5-7(thurs) 老婆大人(II)
睇o左幾集“老婆大人(II)”…ok喎, 幾好睇! 即係同一般o個d“一年一度”法庭劇差唔多, 唔會特別差, 但又唔係特別好…一貫水準啦!
不過最大問題係原來上一輯已經係4年前o既事, 除o左宣萱同陳錦鴻, 我幾乎其他全部角色都唔記得晒喇…鄧patrick同李詩韻做咩角色我唔記得 (淨係記得佢o地兩個好似因為呢套劇而一齊o左), 陳錦鴻有兩個妹我唔記得, 連李思捷個角色我都唔記得…可見呢套劇o係我心目中幾咁重要! 又或者我的老人痴呆提早到來…!
咁唯有去翻查番資料溫故知新啦…原來唐詩詠o係上一輯係王傑女友? 李思捷個女友係袁彩雲…真係一d印象都無! 咁陳錦鴻上一輯係做咩職業? 已經係開it公司o架啦咩?! 真係要引用“刑偵”阿車匙o個句: “大勇…我真係咩都唔記得~~~”!
邊有兩輯相隔咁耐先拍o架? 打鐵要趁熱嘛! 仲要係用番相同人物角色…但可惜d劇情同人物關係, 我已經唔記得晒lu lu lu lu lu~~~:p
Oh, 睇番資料, 原來“老婆大人”當年係”倉底貨”嗎?!?!?! 因為深夜o既“創世紀熱潮”令陳錦鴻再次大熱而“重出生天”...係真唔係呀? 唔睇番都唔記得添噃!
另外, 見到姚嘉妮同林祖輝生o左個b女, 好可愛…同埋佢真係好幸福咁! 一向都覺得姚嘉妮做戲幾好, 同埋成個形象都幾討好…我幾buy佢! 佢係少有形象比較正面同踏實o既藝人, 但講o野又有紋有路唔算係悶爆o個隻…唔錯!
posted by 芒姐 at 12:43 上午
11 Comments:
咁"真係咩都唔記得"既芒姐記唔記得邊個飾演陳錦鴻爸爸呢？
係
盧海鵬呀！！哈哈
呢個續集真係拖得太耐喇，我已經唔記得唐詩詠係陳錦鴻個妹.. 而盧海鵬同袁彩雲都離開左TVB lu..
不過我幾鍾意佢片尾播返d NG段 :)
同埋呢片尾宣萱講法律野令我諗起珠光寶氣果時片尾出既黎姿 -_- 宣萱要講既又長又多但都冇黎姿講到咁窒咁慢咁呆哈哈:P
睇左頭幾集, 我覺得暫時黎講節奏去得幾明快, 宣萱真係好o岩做專業人士, 講一大段野, 真係覺得佢好pro又唔悶! 突然醒起當年佢同羅家良做o個套流金歲月, 有幾場對話又係好精彩的!
不過呢個續集真係太耐勒.....完全冇諗過會有續集出黎!
我連佢地當年有個仔都唔記得! 只係記得係邊兩個做主角!
之後會有滕麗明, 都OK期待, 最衰冇綠葉王, 如果唔係就perfect!
楼上讲既“绿叶王”系特指某个人既称号定系呢类型既演员？我觉得benz雄都几算绿叶王啊
——可人儿
O...講得唔係太清楚TIM!
我所講的綠葉王係...郭政鴻!
係我眼中, benz雄已經Cult名星!
請問佢條褲係唔係吊腳? 點解咁出事架?
http://hk.news.yahoo.com/article/090426/3/bvg4.html
呢件衫又想點? 好似口水肩呀!
http://hk.news.yahoo.com/article/090510/3/c3rr.html
haha，唔止件衫似口水肩，當晚佢條褲仲似足一條童裝褲，好騎呢！
點解咁出事,
我同意呢身打扮又真係奇怪o左少少...其實好怕男士著三/四個骨或者吊腳褲, 偏偏佢同阿唱k呢期唔知搞咩成日著...? 其實簡簡單單就是美...
b.,
滕麗明呢期唔知點解成日做同一隻角色, 即係"桌球"/"野蠻奶奶"或者呢套o個重角色...?
係啦, 我都以為佢o地係呢集先有仔添!
宣萱做專業人士真係最適合, 同陳慧珊個case一樣, 但佢一做番老婆個身份就有d怪...我都好懷念佢同撈家套"流金歲月"...
christy,
雖然我"真係咩都唔記得"...但我又真係唯一記得佢老豆係盧海鵬...因我記得佢同宣萱各不相讓的場口...但除o左咁, 我連十三公都唔記得喇...
咁宣萱又真係不能同黎姿比o既 (我指口齒伶俐程度)...同埋黎姿平時做戲都無咁差, 係o係"珠光寶氣"片尾對住稿讀o個度, 真係未見過人可以甩cut...
唔係喎, 除左主角我又記得十三公同袁彩雲喎! 因為當時結局話佢地結婚去"布吉"度蜜月, 但係後尾原來係深圳布吉唔係泰國布吉, 搞到結唔成!!笑O左我好耐下....
發佈留言
<< Home