結”呀嘛!
九點半o個套“愛情全保”, 通常都係錄o黎睇…本來睇佢宣傳時, 覺得應該會幾好睇…但係睇o左幾集又覺得普普通通啦, 可能因為我錄o左所以不停地fast forward, 無好認真咁睇, 所以睇唔到個精粹啦! 不過我都係睇到頭五集o者, 或者之後o既劇情會精彩d o既!
最可怕係又有o個個馬國明, 仲有我更怕o既江芷妮 (佢當年同mk wong一齊主持星期六下午類似“週末任你點”o既節目, 我已超唔buy佢兩個!)…江芷妮真係只可以話係一個醜版+戲屎版o既唐詩詠! 同埋點解又係佢同馬國明…新螢幕情侶呀?上次“同撈同煲”仲唔夠? 第二線呢一pair真係好唔掂!
吳美珩做番d pro o既角色依舊幾討好, 陳錦鴻都ok o既, 但佢個感覺真係太不修篇幅, 都係亞視年代o既佢討好好多 (大家可以refer to依家亞視深夜重播o既“李小龍傳”)!
同埋點解呢期鄧梓峰咁多戲做?! 阿十郎佢都係做番主持稱職d!
so far覺得全套劇唯一最得o既, 居然係佢隻主題曲囉…幾好聽! 等我睇多幾集先俾個中肯o既評論啦…你又點睇呢?
posted by 芒姐 at 11:35 下午
18 Comments:
我都覺得江芷妮同唐詩詠個樣好相似!
(我無睇呢套劇, 不便評論)
唔好睇大陸版神鵰呀, 主配角都好醜樣,
唔好睇架!
雪人,
我完全唔明點解無線要力捧江芷妮, 俾咁多戲佢做...仲有其實你偶像阿馬生, 真係sorry都要講句, 我依然覺得佢超無主角格!
andy's fan,
算啦, 相信o係大部份香港人/至少係我o地年代o既香港人, 華仔+陳玉蓮版o既神鵰係無人可以取代o既
芒姐,我想問點樣可以將d短片insert落日記啊?我見你成日都可以把youtube的短片放落日記,究竟點樣先得啊~~教教我?,十萬個唔該
傻啦, 芒姐, 我雖然欣賞馬國明的工作精神, 但我都唔覺得佢有主角格 (事實上佢話佢想做許紹雄, 有邊套戲係許紹雄做主角丫...同埋, 我覺得係而家許紹雄先咁多戲做, 哈哈)
哈哈哈...雪人, 你實在係太愛馬國明喇!
佢想做許紹雄, 但無線想捧佢做黃日華呢! 真係玩死佢!
鄧塔,
如果你係用youtube的話, 佢係超user-friendly的, 你只需要copy"embed"個字隔離條link就可以成段post落日記!
捧馬國明做黃日華? 嘩! 馬生唔該慳dd!! 試想像由馬生飾演靖哥哥, 韋樂, 虛竹, 楊五郎...既情形, 大家認為得嘛? 如果無線開套劇俾馬生做男主角, 欣宜做女主角, 我一定會捧場, 不過一定要有床上戲, 哈哈哈!
肥欣,
可能我誇張o左啦, 但我真係覺得無線有意力捧馬生走黃日華路線, 又係要佢做d懶on直o既角色...吳唱k就走梁朝偉路線囉...雖然又真係無得比!
Blog主, 其實我非常認同你0既見解(無線有意捧馬生走黃日華路線, 同時捧吳唱k走梁朝偉路線), 但係個人認為馬生個樣極度咸濕, 又黑又老, 儼如一條乾煎咸魚咁, 無記想佢接黃日華棒呢個如意算盤都幾難打得響! 吳唱k同梁朝偉就更加係無得比, 睇黎無記真係鬧小生荒, 好悲哀啊!
芒姐, 睇完肥欣的意見, 雪人只能講句「好傷心~」 :"-(
希望無線能夠完成馬國明的心願, 俾佢做許紹雄, 唔好迫佢做黃日華......
