2007年5月21日星期一

5-21(mon) 2007 show mi鄭秀文演唱會

上個禮拜五, 去o左睇期待已久o既sammi演唱會第一場…佢唔見o左人咁耐, 又三年無開演唱會, 好明顯d觀眾個個都餓o左好耐! 本來諗住睇尾場, 不過見佢 (同埋以前o既安仔) 次次都係加完又加, 加完又加, 永遠都唔知邊場先係真正o既尾場…所以最終都係揀o左第一場算喇, 反正禮拜五個人開心d! 果然, 真係加完又加, 加完再加…好彩睇o左第一場…報紙同埋大飲茶都未報導過, 咁先有新鮮感o架嘛!

其實呢期都有d怕/厭倦寫d演唱會評/電視劇評/咩評/物評/whatever評…因為總會俾人轉貼一輪又講呢樣o個樣…好o既就少有, 一定係俾人話我好話佢o地d偶像, 又或者話咁都話好睇, 一定係收o左錢…真係好鬼麻煩! 每人都有佢自己o既喜惡, 我覺得好又唔等於你覺得好…自問我都係一個ok中肯o既人, 當然我亦都有我o既preference同埋bias o既時候…同埋每個藝人都實有佢o既好亦有佢o既唔好o架啦, 每個偶像都唔例外…但d fans又真係好少可以做到好理智…講佢偶像有d咩唔好就唔得…哎!

咁當然, 我又唔係真係太易俾人一兩句評語就影響到, 都做o左咁多年人, EQ尚可, 處理負面情緒亦有一手…加上現實生活接觸o既客人或者任何人仲蠻不講理多十倍啦, 所以其實都唔係太影響到我o既…但有時都會覺得唔知為咩?! 相信好多流量比較多o既網主都試過呢個階段…有時直頭想唔鬼寫, 已經咁煩, 仲要應埋晒d無理取鬧留言 (當然大部份都好合理, 好有禮貌o既), 因為我基本上無論你係讚我定彈我定留d咩怪comments, 我都一定唔會delete…除非你講粗口或者寫d o野太不洽當啦! 有時諗o下不如唔好要個留言版…費事煩!

算啦…我都係呻o下o者! 我都唔知點解, 忽然有感而發…其實無咩特別事件trigger到我! 好, 都係講番我個sammi演唱會先!


(我的sammi cd collection…佢係咁多個歌星之中我擁有最多cd/盒帶o既一個…可惜佢一出道o個幾餅帶唔知放o左o係邊…搵唔到添!!!)

眾所周知, 芒姐細個時的“第一個偶像”就係sammi…當然, 細個時媽咪見我仆倒去買sammi餅“holiday”, 又翻睇o左“浪族闊少爺”十萬九千次, 就問我:“鄭秀文係咪你偶像呀?”…當時o既我, 梗係唔認啦! 細個o既我係懶型懶有性格咁, 唔會話任何artist係我偶像, 最多話係欣賞o既藝人…哈哈…大個先覺得, 咁鬼執著做咩呢? 都係一句o者!

是但啦…總之係人都知,“浪族闊少爺”我睇o左十萬九千次, 每個情節都可以由尾背翻上頭再重新o翕一次…亦因為呢套劇鍾意o左克勤同sammi (雖然中途有一段時間係無咁鍾意克勤, 但依然鍾意sammi, 仲愛屋及烏埋安仔…每年勁歌總選揀歌手, 我真係會剔安仔o架…當然, 後來亦重新支持番克勤多d)!



