2012年9月3日星期一

9-3(mon) 巴不得媽媽

尋晚個慧妍30年show幾好睇喎…睇番d歷屆港姐…嘩! 真心好驚囉! 點解d七/八/九十年代港姐個個四十過外的港姐, 仲靚過晒近年d妹妹仔咁多?!你睇朱玲玲, 鄭文雅…仲有五十有七o既趙雅芝…點解可以靚成咁?! 靚得o黎仲要好elegant…想點先?

o係tvb show見到羅力威感覺亦都真係幾怪…太重亞視味...仲有我偶像萬二蚊/馬小玲都係…雖然我都好高興再o係電視見到佢! 而"巨聲3"個冠軍廖sir無咗影大半年, 原來仲o係度, 但要排o係羅力威後面, 又真係有d慘...tbb咁樣安排又真係自己落自己面! 同埋我想講原來JJ個前男友沈震軒ok型喎!

"巴不得媽媽"做咗一個禮拜, 雖然無無聊聊, 但睇落又幾好睇喎! 幾好笑吓! 無聊中又帶點意思! 雖然上次"巴不得爸爸"玩時空交錯我鍾意睇d…但呢套都唔錯! 第二集咩"粥是故鄉綿"o個part好抵死…笑死我!

不過李成昌做錢嘉樂老豆, 蘇恩磁做古明華阿嗎…呢d選角有d搞笑! 同埋岑麗香一跳就做女主腳就ok怪囉…我睇討論區有人話佢可以媲美當年的翁美玲…真係唔好玩啦! 暫時最出o既係古明華o既蘇基一角…好多人都好like佢!

另一輪民意調查: "巴不得媽媽"咁多個角色中, 你又最like邊個呢?


嘩…黃日華個女同佢老婆梁潔華後生時幾乎一樣樣囉! 其實都算幾靚女, 不過如果佢似老豆多d, 可能會再靚啲…:p

tvb呢個"不得了人才招募"計劃…其實可唔可以考慮下請我? 我真心想去參加囉! 我覺得我都附合咗大部份條件…雖然未必去到"不得了"的程度, 哈哈!


Oh…原來由今晚深夜開始tbb會重播黃子華o既"絕代商驕"...呢套真係必睇囉…尤其在職人士, 真係學到好多絕頂招數! 終身受用!

講開棟篤笑…呢段又係不能錯過…曾主席今次真係好波! 雖然我唔會喺呢度同大家談政治, 但無論你支持邊個政黨, 都不得不承認曾鈺成o既口才/急才/應對同manner係十分高質素...我最鍾意睇選舉論壇, 因為極富娛樂性, 極度mentally challenging, 同埋睇得出o個個人o既修養...我最怕就係o個d鬥大聲o既野蠻人(雖然佢哋又好好笑)…我睇晒咁多個選舉論壇, 講真, 論整體表現曾鈺成係數一數二...尤其呢段總結, 真係唔俾個like佢都唔得...當晚我對住個電視笑咗!



"撐社民連,上街! 撐人民力量,上網! 撐公民黨,上court! 撐是旦男,舉牌! 撐蕭若元,拍玉蒲團!"…仲要配合埋身體語言…真係想點? 曾主席你唔去做棟篤笑堅係o徙咗…:p

仲有事旦男同九龍西林依麗都係好好笑…呢d選舉論壇好睇過兩線劇集…真係唔可以miss!