9-13(wed) 鳳凰四重奏
o係講我今日要講o既o野之前, 一定要鬧一鬧o個個超級不知所謂o既天文台…上次三號風球“啡膠樽”事件已經俾人鬧(笑)到抽筋, 今次都唔吸取到教訓?! 我知打八號或者黑雨一日係會對香港經濟有好大影響, 但係都唔洗咁利字當頭, 草菅人命o架?!
上次o個個至少有十號威力o既三號波, 已經令到人行都行唔到o架啦…點知今次仲衰, 打風再加埋落雨…我已經算好彩o架喇, 由屋企到公司大部份時間都有瓦遮頭…但落雨其實真係仲大鑊過打風, 打風都係吹郁個人o者, 但落雨就成身都濕晒, 仲要踩到一腳都係水, 全日都ngup住晒, 有遮都無用!
今朝一起身見落咁大雨, 個天又黑晒, 心諗一定黑雨啦…點知你都可以只係黃雨…係咪玩o野呀? 返到公司有一段時間o係我隻窗度望出去…直頭一片漆黑, 咩都望唔到!
返工時經過天橋我直頭要開住遮,…但係都濕晒! 最頂癮係落到街諗住差一條馬路就返到公司…咁都可以“賴”o野…一見到有架的士飛緊過o黎, 已經即刻諗住走避o架喇…點知都係走避不及, 水花四濺到我成身濕晒…今次真係一裙都係! 仲要衰到要即刻見客…連吹乾條裙同對鞋o既時間都無…ngup足一整日!
天文台實在太太太太太太太太太太太太太太太太太太太太太太太太過份…太太太太太太太太太太太太太太太太太太太太太太太太太太無能喇!!!!!!!!!!!!!!!!!!!!!
今日想講o下tvb兩線“新劇”…今個禮拜上o個套“匯通天下”我真係完全無興趣…無論劇種定演員都唔太吸引我…雖然有我幾buy o既楊怡! 郭羨妮+馬浚偉+陳豪呢個combination…究竟要睇幾多次? 好心見好就收啦…何況都唔見得好! 而套劇俾我o既感覺同上次o個套古代fedex=“鐵血保鏢”差唔多…唔係我杯茶!
而另外o個線o既“鳳凰四重奏”…我就幾鍾意喇! 套劇係由同一班演員演繹四個唔同年代o既故事, 雖然兩個主角馬德鐘 (依然覺得佢個名似一個鐘[e.g.大笨鐘]多過似一個人名) 同埋佘詩曼我都唔係太buy, 但個題材真係幾新鮮幾有趣, 所以未播前已經幾期待!
錄o左差不多十集一氣過睇, 個故事都幾得意, 講由佘佘分飾o既四代女人由清末到現代o既故事, 同埋時代演變對女人社會地位o既影響…現代版佘佘得閒就會插兩句嘴講o下佢曾太婆 (即清末版佘佘) o個代女人o既慘況…幾有趣! 仲要加插好多歷史故事, 又慈禧太后, 又八國聯軍, 又日本仔攻打中國咁…真係幾得意! 我最鍾意睇就係民初o個段…好動盪啊!
其實諗到(或抄到)呢個題材o既人, 真係應記一功! 不過馬德鐘真係依舊唔討好 (其實曾經討好過一陣o既, 就係佢做配角o既時候, esp. 做主角的情敵o既年代)…如果換過第二個做男主角, 呢套劇會吸引好多!
至於陳鍵鋒個角色, 真係超級唔討好…早前已經講過, 因為佢唔簽無線經理人合約, 所以一連幾套劇都要做奸人, 上次 “潮爆大狀”做金毛飛已經超無說服力, 今次呢個敗家仔亦係吃力不討好…原來個樣+形象太乖乖仔o係娛樂圈係一個大阻礙!
D人成日話佢可以做當年o既溫兆倫接班人 (註: 各位當年無經歷過溫兆倫大紅大紫o既青年朋友們, 可能會問做“當年o既溫兆倫接班人”有咩咁好呀?! 可知溫兆倫o係八十年代尾/九十年代初, 真係無線最紅o既一線小生)…個樣係就係有d似, 但“發瘟”靠奸起家, 相信陳鍵鋒o係呢方面就“mun”d喇! 無線咁o既安排, 真係唔係玩佢, 係玩到自己囉!