91年播“浪族闊少爺”o個期, 正值我六年級暑假, 最開心最得閒o既時候, 睇咩都投入d! o個年亦都係sammi冒起得好快o既一個夏天, 同當時得令的男歌手李克勤 (完全無誇張) 拍第一套電視劇, 又有得同舅父波 (阮兆祥) 主持“週末任你點”, 仲有得同倪震+何婉盈做o個屆新秀司儀…o個排我覺得呢個女仔都幾叻, 口齒伶俐, 唱歌又幾好, 又幾靚女 (咁多年來, 我依然係最buy佢91年的清純形象…當然, 令佢大紅o既係後來個前衛金毛強look!)…仲有佢第二隻大碟“holiday”, 以新人o黎講都賣得幾勁, 裡面d歌亦hit o左一半…大家最熟悉o既當然係“不來的季節”, “valentino”, “情斷維也納”, “friends”等…而佢當時d歌o既特色, 就係會o翕一大段英文, d 人仲成日攞o黎笑添! 其實佢d英文, o係香港歌星之中算講得幾好 (我係指發音, 但你要佢用英文自己o翕一d o野, 佢又好似唔係太得! 不過是但啦, 都算ok o既!)

o個時有親sammi d節目都會錄o黎睇, 雜誌都會買o黎睇o下, 報紙都會keep起佢…就算無咩零用錢, 都特登走去買o左佢餅盒帶 (係繼松松姐姐o既“天涯歌女”後, 第一餅自己話要買o既帶)…後來仲好白痴地驚終有一日會聽到斷帶, 買定隻cd作後備…真係太瘋癲喇! 就係咁, sammi o既“holiday”就成為我唯一又擁有盒帶, 又擁有cd o既歌星專輯…

不過呢隻碟都真係拍得好鬼靚…個人認為靚過之後o個隻好似“嬲”住張棉枱同埋電o左個短鬈髮之後成熟o左太多o既“never too late”大碟好多!



哎, 講o左咁多唔關事o既background info, 都係講番個演唱會先啦…基本上真係幾好睇, 如果要打分, 就算唔計感情分, 都可以俾到95分!!! 幾多variety, 目不暇給, 睇得出真係有put effort去構思成個演唱會個flow…其實佢每次演唱會o係呢方面都做得幾好! 近期o係呢方面做得最唔掂o既一定係衛蘭演唱會…悶爆! 唔係淨係唱得好就得! d歌星成日話演唱會最緊要d歌唱得好…係, 但係你都要dum d心機去諗o下個舞台設計, 服裝, 化裝, 髮型各樣o既安排, 最緊要當然係由一part點flow落下一part…咁樣先係演唱會! 齋聽歌我不如買隻cd返屋企播!

今次反而係多快歌, 佢跳舞o個d部份都幾好…不過略嫌d舊歌唱得唔夠多, 尤其係我最鍾意o既華星年代歌曲…咁我都明白, 佢出o左道咁多年, 有咁多隻歌, 一半都好難唱晒…又係難揀o既! 但我作為佢最早期的fan屎, 當然希望聽到d最最最陳年的歌曲…你知啦, 九十年代, 中學的年代是最開心的…真係回憶返埋o黎! 但係d華星歌好似只係唱o左一兩首…好似“薩拉熱窩”同“其實你心裡有沒有我”(仲要係同阿jan唱, 感覺怪怪的…原來阿jan講o野真係好過唱歌好多好多, 如果佢唔係唱呢隻歌, 我都無發覺佢同安仔o係歌藝方面o既差距…哈哈! 林狗fans唔好打我!)

所以我最後悔就係唯一係無睇過sammi第一次演唱會, 因為第一次演唱會通常都係最好睇, 同埋會唱晒之前所有hit過o既歌…之後d演唱會都只係會randomly挑選一d! 哎…我都真係完全唔知點解我會無睇到96年佢個nike眉演唱會? 真係終身抱憾! 所以之後都好肉痛地用三百大元o係信和買o左呢個演唱會o既ld番屋企睇…真係好少可咁捨得…之後亦都無買過任何呢d ld咯!

又可能因為呢次o既遺憾, 令我兩年後入大學就開始我o既瘋狂睇演唱會年代…幾乎一個月去兩次紅館, 咩演唱會都唔會放過!


