4-18(mon) 潮爆大狀

點都要講o下呢套劇o既…雖然係我鍾意睇o既劇種, 但正如之前所講, 呢期未免上得太多律師戲, 幾好睇都睇到悶啦…何況質素係愈o黎愈差! 上次“狀媽”o個套已經狂拋書包拋到走火入魔, 完全唔似以前o個d法庭戲咁好睇…今次呢套好似仲over, 同埋d人亦不大吸引!

不過今次都叫做有少少新意, 講legal aid, 同埋令我o地學o左d o野…原來有d post叫做“senior law clerk II”…legal clerk都叫做聽過, 但係law clerk真係我o地個個都未聽過…即刻去做o下research, 原來legal aid裡面真係有d咁趣緻o既post…不過佢o地擺得落套戲度, 都一定做過o下research o既…仲要係做得太勁, 勁到有過份拋書包o既感覺!

之前o個d律師戲好似“壹號皇庭”咁都唔係走呢個路線o既, 最深刻o既第一套拋書包之作係“法網伊人”, 無啦啦懶寫實咁o係度拋d行內術語, 咩“PG”(認罪),“PNG”(唔認罪), 又lord atkin…“律政新人王”又正常番d, 雖然都有拋, 但程度上可以接受, 同埋o個堆新人做得好好, 有一種好young好fresh o既感覺, 直頭可以列入我最鍾意o既青春劇劇種 (至少可以話係法律界o既青春劇)…點知到“識法代言人”又走火入魔…一日o係度教大家術語…好悶! 今次又o黎喇…勁拋勁拋…!

同埋蘇玉華作為一個“law clerk”, 點解成日咁威o係度challenge個senior counsel? 未免係太威喇! 雖然話就話唔應該咁“階級”, 但都唔好咁離譜呀?! 仲有後尾做大狀o既唐寧會鍾意o左俾秋官招聘o左做OA o既陳鍵鋒…更加未免係太過脫離現實喇!

講開阿陳鍵鋒…真係好頂唔甫佢呢個角色! 佢個金毛飛造型+懶大聲o既演繹+超浮誇o既表情…真係好唔該晒…sorry, 係就係一大突破, 但形象局限, 佢都係適合做番律師多d! 佢做死飛仔…真係點做都無忽似! Tvb今次唔止玩著佢, 仲玩埋自己! 呢個角色搵阿mk wong做會好d!

唐寧個樣真係太太太細路女 (又或者真係因為佢個童星形象太深入民心, 大家都睇住佢大, 所以即使佢長大o左, 大家仍然覺得佢係一個小朋友)…要佢做大狀真係好無說服力 (雖然呢樣真係好寫實…現實生活中的確係有好多個樣好小朋友o既律師)…一睇到佢, 只會諗起“四個32A”, 好似細路仔扮大人咁!

仲有鄭少秋真係唔多似律師…佢都係去做番大俠罷啦! 一日o係度拋英文但又講得難聽…什麼 “one good point is better than 10 bad points”…好好笑! 呢套劇選角真係好失敗!!!

忽然記起秋官同唐寧十年前已經做過父女, 當時唐寧仲係叫江麗娜…o個套戲叫“男人四十一頭家”, 當時o既細路女, 依家已經長大成人, 真係好似睇緊佢o既真實故事咁!

蘇玉華做得幾好, 不過無咩突破! 同埋佢真係成日都要同大佢一個generation o既男角配成一對…但又出奇地襯喎…好似“婚前昏後”o既劉松仁咁!

阿向海永遠都係要做主角的情敵, 同埋, 佢真係好似一個月亮…點睇, 佢都唔多靚! 呢套劇又有湯盈盈, 真係幾乎套套都有佢, 不過今次個角色, 無咩特別! 石修呢期o既演技真係勁浮誇, 呢個咁o既“人善人欺天不欺”角色完全係為佢度身訂造…點解佢會變成咁? 以前好似正常好多o架?! 依家我覺得佢個仔陳宇琛o既演技真係好過佢好多!

仲有陳國邦呀…佢有咩可能配唐寧?! 幾乎可以做佢老豆! 十幾年前佢出o黎做戲時, 唐寧仲係做緊主角的童年…當年, 我成日撈亂陳國邦同黎耀祥…唔知點解我以前真係覺得佢o地好似! 尤其係“燃燒歲月”?面o既黎耀祥同埋“今生無悔”?面o既陳國邦!

同埋唐寧本來個醫生男友阿前童節目主持李天翔哥哥…都係適合做番兒童節目多d!



最後quote番一部份朱樂言o既視評:

《潮爆大狀》，名帶點突兀。鄭少秋與「潮爆」兩字，的確風馬牛不相及。宣傳片段中他一身YeahLook駕?電單車，相信只是其中一幕。而且所謂「Yeah」，只是皮褸加牛仔褲而已，真的潮、爆、喪、Hit？總之，造型依然是蛋撻頭加西裝畢挺，與《笑看風雲》的黃天沒大分別。

幸好，性格滋潤了角色。衰格，帶點囂張，事事向錢看，只嫌未夠盡。以汪明扮演《我的野蠻奶奶》的標準，鄭少秋的「突破度」仍然有限。是劇本處理還是秋官顧忌？真懷念他在《大時代》的破格演繹，就算亞視《世紀之戰》，他也癲得勻循，可能世上只有韋家輝能令鄭少秋百分百豁開。蔣文滔這角色，仍欠一點點火。

蘇玉華更甚。性格是甚麼？完美大好人一個。喜歡幫人，劇中不斷幫人，幫人為甚麼？幫了人，開心嘛。單純如此，應由5年前初出道的阿Sa飾演。[芒按: 哈哈哈…呢一點幾好笑!] 結果，《奪命真夫》賺了觀眾緣的她，這一趟，又蝕了。

不甘平淡，唯有用奇招，陳鍵鋒染金毛，唐寧戴假髮做大狀，都嚇人一驚。[芒按: 完全係!] 兩人盡了力改變觀眾心目中印象，但乖仔扮惡，靚妹扮專業，始終欠缺火喉。說服力不足，但多點新鮮感，也是好事。否則陳鍵鋒再做律師的話，繼續字正腔圓雄辯滔滔，我不如看回《律政新人王》算了。[芒按: 哈哈哈哈哈…呢段最最最中! 依家咁樣夾硬o黎…都係不如睇番“律政新人王”吧啦!]

資料搜集增加質感

放棄律師樓，以法援署包裝，案件應與民生更貼近。資料搜集花多了工夫，專業質感勝過《識法代言人》、DOJ、Exhibit，英文可用則用 [芒按: 咪係…簡直中晒!]，至少可令唐寧的稚嫩面孔增多點信心。不過，案件仍然沒甚麼奇峰突出，收樓、傷人、證人失憶……都是司空見慣，難以惹起坊間談論。 [芒按: d案件+情節直頭係悶呀!]