4-19(wed) 高朋滿座
睇o左幾集“高朋滿座”, 依然唔覺得特別好睇…不過可能處境劇要慢慢浸, 是但啦! 唯一係覺得喬寶寶真係做得幾好…完全唔似一個新人囉!
另外o個兩個新人鄧上文同鍾煌都做得唔差…但係唔知點解網上o既評論一致係讚鍾煌 (即係做高B o個個o靚妹…好似話其實佢已經做過幾年話劇, 所以都唔算新人! 咁同樣地鄧上文廿年來都跟住鄧英敏出席大小tvb show, 仲有拍過套“仙樂飄飄”, 嚴格o黎講都唔算係全新人o既), 踩鄧上文, 佢o既演繹可能係誇d, 但都算ok呀…個樣係唔算太靚 (係“最上鏡小姐”呢個名銜害o左佢), 但都唔差呀…唔通有個“出名”d o既老豆真係罪?! 人o地都唔想o架…佢都唔算太靠父蔭o者…點解唔可以對佢公平d?! (無錯, 我真係ok buy佢o既!)
又搵到一篇幾精彩o既訪問…係關於呢套劇o既二佬曹永廉 (不過佢o係呢套劇o既發揮真係完唔及 “妙手仁心”o既chris!).其實舊年播“妙手3”時都已經講過佢 (尤其係俾佢自爆41歲嚇親!), 不過呢篇訪問係幾有血有肉o既一篇, 所以都要post出o黎同大家分享o下! (好似係出自“壹周刊”)
曹永廉出過o既碟+唱過o既歌一覽:
http://hk.geocities.com/yccchichi/Chou.htm
----------------------------------------------------------------------------------------
40小男人 - 曹永廉
曹永廉九四年新人獎,本記者九三年入行,滿以為年紀相若,他劈頭嚇我一跳:「如果你不寫我告訴你,四十一了,平時自報六九年出世……」[芒按: 點解o係呢一刻先無啦啦自爆…其實會唔會反而係想搏宣傳?]
幾反映當事人性格,不是沒計算過,但永遠心直口快。
做過清潔工、貨櫃搬運,尤其行過街(sales)的曹永廉懂得計:TVB當然知道他實齡,但揚開去,四十一歲才憑一套《妙手仁心Ⅲ》up&coming,叫公司怎花時間捧你上一線?
我安慰他:「有沒有想過,坦白出來會更有血有肉?」
曹永廉明白我意思,他的故事不是花仔一朝得志,是中年漢子掙扎求存。
我繼續說:「說不定,知道你真實年齡後,補品、護膚品的廣告也隨之而來呢。」
仍像個少年版張健(至少頭髮濃密)的曹永廉烏溜溜眼睛急轉,一咬牙:「對!你照寫出來吧。」
廿多年事業浮沉,死守過扮年青偶像歌手此路不通,不容有失,但也不容他不搏一搏。
輪到記者要諗。一時還未消化,本來預備問曹永廉怎樣演好劇裡與邵美琪的姐弟戀,突然屈指一算,姐鬼姐馬咩?
又例如,行內因樣貌相似,戲稱林文龍(老大)、陳錦鴻(老二)和曹永廉(老三)為三兄弟——其實呢,三弟才最老。
於是我開始明白:遲遲未得志的,自認細佬,不失為生存之道。
比較愜意是,曹永廉有個威水未來外父姜大,他和影帝女兒姜依蘭同居,像《妙手仁心Ⅲ》劇情,女方家境事業統統蓋過曹醫生。
但偏偏,曹醫生角色最受歡迎。大氣候陰盛陽衰,林保怡扮大情人睇到悶,吳啟華扮大仁大義搵鬼信;今期,小男人突圍。
永廉
九四年處女唱片,九九年入無,唱歌不順轉戰拍劇,十年八年熬出點瞄頭,個案像馬浚偉、鄭嘉穎,都不算遲;怪只怪曹永廉卅字頭才入行,人家有時間浸,他就尷尷尬尬。
但又怪不得他。曹父本經營假髮生意,行業式微錯過出貨時機,賣樓填數搬到木屋區,一家六口的願望彷彿反映在三子的名字上——「永」遠有間「廉」租屋住就好了。[芒按: 哈哈哈哈哈!]