(我最喜歡呢個時期的sammi…)

同埋可能因為幾乎sammi每一隻歌我識晒, 尤其係舊o個d, 所以睇呢個演唱會都會好有共鳴! 唯一美中不足係臨完場前贊助商送珠寶o個part勁悶…搵一個fans上台唱歌仲唔夠, 要搞成三個, 真係太耐喇…可能係俾贊助商逼o既…不過阿贊助商你應該明白, 其實咁反而會有反效果! 應該考慮就咁抽完影張相送o左佢就算喇!

同埋某d時候,d fans真係瘋狂得滯, 太嘈, 嘈到直頭聽唔到sammi講咩…你o地為偶像好, 應該控制o下自己…適當時候先哎啦! 同埋最後個encore位都有d尷尬…事關香港演唱會個practice係預o左你有一part encore, 咁有個reasonable expectation, 忽然無d人又真係會鼓譟o既,仲要係一玩完珠寶o個part唱多一隻歌就完, 呢個安排有d失策! 咪求其預最尾o個part扮encore囉, 好過第一日咁leh heh開晒燈d人又唔肯走, 終於要再走出o黎唱隻 “我們的主題曲”但又唔記得歌詞…有d尷尬! 應該調一調d項目可能會好d!


(88年新秀的sammi)

好彩我係去第一場, 有阿jan做嘉賓都幾爆笑…好過張敬軒同王菀之 (雖然呢兩位朋友我都ok, 但佢o地好似同sammi太唔“啦間”喇…), 佢話林生應該開套“東亞風暴”, 由sammi同千嬅分別飾演大細契, hocc做莉姨, 得得地就搵黎明做, 反正佢平時都 “得得地”…哈哈哈! 勁賤!!!

13 Comments:

Anonymous 匿名 said...

得得地就搵黎明做, 反正佢平時都 “得得地”…哈哈哈! 勁賤!!!


唔明, 黎明平時點“得得地”呀? 咩“得得地”呀?

12:33 上午  
Anonymous 匿名 said...

有時寫評論的確係幾麻煩,個個都講晒好説話fans當然開心啦,不過其他讀者就唔鍾意o甘無性格o既評論喇!仲有啊,其實d fans都鍾意睇到講其他偶像o既壞話,o甘先對比到自己偶像好。

12:49 上午  
Blogger 芒姐 said...

sum,

的確係, 基本上講咩都係唔o岩o既...唯有我有我寫, 你有你鬧囉...!

10:59 上午  
Blogger 芒姐 said...

匿名,

表面上"得得地"係指"很不錯", 不過暗裡的意思其實係話佢都"低低地"呀...

11:00 上午  
Blogger Esaltato said...

哎呀芒姐, 我都係睇第一場呀...真係好鬼正。如果個個睇第一場既都係sammi十年八載既fans,應該仲正。事關成場我都係度又叫又唱,我隔離0個對情侶好含蓄咁坐係度又唔吹支棒又唔叫,好尷尬。不過最感動係到差唔多中後段,佢地都被成個氣氛打敗都開始叫sammi...哈哈哈。今次真係好有氣氛,個個都企哂係度un同唱,好鬼hi。
佢最尾唱我們的主題曲都ok啦,雖然真係唔記得歌詞,起碼fans又一齊唱,呢d氣氛好過景福d互動環節囉。不過第2場開始就冇左encore,好怪呀。其實concert冇理由唔預encore位架喎(睇第一場就有眼福囉A_A")。佢又要睇下隊BAND識彈D乜。
雖然今次好似冇乜THEME,而D衫又唔係咁製造到話題,不過都覺得今次係最好既一個演唱會。我覺得佢頭半PART係好怨婦FEEL,之後就豁然開朗咁。總之唔睇就走寶啦。
最開心係佢唱[唉聲嘆氣],最失望係佢冇唱[上一次流淚]同[心肝命掟]...
我都大拿拿用左300大元買左盒BOX SET啊...

