4-15(sat) 我的兒童節目
雖然我係一個“少年早熟”o既小朋友, 但我都會睇卡通片, 更加會睇兒童節目…仲要係愈大愈睇得多, “少年早熟”o既小朋友大個o左反而“返老還童”!
最應該睇兒童節目o既階段應該係“430穿梭機”, 但我反而睇得最少…到“閃電傳真機”就係我睇得最多o既年代…而最估唔到o既係到“至net小人類”年代, 我有時都仲有睇, 讀大學時偶然都會錄幾集兒童節目睇o下…因為成日會有d舊兒歌/舊片段回顧…最鍾意睇呢d! even“放學icu”我都睇過幾集o架…不過d主持人同小演員都已經唔多吸引喇! 以前o既“430”或者“閃電”直頭係一個年青版o既“EYT”, d扮o野環節都幾精彩, 所以d兒童節目主持個個d戲都唔錯, 受過訓練出到戲劇組都完全無問題…除o左做o左廿年o既譚玉瑛姐姐一路都要留o係度 (不過佢都拍過“律政新人王”呀!)
o係我d珍藏中, 又搵到幾段不同年代o既兒童節目片頭…o黎一個經典兒童節目主題曲回顧:
八十年代初至中期…“430穿梭機”!!! 呢個片頭應該係八十年代中後期o既片頭, 我都有印象睇過…d小演員同d環節我都記得d…哈哈! 最精彩係最尾o個幕鄭伊健同佢舊情人芷珊姐姐共舞啊!
到1989年轉o左名叫“閃電傳真機”, 由元老級o既譚玉瑛姐姐同埋舊主持芷珊姐姐帶住一班新主持阿jay姐姐, 麥包哥哥, ben哥哥 (黃智賢呀!) 同埋駱俊文哥哥…當然之後就不停咁換主持啦, 不過譚玉瑛姐姐依然地位不變!
呢個節目我睇得最多喇, 直頭由第一集開始已經有睇, 所以最有感情! 呢個片頭唔知係咪第一代呢? 我都唔記得! 但係佢o地拿住o個“舊”道具“閃電”o係度接力我就好有印象…而克勤呢隻親自填詞o既主題曲亦都記憶猶新…我記得佢o個時話過因為填o左呢個長壽節目隻主題曲, 所以年年都有版稅收, 都不知幾和味! 雖然我個人認為“430”隻主題曲好聽d囉!
以下呢段唔係主題曲, 而係九十年代尾o既“閃電傳真機”?面一個環節…o個時我都好大個o下, 但唔知點解反而鍾意睇番兒童節目…尤其呢個“咕啦咕啦開心樂園”環節o個段又唱又跳o既主題曲, 都幾趣怪o下…好開心好得意…直頭想跟埋一齊跳! 特別要留意呢一集係由當年仲係做緊兒童節目o既patrick哥哥 (鄧健泓) 同佢當時個女友lulu姐姐 (蓋世寶) 主持…佢仲要跳得超落力…扭晒腰咁! 後來佢o地分o左手之後仲爆出o左話唔知係男打女定女打男o既傳聞添…所以佢o地依家再見不是朋友!
有讀者留言要求我post馮曉文幅相…本來想搵o下沖天小子o既劇照, 等大家睇o下搵佢做萬人迷女主角有幾咁嚇人! 但係search極都唔覺有…最詳盡o既馮曉文資料都算係銀姐姐o既“我們的老友記”…第三位就係馮曉文喇!
posted by 芒姐 at 1:41 上午
17 Comments:
哦 mon jeh
謝謝你post馮曉文的照片，解開了我的疑團！
唔洗客氣...你話搵佢做女主角係咪錯晒先?
可惜搵唔到佢o係"沖天小子"個look!
Log on to "http://www.grasshopperhk.com", and go to "影視台", then drag downwards until you see "電視連續劇集", under which you'll find "沖天小子". Click on the image to enjoy a snippet of the theme song "三分鐘放縱" (mind that it's just the 片頭 of the drama and not their MV).
It came out a bit blurred, though.
哈哈...sandy! 多謝你! 我睇到個mv喇...咁馮曉文當時又無我印象中咁樣衰喎! 但係我依然堅持佢不能個o個個萬人迷角色...女主角真係呢套劇o既最大敗筆...究竟當年點會搵佢同埋唐韋琪姐姐呢? 無其他女歌星咩? 劉小慧, 黎瑞恩, even湯記都好少少! 但係d男主角個個都ok掂o架喎...點選角o架?