所以曹永廉一早輟學打工。「後來學人做歌手,仍迷信華麗包裝,老細教落,過往的辛酸,像做車房、搬運,不能向傳媒講。」
能夠公開的履歷也談不上威水——推銷胸圍底褲。「哺乳圍點用都要學,女仔好肯教我。如果話今次討人歡喜的小男人角色演得好,婆性格,可能那時已形成。」
每日上午見客,下午等運到去卡拉OK,同事幫他報名葵青區工業安全歌唱比賽(其實不明白工業安全點解關唱歌事),被經理人睇中,叫學先,便轉行幫何寶生、梁詠琳衫袋(連服侍的歌手也三四線),兩年後才正式出碟。
那時他外號「廉記」,fansclub叫「廉記歌署」,不脫草根味。「這個名至少讓人知道,我好想唱歌。」[接按: “廉記歌署”呢個名實在好好笑…我唔知佢有個咁o既fan club名…估唔到d fan club名真係有度過喎…好似 “千嬅群英會”o個d我覺得係改得比較好! 咁“華仔天地”, “黎明fun舍” (係咪咁寫?)簡單得來都唔錯…總好過全部都叫“xx歌迷會”…唔知仲有d咩趣緻o既fan club名呢?]
曹永廉的音樂世界,亦限於齋唱而已。欠一個有錢老豆,唱片公司找來Bclass作曲Bclass填詞,自然別期望神話。怪他不爭氣做不成創作歌手嗎?那個年頭那種家境,窮小子根本沒錢沒時間自幼學鋼琴備受薰陶。
講到尾都係睇食飯。
「你說我發明星夢?十幾歲時拍拖,女朋友去外國讀書,我做清潔工,不想將來距離太遠,於是轉去做百佳,希望有朝一日搬貨都叫副經理。結果女朋友在那邊識了第二個,但這想法一直影響我:求變,你話我好高騖遠;但踏踏實實,還不是又企度?」
黑雨
最失意的日子,唱片無得再出,兩日隊一樽威士忌來消愁。九七年年尾黑色暴雨,曹永廉駕二手日產車仔,心想過幾天賣它八千元套現算了,養不起——突然,連人帶車跌進路邊大水。
「事後我懷疑有人靠害,警告牌故意放歪了,旁邊有輛拖車在守候,好像等做生意。我無辦法焗住幫襯,名副其實整個等你踩,車也賣不成了。
「拖車司機去工具,剩下我一個,雨一直下,部日產開始入水,我一邊推車一邊哭爆粗口鬧個天。
「不過我都安慰自己,衰到貼地,無得再跌,勢必反彈。」
![]( http://i8.photobucket.com/albums/a45/monjeh/0507hh03-magcho.jpg)
三弟
衰到貼地,無得再跌,勢必反彈。
反彈沒馬上發生,但總可鑽營。九九年起,曹永廉開始在TVB劇集穿插。「做歌手主要收入花在買衫,牛記笠記無人睬你,咬實牙關去一次Joyce,即刻有阿哥阿姐來傾偈:『喂我都有一件唔同色。』但我買得起幾多次?電視台好,人人打份工,多勞多得,穿的是戲服,各師各法。」
這是一個沒有英雄沒有偶像的當世。八十年代睇《英雄本色》,曹永廉有樣學樣做車房仔鬧事打架;九十年代流行四大天王,他也走過情歌王子路線。到現在《妙手仁心Ⅲ》,形勢上,吳啟華、林保怡一定是主角,大仁大義大情人嘛,但狹縫中的小男人向眾仁醫生,或者也有一線生機。曹永廉懂得計:「這種位勝在無人同我爭。」
邵美琪是好拍檔,鄭伊健(邵前男友)一樣是他口中的好朋友——世界仔?是呀,不能不是。
「Maggie見我無錢買衫,送過一條領呔給我,永遠感激她。」
甚至娛記開玩笑林文龍做他大哥,陳錦鴻做他二哥。「明明我年紀最大,不過他們成績好過我,認做三弟無蝕底,應該慶幸個樣仲呃得人。」
摸清曹永廉底細的同事不可能視他如後進來扶掖。「我好在與上了位的也傾到心事,不會當我小朋友,但我又無殺傷力。在無,小生花旦睇一個綠葉不順眼,可以提議換人,真有其事,我就無人提防。
「但我始終不是自己人(包薪演員),今次執到個靚位,下一套演警察,能不能再彈出?不知道……」
女婿
比較穩定的是,與姜大衛女兒拍拖三年,夾錢租屋同居也兩年了。姜依蘭任職PhilipMorris市場部,像戲裡向醫生不會妒忌老婆叻,曹永廉坦言女友賺錢多過亦使錢多過自己。
姜依蘭來自演藝世家,和藝人子弟熟稔。曹永廉跟洪天明(洪金寶兒子)做她麻雀腳,飲飲酒談談心,就撻。
以前,曹永廉信服偶像不能公開戀情這誡條;偶像當不成,難得現在冒起,不敢再收收埋埋。「最近有週刊叫我『夾』偷拍古仔,我知道要珍惜這種機會,但要我特登被影到同居生活,大眾對此最有興趣,我就不肯。男人在外面怎樣掙扎求存都好,無理由利用埋女朋友,我們真係俾你偷拍到又一回事。
