H-E-J-N-O-M <=> 芒姐再現: 2008年3月20日

2008年3月20日星期四

3-20(thurs) 港樂鄭中基梁漢文演唱會

上個禮拜去o左睇“港樂鄭中基梁漢文演唱會”…喂, 一如所料, 幾好睇喎! 首先因為我都幾鍾意睇港樂, 就算齋係佢o地無歌星我都ok, 不過crossover就更合我心意, 所以咁多年o黎港樂x流行歌手concert我都會去捧o下場 (不過葉麗儀o個d我就無去, 唔係話佢唔好, 只係不是我杯茶)…加上梁炳同中lay我都幾ok (正確o黎講我係好buy鄭中基添! )…佢o地d歌又算幾好聽, 同埋兩個都係唱得之人!

文文(我o地慣o左咁叫佢) d歌其實就hit過中基好多…尤其佢出道又早多佢5/6年, 留o係樂壇又耐過佢, 所以hit歌真係一籮籮…好似hit足14年o既食糊之作“纏綿遊戲”, 之後o既“傷了三個心”, “我需要的只是愛”, “衣櫃裡的男人”, 到03年“鹹魚翻生”之作“七友”…仲有我最鍾意o既“刑偵2”插曲“愛與情” …真係超好聽! 正如之前所講: 佢又係慘o既, 咁多年o黎好多起起跌跌, 成日有d歌紅o左兩下, 跟住就無啦啦跌番落o黎, 呢個cycle仲要o係呢十幾年o黎repeat過無數次…

(梁漢文 – 愛與情…o係youtube居然搵唔到原裝mv, 可能係俾tvb要求摌晒! 得呢個自製短片version…不過都幾正喎, 有鄭嘉穎同周麗淇片段…我都幾鍾意睇! 同埋呢個係搵云成個youtube唯一有得聽晒成首歌o既version! 要再講多次…真係好好聽!)

文文多好歌, 亦都唱得唔錯, 但有比較之下, 又真係中基唱得再好少少 (可能又係biased啦o下!) 事關佢把聲入咪d! 不過講真, 佢唱歌唱得咁好…依家反而要主力搞笑都有d可惜! 雖然佢搞笑亦都真係有一手…仲要係轉數極快o個隻! 好少人講o野可以引到我笑…佢係其中一個! 所以佢有呢方面o既talent, 又唔可以話係o徙o左o既!

今次演唱會一開場就係由鄭中基唱“天意”…加埋管弦樂成個arrangement真係好得囉! 唔睇番都唔記得原來我之前都講過: 其實佢咁多隻歌, 我覺得最好聽係"天意"…本來我都唔記得o左呢句說話, 點知佢今次揀o左呢首唔算係最多人識o既歌做開場, 個感覺又真係好得喎…好grand, 好動聽, 好配合呢個場合…即刻又覺得呢首歌再好聽多兩倍! 其實當年呢首歌都攞o左好多流行榜冠軍 (同期千嬅o既"因為所以"亦都係好hit)…可惜佢個人唔夠紅, 所以首歌都無去一個佢理應可以更hit o既位!

第二首就係文文出場唱“愛與情”喇…配埋港樂又係超好聽! 呢d港樂show成日都可以令d歌手“鹹魚翻生”o既最大原因, 係佢o地做親呢類show, 都會揀番自己最hit o個d歌o黎唱 (反而個人演唱會可能因為唱過好多次而改選d較冷門o既)…即刻喚醒晒大家o既記憶, 尤其係克勤o個次谷底反彈係最成功o既…事關佢真係有紅過, d歌亦都曾經十分hit, 但係80年代尾/90年代初o既事…之後係跌到有好幾年連唱片都無得出! 但一次港樂, 令大家再次聽番晒佢多年o黎d hit歌, 而當年鍾意佢o既青少年, 01年亦正值廿幾/卅幾歲, 最鍾意“懷舊”亦最有經濟能力去做盡一齊去“懷舊”o既年紀 (e.g. 買演唱會飛/碟etc.…所以佢之後d演唱會都長賣長有!)…港樂o既最大功勞, 就係喚醒大家埋藏於腦海/心底深處o既記憶…再加埋d搞鬼歌連同新arrangement…懷舊得o黎又有d新鮮感!