…《鳳凰四重奏》故事簡介:
“《鳳凰四重奏》在時空上橫跨百年，人物上貫穿四代，講述中國女性地位百年的變化，由於題材恢宏，場景變化極大，無論在創作上或製作上都頗有難度，可謂一個挑戰。
由於故事由食店「鳳凰樓」開始，又貫穿四代人的生活，所以叫做「鳳凰四重奏」。除審視百年以來的婚姻與女性歷史外，又反思人們如何在婚姻制度備受挑戰、男女感情聚散容易的今天，重拾愛護、欣賞、包容他人的美好質性，充滿傳奇色彩的食肆「鳳凰樓」是劇中「四重奏」的百年家業。「鳳凰樓」誕生於亂世，煙沒於盛世，繼而重生於香港。當中興衰更迭的發展過程，正標誌著四代女子以血汗所銘刻的，一個屬於女人的家族歷史。
從清末封建家庭中克守婦道的堅忍媳婦，至五四時期奢言戀愛自由，私奔出走的新女性；從六七十年代香港經濟起飛下打破「男主外，女主內」的職業婦女，至廿一世紀新世代中感情輕不著地的無根女子——藉著四個互有牽連但各自獨立的故事，連同當中眾多的副線人物如童養媳、自梳女、冥婚婦人、交際花、馬姐、離婚婦人等等，建構出一幅幅充滿不同時代色彩的婦女圖像。
此劇內容之豐富，思想之深刻，足以拍成一齣百集長劇，但本故事篇幅只有約三十集，即是說，「四重奏」內四個年代的每個故事，只有約七至八集的篇幅去說。由於「四重奏」每個故事都各自獨立，要在短短七八集內完滿地表達起承轉合的變化，基本上編劇每次寫完一個時代的故事後，都要重新適應一個新故事從頭開始去寫，加上大量的資料搜集，在創作上絕不容易。好處是情節緊湊，不會讓觀眾有拖戲的感覺。而在製作上，要用一齣劇的人力物力，搭建四個完全不同年代的佈景，加上四個年代的服裝、交通、生活細節亦不相同，製作組人員的工作量可想而知。
而佘詩曼及馬德鐘皆一人分演四角，演繹上固不容義。而單是形象設計及髮型服裝等亦花了不少心思，阿佘單是拍造型照便梳了四個髮型，足要數小時之久。無論在創作上、製作上，或演員的演繹上，《鳳凰四重奏》都落足心機，絕對是一部誠意之作。”
posted by 芒姐 at 11:06 下午
19 Comments:
HI HI! 我路過架, 你好嘛? 「鳳凰四重奏」好好睇呀! 篇簡介係邊道搵架?!
今日落左成日雨, 到而家都未肯停, 好煩呀!!! 再係咁落法, 真係會死人架!!!
馬德鐘好核突... 塊面真係好似馬咁長...
Really sorry for you, mon jeh, for the b-a-d weather.
Although I like the theme of「鳳凰四重奏」,I have not watched it yet. But some reviews say it is modification of (a.k.a copy of) 《百年物語》+《茉莉花開》.
http://disc.server.com/discussion.cgi?id=157576;article=2001;show_parent=1
阿佘比起雪山飛狐時期的確進步了很多, 不過這幾年來又好像沒甚突破了
i like the idea too it's like "loving you" where the actors can show their abilities to act in different ways. But, it's only good for actors/actresses like 鄧萃雯! 馬德鐘's 戲路is way too limited(even worse than 薛家燕/吳啟華)!! in the promo his 六七十年代阿飛 tone is terrible! 唔該想演員演得多元化就搵d有演技既人黎做啦!
agree with tfil that 馬德鐘's 戲路 is way too limited!
Maybe Mr. Ma is more suitable for cooking shows!
Moo,
for cooking shows? why?!
tfil & 匿名者,
馬德clock o既演技o係做配角或主角的情敵年代係ok o既, 但一路只係維持到o個個standard...同埋佢只係時裝look, e.g.做警察/飛機帥/model係型, 但係佢個古裝/民初look真係嚇死人...我認同佢個六七十年代阿飛 tone係超級造作+得人驚...佢以為咁就係扮呂奇...咁撈家都真係高佢幾班囉!
Bazooka,
其實我絕對認同阿佘比初出道時進步o左好多, "雪山飛狐"同"刑偵4"時, 真係好想打巴佢(sorry, 粗暴o左d)...佢把雞仔聲真係好令人有衝動去熄o左個電視機...其實到"十月初五"已經有顯著進步...依家係ok啦...不過唔係我杯茶o者, 因為我真係好怕d嬌聲人!
shaw_mag,
我都有聽過"鳳凰四重奏"係抄 《百年物語》+《茉莉花開》(雖然兩套我都無睇過, 亦唔知係咩o黎)...不過其實天下文章一大抄, 有邊d o野唔係抄o架呀? 抄得唔好太太太明顯同埋抄得好咪ok囉! 哈! 如果選角更佳咁就perfect晒!
貓咪 ,
你好!
「鳳凰四重奏」係幾ok啊! 敗筆就真係在於個"鐘"囉!
篇簡介係tvb.com度搵o既!
落雨落到咁都唔黑雨, 我要再次強烈遣責天文台的失職呀!
Didn't Mr. Ma have a cooking show on Pay TV?