-->不過之後又請左IVANA佢地,原來都唔識既,點解會請呢D嘉賓架? 又冇何韻詩喎。同SAMMI熟0個班FRIEND就冇,唔識0個D就一籮籮。

12:20 上午  
Blogger 芒姐 said...

Esaltato,

係啦, 除O左第一場有阿JAN, 星期四有HOCC (有呀有呀, 佢個BLOG登O左)...但係其他O個D王菀之, 衛詩, 鄭融, AT17都十分九唔搭八, 直頭好似話係第一次見...好彩佢都有叫台下嘉賓上台唱歌...睇報紙話楊千嬅O個日都幾搞笑, 細契千FA仲問洗唔洗唱"溏心風暴"...可惜我無睇O個場啦!

2:36 上午  
Blogger Essing said...

d收藏真係好珍貴

我都有睇第一場wor

特地從內地飛過去,唔睇真係遺憾終生

7:35 下午  
Anonymous 匿名 said...

really nice concert i love her power. i also wrote the concert in my blog. Please take a look if u free.
http://arohamibo.wordpress.com/2007/05/21/%e4%bb%a4%e4%ba%ba%e5%bf%98%e6%87%b7-sammi-%e6%bc%94%e5%94%b1%e6%9c%83/

6:42 下午  
Blogger 芒姐 said...

Essing,

嘩! 特地從內地飛來, 好有心喎!

4:20 上午  
Blogger 芒姐 said...

A-r-O-h-a_mibo,

看了你的BLOG, 唔錯呀, 寫得好好.

4:35 上午  
Anonymous 匿名 said...

For your information, Ivana composed a song for Sammi few years back.

戀上你的床 (Movie theme song)

曲:王苑之
詞:林嘉恆
編:James Ting

戀上 戀戀這個被窩
就是多相戀都不可以給我麼
這睡床可給你我探戈
你與我的小小世界就像玩拔河
床上誰共我在錯摸
床下誰共我在切磋

from Disc 1 Sammi ge 床完全擁有[新曲+精選] CD Released on 6/26/2003

I thought Sammi's Show Mi concert was awesome.

The main theme of the concert is to show off what Sammi wants us to see about her. The stage design (big cross) tells you that she cares for her religion. "I will follow him" is the main point which Sammi wanted to show us. The Fashion show showed us that Mi is trendy and always ahead of others in fashion sense.

Also, she showed us her paintings, her feelings about her family. Her heartfelt letter in the last concert is a gem!

I flew from USA to see Sammi Concert too.

3:46 上午  
Blogger Kelvin Chong said...

我唸 .... 我同芒姐你 ... 差唔多大 ...
一樣咁鐘意Sammi, 同90年代的香港樂壇,一樣鐘意叫隻碟既正式名,e.g."快樂迷宮"、"Holiday",最搞笑同你一樣,咁鐘意睇"浪族闊少爺"同一樣有Holiday的CD+盒帶!
Never Too Late係近年再以$90高價買番新淨二手的!
"sammi"隻碟個粒珠,你有冇唔見到呀??

重有你有冇買"十誡"限量版呀?? 我冇呀,佢出左普通版,先出限量,我又窮 .... 好乞人憎呀~~

"其後"隻碟,我走左出TST HMV 簽名會架!

Concert我反而睇得晒!唔知你有冇印象,Sammi同幾個外國單位(有All-4-One)開過一個 "鑽石台"的演唱會,係之後一直冇出過任何product的!

有機會真係要一班華星時代的fans出來聚呀!

Kelvin C.

3:42 下午  
Blogger 芒姐 said...

Kelvin C.,

當然好啦...就快有個咩"我們的華星年代",你會唔會去睇呀? (雖然應該完全唔係o個回事...)

其實我唔係隻隻碟都有買晒...我都係"holiday"先開始買...

11:23 上午  

發佈留言

<< Home