馮小姐另一個我記得的角色是千歲情人王菲的跟班~ 另, TBB 收費TV播'中四丁班', 同埋原來'浪闊'有林家棟做李克勤豬狗朋友~!
oh...做咩播埋晒咁多人o地想睇o既戲o架!
"浪族"咁快就做緊啦? 聽你咁講似乎已經做得第5,6集咁? 無錯, 林家棟做tommy呀嘛...到蔣傑同佢老豆反目後佢會背棄佢! 當時已經對林家楝有好深刻印象...因為佢真係一個"一線茄喱啡"...幾乎套套戲都有佢! 同埋佢個樣真係太茄喱啡, 之後做o左主角好唔襯佢!
而家「新電視」兒童台的《夢幻樂園》,會係卡通片同卡通片之間播返?以前閃電傳真機的片段。你有冇聽過呢??
lilith
有時睇到, 成日見到譚偉權, 反而少見 ben 哥哥同文哥哥 :P
我都係睇舊劇好D~
芒姐
前年睇'我本善良'都記得有林家棟, 仲有林韋辰丫!
咁精彩? 估唔到舊"閃電"片段都有得睇喎? 咁第二d台會唔會有舊eyt片段播番? 可惜我無新電視啦...
十二隻恐龍去野餐o既譚偉權哥哥? 都係麥包哥哥, jay姐姐, 芷珊姐姐o個d更有共鳴...要睇ben哥哥, 唯有睇"鐵血保鏢"囉...
"我本善良"有印象有林韋辰, 但唔記得佢做咩角色喇...林家棟就無咩印象! 除o左"浪族", 我好記得佢o係"龍的天空"又係做茄喱啡, 好似係黎姿d同學仔! 仲有古巨基都係做林文龍同學仔!
林韋辰唔知做邊個收數佬跟班, 林家棟就響桌球室度做!
龍的天空, 最記得吳鎮宇踩單車出街跌倒狂哭! 勁~
最近'tea'雜誌又有介紹兒童節目 (上次提過), 你搵下黎睇啦~
林韋辰最深刻係o係"大時代"做stock exchange d人...係之後重播睇到先知(因為以前一路以為佢一出身就o係亞視...所以驚訝o左兩下)!
"龍的天空, 最記得吳鎮宇踩單車出街跌倒狂哭! 勁~"...點解一個大男人跌倒會喊?!??!?! 佢後期太奸喇, 我唔likey佢!
我依家行過d雜誌檔, 除o左睇d娛樂雜誌封面, 都有睇o下你介紹d"潮書"...但頂多係見到d cosmo或者marie claire...呢d係咪擺o係好後o架?!
patrick哥哥 (鄧健泓) 同佢當時個女友lulu姐姐 (蓋世寶) 分手後好似都e+係fd黎ga ro!你搵返d報導睇睇，反而係呀lulu同伍文生拍拖...佢地先傳唔知邊個打邊個ja ro!
係呀? 等我得閒搵o下先!
即係lulu同伍文生兩個是但一個俾人打? 咁佢o地之後仲成日一齊做兒童節目咪好慘?!
雖敗猶榮 黃智賢
http://www.3weekly.com/common/content.htm?link=threeweekly/0340/ent/20060418ent0074/content.htm&topic_id=0301
哈哈...講到阿ben哥哥好衰咁喎...不過佢去番無線之後好似唔多掂...尤其o係"鐵血保鏢"個浮誇奸角!
我頭先見兒童台重播'怪家庭', 係文哥哥寫'怪家庭傳'架!
怪家庭裡面譚玉瑛老公係譚偉權?
(好抱歉其實90年代初我讀中學已經不屑睇閃電......~)
反而今日睇本周刊話星爺去上海揀童星問IQ題, 我仲記得430裡面佢同龍炳基果個'星仔基仔好介紹'裡面玩'打字機'->'打自己'. (好似講過囉可?)
OH...'怪家庭'! 係咪扮愛登事家庭o個個? 我唔係太鍾意睇...都係小學年代o既"戴家庭"同埋"叉燒包+漢堡包"或者"殭屍爺孫"好睇d...後期換晒d人已經唔鍾意睇! 同埋其實我由始至終都唔係咁buy"一代尤物"阿朱茵小姐! 由佢開始做我已經無咁鍾意睇!
"打字機"同"打自己"...我又真係未聽過喎! 星爺同龍炳基係有睇過, 但反而印象不深!
發佈留言
<< Home