「有個明星未來外父——不能不認未來外父,已同人女兒同居,唔認豈不衰仔?起初也有壓力,唉我這幾十歲的二打六……相處下來,uncle好好人,時移勢易,任我做到一線小生也不可能去番他那種亞洲影帝。再者,其實大家都要各自搵食。」
曹永廉仍叫秦沛(姜大衛兄長)Paul哥;對爾冬陞(姜大弟弟)則跟女友叫叔叔。試過客串爾導演的《早熟》,群戲而已;唯一到的數,是買純萬寶路一條二百九(PhilipMorris員工價),平卅蚊。
「她大學畢業,英文又好(加拿大籍),我只有靠人生經驗搭夠。依蘭都三十了,媽咪(李琳琳)催結婚,體諒說平有平搞,但女家有頭有面,香港、溫哥華都要擺酒,我的目標是一兩年之內……」
娛樂版影到兩口子揀樓,西貢海邊屋仔,二百三十萬,曹永廉自揭「睇」,他只負擔到百六、七萬。
戰衣
曹永廉說,入行以來,養車俾家用,正職收入從不敷支,靠搵外快接show。「人家仔就話一齊食飯邊個紅邊個請;我同佘詩曼食都夾番錢或者一人出一次,幾十歲男人,唔好意思嘛。」
截至○一年才還清歷來累積十萬元的信用咭利疊利數,今後未必就此飛黃騰達,只希望平平穩穩儲到錢。
這天披上醫生袍拍照,曹永廉喃喃說:「拍到第三輯,應該不會有第四輯。我喜歡穿它,每次都彷彿有把聲音說:『機會又來了……』」
躍羊
女同事說,曹永廉與邵美琪演夫妻,邵懷了唐氏綜合症胎兒,曹的溫柔體諒,好窩心。
我欣賞,因為感同身受。兩年前太太懷孕,同樣驗出很有可能患上此病,冒流產風險抽羊水檢查,作為丈夫作為爸爸的心情,曹永廉演活了。
聽完我的經歷,曹永廉沒有例牌式拍膊頭,也沒交淺言深追問,但接下來的談話,他就是未笑過。看得出,真心的。他所說在這行贏不了什麼至少贏到友情,並非虛語。
是我不好,遲了告知曹永廉,小兒後來大步躍過羊水檢查,目前健健康康蹦蹦跳跳,所以,起名叫「躍羊」……
6 Comments:
我都覺得鄧上文ok, 上年佢拎o左個"最上鏡小姐"獎之後, 好多人o係網上踩佢, 話佢又黑又大口, 又話佢靠老豆先有獎... 其實佢都唔係咁差o者, 咁佢係無張曼玉、李嘉欣咁靚, 但都未至於好差o丫; 同埋, 斷估鄧英敏都未至於勁到可以幫個女爭取到"最上鏡小姐"名衙o卦, 佢又唔係肥肥。鄧上文做戲都算係咁啦, 成個人overall都幾ok, 至少佢o係各方面都比葉翠翠出色o丫!
我都鍾意鄧上文多過葉翠翠喎, 我幾鍾意鄧上文個樣, 好親切, 幾靚呀 (雖然我只係睇過一集, 但我就鍾意鄧上文多過高b)
篇曹永廉訪問好好睇, 估唔到佢已經四十有一, 佢個樣真係好young
係呀, 舊年咁多個港姐中, 我最buy係鄧上文呢個小妹妹...可能因為由細睇到佢大...佢做戲+唱歌都幾好, 個樣都唔差呀(可能唔係最上鏡o者...我記得睇過篇評論, 話如果佢都可以係最上鏡小姐, 咁笑容同出一轍o既english tang都應該可以係最上鏡先生...哈哈哈!)...另外亞軍陸詩韻同拍過初戀無限touch做東東個妹o既袁彌明都ok...葉翠翠就真係唔該晒喇!
我都覺得鄧英敏無咁勁可以幫到佢個女拿最上鏡小姐...欣宜就唔同!
哈哈...曹永廉真係點睇都唔似呢個年紀...今年應該四十有二添喇...真係keep得好!
鄧上文唔係擰最上鏡小姐既話,唔會咁令人反感既.....季軍/國際親善小姐都冇咁有殺傷力....
上面個留言係「雪人」, 唔係 wingwing, 哎呀, 唔知點解落左wingwing :-p
mon jeh & friends,
Here is a 6 minutes trailer of 火舞黃沙. Dunno whether TVB has released it in HK.
http://www.nakido.com/?n=/21BBDF24E3F8B5A4BFDDB30C54CA8645EB00CD96/%C2%A4%C3%B5%C2%BBR%C2%B6%C3%80%C2%A8F%C2%A4%C3%B9.rmvb&size=21974757
發佈留言
<< Home