P.S. 仲有同欣宜的床上戲, 留番俾吳唱k啦, 安排曾華倩俾馬國明會適合d
gt"江芷妮同唐詩詠個樣好相似"-->非常同意! 初頭仲以為係同一個人添!但個人覺得唐詩詠靚女 d :)
oh 估唔到咁多人唔鍾意馬國明... 我覺得其實佢都幾好丫,係就係有時 d 戲誇張得滯(e.g.在《同撈同煲》入面既鄧鏡塵),但都幾得意下,幾funny~ 又,記得佢在《下一站彩虹》(http://tvcity.tvb.com/drama/dream_of_colours/story/index.html)入面做0個個勁追陳敏之既小龍,佢既痴心一片令我覺得好感動!竟然對一個咁囂張跋扈既女仔咁痴心,最後仲改變到佢改邪歸正,大團圓結局~~
我個人鍾意馬國明多過陳錦鴻?,陳錦鴻近年來唔知做乜,殘左好好好多~~~ 而且,佢同林文龍一樣,d 戲好悶,做極都只有0個幾個表情 >.<
至於大陸版神鵰,因為個個角色都唔太靚仔/靚女,令我更留意其他野.因為神鵰呢套劇大約都知劇情架啦,細心 d 留意下劇情既安排,會有驚喜!導演係有舖排過的~ 另外,我覺得男主角個樣好似馬景濤撈埋另一個男明星(未諗到係邊個, 哈);女主角個樣又太細個啦,唔似「姑姑」>.<
um...即係咁, 其實我之前都有講過o架喇...對於馬國明, 其實我相信佢本身人品應該唔差o既, 但我同意佢個樣又真係有d"煨鎖"(唔記得點寫)...可能真係因為佢早期做太多呢d角色 (最最最深刻係"律政新人王"個咸濕變態佬, 又係做陳敏之個男友, 話佢對勾爛o左絲襪o既女士有僻好), 同埋真係好無小生格(但無線又要力捧佢喎)...而且亦都無咩觀眾緣!
但既然雪人咁支持佢...我就俾面你睇佢做benz雄啦...不過可唔可以唔好曾華倩...我好buy曾華倩o架喎...佢o地真係一d都唔襯囉...
哈哈...陳錦鴻同林文龍係幾似, 兩個都係以前好靚仔, 依家...
連郭可盈都話似, 佢o地自己都係咁話!
睇多o左幾集"愛情全保"...都幾好睇喎! 不過只限陳錦鴻同吳美珩o個段...馬生同江小姐o個段真係...哎!
雖然小龍女比楊過年長, 但她出場時亦不過十八歲, 其實金庸一直把小龍女描述得像一個少女, 原著中的小龍女外型並不如陳玉蓮或李若彤般成熟(她是冷若冰霜, 但冷若冰霜的不一定是樣貌成熟), 沒有看過原著的朋友或許給電視劇誤導了。
黃曉明的確有點像馬景濤, 他的演繹太過火(這點更像馬景濤), 太歇斯底里, 對此連金庸也好像有點不滿。
這套大陸版神鵰的選角很失敗, 男的不俊, 女的不美, 尤其是童年楊過, 一副大冬瓜的樣子真叫人倒胃口!
愛情全保其實都幾好睇丫，輕輕鬆鬆咁，陳錦鴻都幾生鬼。吳美珩擔正左真係型到爆，不過講係咁講者，佢連去海洋公園都要戴黑超又誇左D，可能有眼鏡贊助啦！
另外神雕D對白好肉麻，聽到起雞皮。
神鵰真係一集都未睇過, 所以俾唔到d咩意見添!
愛情全保幾ok, 吳美珩真係好型, 做d pro角色真係無得頂! 係就係局限o左d, 但局限都好過夾硬去做"開心賓館"或者"人間蒸發"o個隻傻大姐...陳慧珊離開o左tvb之後, 呢d pro角色就全數入晒落吳美珩度啦!
發佈留言
<< Home