所以佢o地今次其實都有d“捉到鹿唔識脫角”…兩個都仲有好多hit歌無唱! 文文無唱“傷了三個心”, “我需要的只是愛”, “呼吸”, “移情別戀”etc….中基其實就已經唔多hit歌, 但就連好記得當年攞"最佳音樂錄影帶獎"o既“人若然忘記了愛”, "還以為", "想愛你",“時間人物地點”etc.都無唱片就算係唱佢最拿手但其實o係香港無咩人識o既國語歌, 都居然無唱到佢o既成名作"左右為難" (呢首歌其實好適合o係呢個場合合唱呀!), “真摯”, 仲有“戒情人”, 同埋我覺得都真係幾好聽o既“如果沒有你在身邊的時候”…

(鄭中基 - 如果沒有你在身邊的時候)

當然, 令佢繼96年新人獎之後, 05年再o係樂壇威番次o既“無賴”(應該係“無籟/瀨”as in天籟/人籟/燒鵝瀨by利孝和年人@05年度十大勁歌金曲頒獎典禮)一定有唱…但佢叫大家同佢一齊萬人大合唱chorus時, 反應居然遠不及間場嘉賓太極 (正職係呢次演唱會o既樂手同和音)…其實今次係同管弦樂團合作, 我覺得係一d都唔需要黃丹儀或者joey tang做伴奏囉, 畫蛇添足! 不過可能係paco要sell埋成個package, 俾d機會佢o地演出o卦?! 唔係話佢o地唔好呀, 但其實佢o地平時都已經係大部份演唱會o既御用樂手, 呢次係管弦樂團show, 可唔可以俾大家透o下?!

不過原來太極先係最多fans…佢o地o係以前原本真係會好似聽orchestra的演奏會時有o既intermission時段, 出o黎表演, 唱o左“紅色跑車”同“留住我吧”, 不單止無變成廁所位, 仲成為係全場最有反應o既時段…真係萬人大合唱o個句: “留住我吧”囉! 都話香港人係愛懷舊o架啦, 尤其係懷八十年代的舊!

仲要我絕對有理由相信有好多人只係為o左o黎睇太極唱兩首歌而入場, 事關我o地隔離o個兩位男女, 一入場就係咁傾偈, 好似十九幾年無見咁, 又彷似有d咩大計要洽談咁…但係一到太極出o黎唱歌, 佢o地居然停o左傾佢o地o既大計, 仲一齊“留住我吧”添! 係佢o地全場唯一可以靜少少o既位…真係吹漲!

(鄭中基 - 搬屋…佢其中一首好hit o既廣東歌)

港樂鄭中基梁漢文演唱會曲目

鄭：鄭中基　梁：梁漢文　合：合唱
1. 《天意》（鄭）
2. 《愛與情》（梁）
3. 《天跌下來》（合）
4. 《衣櫃裡的男人》（梁）
5. 《七友》（梁）
6. 《搬屋》（鄭）
7. 《被愛是幸福》（鄭）
8. 《你的眼睛背叛你的心》（鄭）
9. Bee Gees medley （合）：《 First of May 》、《 How deep is your love 》、《 Night Fever 》、《 You should be dancing 》
10. 《隨時行樂》（梁）
11. 《猛龍特警隊》（鄭）
12. 《 Sorry seems to be the hardest word 》（梁）
13. 《 It's only a paper Moon 》（鄭）
14. 《 Longer 》（合）
15. 《紅色跑車》 + 《留住我吧》（鄧建明，雷有暉）
16. 《艦隊》（梁）
17. 《披頭四》（梁）
18. 《琉璃夜雨》（梁）
19. 《纏綿遊戲》（梁）
20. 《一世一次戀愛》（梁）
21. 《黑山老妖》（鄭）
22. 《絕口不提愛你》（鄭）
23. 《星光伴我心》（鄭）
24. 《無賴》（鄭）
25. 《音符》（鄭）
26. 《情天陰天雨天》（鄭）
27. 《我代你哭》（梁）
28. 《 501 》（梁）
29. 《八里公路》（梁）
30. 《好朋友》（鄭）
31. 《愛很簡單》（合）