你好呀!芒姐~我是第一次留言俾你架!(好似d小fan既語氣!嘻嘻) 哎呀~其實我真係好鍾意睇電視~又好鍾意睇你個blog~我其實都係最近呢幾個星期才發現~但一發現後就忍唔住狂煲你的blog啊!真係好精彩呀~
我其實就八十年代頭既人來既，所以八十年代尾時都算係細個。但我都記得【義不容情】溫兆倫推蘇杏璇定邵美琪落火車果幕呀（近年查返才才知道應該係後者？），真係好經典。
其實我記得好耐以前中午時候無記咪有d新歌mv播放既。當佢地播個mv前，就會請歌手講幾句野架嘛？我記得果時溫兆倫都有介紹【沒有你之後】呢首歌。細個成日同弟弟在屋企唱。
哎呀，我見到你寫電視就好興奮，因為我真係好鍾意睇電視劇，係一個電視精呀。講返【鳳凰四重奏】，其實我都對部戲很期待，不過又好像比我想像中悶囉。其實我都最期待民初果段，因為我都叫子君，嘩哈哈，結果呢期狂俾同事笑。其實民初呢部分都幾抄魯迅的【傷逝】，女主角又叫做子君，又係因為要打破封建思想所以私奔咁，但之後男女主角因為現實生活艱難而產生很多磨擦，最後分開了。同埋最頂癮係馬德鐘做果個李吉祥，竟然又係在日本留學，然後棄醫從文，要拯救中國人的心。唔單止抄個短篇小說，仲要抄埋個作者，真係好好笑。其實個故事真係幾吸引，不過可能因為我都唔係集集可以睇(主要都係睇網上劇情)，覺得好似拍得悶悶地咁囉。
唔好意思，個comment太長。希望你得閒可以講多d電視啦，真係好有共鳴！支持你啊!!!
-----
以下兩篇係提及你blog的日記節錄~嘻嘻~你得閒無聊可以睇下~忍唔住講句"我諗我係fan屎"(其實嚴格來講我個年紀係冇乜可能迷上軟硬的~果時得果小學~所以我真唔明白點解d後生過我很多的人都無啦啦仆去看軟硬仲要好似好集體回憶咁~果時如果唔係我成日痴住d七十年代尾出世的表姐們~我都唔識軟硬~仲有睇成日提住'毒瘤明'的yes~果時有隻歌叫'yes一族'添架~而家仲識唱~不過唔知同本雜誌有冇關係~)
-----
她講電視劇的功力實在深厚，真的看過很多電視，實在令我佩服呀。睇返她其中一篇講【識法代言人】的舊post，也很精彩。她見到秋官和唐寧的父女組合，就立刻想起【男人四十一頭家】，yeah，哈哈。唔係馬後炮，我四月廿五日都有寫過架，呵呵，雖然遲她一個星期。我真的很喜歡看電視，很想看她講【鳳凰四重奏】。唉，因為要ot，都冇得睇，好想睇陳鍵鋒做二世祖的樣，哈哈哈。我覺得果個瑜鳳和余賜好煩，不過我fast forward咁看返第一集的bt，看到瑜鳳阿媽對瑜鳳講的話，我也忍不住喊。
------
我去倫敦兩次都是是諗住【玻璃之城】，唱住try to remember遊泰晤士河，看國會大樓和大笨鐘。冇諗過可以去唐人街咁喎! 咁樣遊好像好有趣。唉，都不知幾時候可以再去長途旅行？
Hello 芒姐,
I'm a fan of your blog all the way in Canada! ^0^ I love TV as well! =P I was just wondering, I don't think you've commented on 覆雨翻雲? Why is that? Not interested? I want to get an expert opinion before I decide if I rent it or not. =)
覆雨翻雲唔好睇架, 同大唐雙龍傳一樣, 悶到你抽筋, 唔好租喇!
Moo,
Oh I don't have pay tv ar...did Ma have a regular cooking show or just appear in the prg for once or twice?
he doesn't look as if he can cook well!
紙巾/子君,
你個名都幾好聽呀, 個花名又幾趣緻喎!
首先多謝你o既欣賞同埋讚美...真係估唔到"我諗我係fan屎"呢句可以用o係我身上...好感動...多謝晒你...受寵若驚! 因為你o地o既支持, 我會繼續努啊!
八十年代真係好令人懷念...溫兆倫推邵美琪落火車, 同埋推蘇杏璇落山(?!)...真係唔記得喇...四年級後, 已經無再睇過"義不容情"...但頭幾集藍潔瑛跳樓同埋後來黃日華入獄, 仲有"幸運星"熱潮, 仲好深刻!
"yes一族"係咪套套電影"yes一族"o既主題曲o黎o架?! 我無咩印象添...!
最後, 再次多謝你o既支持!
公主,
係呀, 正如匿名者所講, "覆雨翻雲"真係唔多好睇, 幾係悶...最緊要係古裝片從來都唔係我杯茶 (除o左surprisingly好睇o既"再生緣")...d主角仲要全部都好唔吸引 (除o左林峰)...同埋聽有睇呢套戲o既人講, 真係唔多掂...所以收視都勁低! 你都租過第二套啦!
Anonymous and 芒姐
Thank you for your advice! =)
發佈留言
<< Home