3-28(tues) 緣份

前日錄o左哥哥+曼玉+梅姐套經典戲“緣份”o黎睇…雖然已經有vcd, 但o係電視睇又別有一番風味 (我就係咁奇怪o架喇!)!

劇情確係不敢恭維, 你可以想像o個隻無無聊聊, 再加埋臨尾o個場好笑到極o既地?“緣份遊戲”, 真係一邊睇一邊笑! 不過唔好話喎…係就係老套又無聊, 但又吸引到我坐o係度睇晒成場! 我仲聽到有其他朋友話佢都無啦啦被呢套戲吸引o左, 居然禮拜日下午流流坐o左o係度睇“緣份”!

劇情可笑, 但d人的確係吸引…齋睇人已經值回票價! 梅姐做番一貫佢鍾意人, 人o地唔鍾意佢o既角色…最尾佢仲要“手禁”o左個地鐵緊急掣去截停情敵曼玉, 幫哥哥手玩個“緣份遊戲”!

個“緣份遊戲”又係頂癮o既, 差不多後面1/4集都o係度搭地鐵玩呢個無聊遊戲…好彩有隻歌伴住, 當睇mv囉! 以前一路都唔太喜歡呢隻“緣份”, 因為感覺拖得太長…嘩! o個句“你我相隔多麼遠…”真係拖得好遠! 不過近年聽聽o下又覺得好聽o左, 同埋配埋d片段亦都順耳o左!

而一開場戴蘊慧唱o個隻輕快主題曲都幾好聽, 唔知叫咩名呢? 其實佢兩姐妹唱歌都ok, 但不得不講多次, 佢o地全家個形象已經掃o左地, 好心唔好出o黎講咁多o野啦!

成套戲個感覺有d似十幾年後o既“初戀無限touch”, 又係劇情-wise無聊到極, 但係就有種好fresh, 好cute o既感覺…得閒睇o下輕鬆o下都幾ok! 不過我唔明點解曼玉無啦啦又會鍾意番個湯鎮宗…同埋湯鎮宗究竟係湯鎮業細佬定阿哥? 我又唔記得o左!

原來呢套戲係邵逸夫同方逸華o既作品, 果然係八十年代的經典! 最高興係可以睇番八十年代o既景色…地鐵個setting呀, 綠色底橙色橫間o既樂富站呀, 寫住4蚊一程o既售票機呀, 仲有久違了o既儲值車票…oh, 仲有張國榮約張曼玉去碧麗宮睇戲…即係依家o既世貿 (原來當時個門口都係寫住“world trade center”)!

寫完呢篇, 睇番三年前睇完“緣份”o既觀後感…原來三年o黎, 我都無咩點變!

唔知大家有無睇過呢期網上流傳o既alive反目片段? 前幾日有個朋友send左俾我…嘩! 笑爆咀! 好笑在假到爆囉…個個表情+對白都極度浮誇, 我真係好懷疑係佢o地自己做出o黎宣傳o既! 仲要係演技勁唔掂o個隻! 最好笑係睇呢段片之前個friend已經o係我o地面前傳神地演繹o左一次呢個片段, 真係每個細節都無遺漏…我一邊睇, 一邊諗起佢個樣同埋語氣…真係笑死我!

以前吳彥祖係香港第一型男, 但近年已經勁跌watt, 再同o個三位本來都算係型男o既friend (supposedly好型o既陳子聰, 唔知點解變o左個波?!) 組成o左呢個超齡+勁out boy band… alive, 即刻感覺cheap晒! 你唱歌又唔係好聽, 做咩要做歌星? 仲要係一班三十過外o既阿叔o係海灘走boyz都嫌太young o既 “夏季sha la la”路線…真係想點呀?

吳彥祖假到爆o既“好x錯”粗口片段

剛剛睇到電視廣告…“挑戰”真係出o左vcd/dvd喇, 好tempted去買番隻添! 除o左阿翁, 當時o既陳敏兒都真係幾靚!

仲有, 經過hmv又見到八十年代經典電影“失業生”出o左dvd, 係“喝采”三劍俠-陳百強, 張國榮, 鍾保羅原班人馬之作…呢個group真係邪中邪, 三人都英年早逝, 仲有少少“死於非命”o個隻…但係三個其實都係好掂o個種! 雖然三個都好吸引, 但我居然最想睇係鍾保羅…因為不嬲都好buy佢…當年o既 “金牌司儀”接班人, 同埋之後睇到重播o既“IQ成熟時”…都係好得!

個女主角好似叫徐杰, 都幾靚女, 但只係o係o個段時間見到佢o既蹤影, 之後幾年已經唔見o左…個style仲有d似翁靜晶! 如果我無記錯, 佢好似係“彩雲曲”o既主角?!