2006年11月9日星期四

11-9(thurs) 萬千星輝頒獎典禮2006

嘩! 原來今年tvb台慶分o左兩part…咁都唔緊要, 但係原來聽日已經係台慶頒獎禮o既大日子…真係毫無心理準備囉! 不過都無咩所謂, 反正愈o黎愈覺得台慶頒獎禮只係一場show, 一場遊戲一場夢…如果搞得好睇, 搞得有聲有色, 都已經係好令人滿意o架喇…賽果合唔合理, 都係見仁見智o既o者!

不過請問台慶分兩日做, 頒獎禮11月10日做o左, 咁19號正日係做咩呢? 齋表演? 但係近年又無o左楊盼盼, 台慶趣劇又唔見得好笑, 咁仲有咩精彩表演呢?! tvb由97年開始抄人o地亞視加個頒獎禮, 都係想轉移視線o者…依家又無啦啦拆番開佢, 真係唔知想點?!

仲要擺o係禮拜五播, 又唔係太大肆宣傳, 咁…即係點呢?! 禮拜五d人出晒街實無人睇啦…你話係正日就話無得講o者, 有得揀都放o係星期五, 我覺得有d怪囉!

是但啦, 反正都唔知佢搞咩?! 又話今年男女主角都分兩個獎…“最佳”同埋“我最喜愛”…都唔知點分, 亦唔知邊個勁d, 更加唔知點tip? 但係都循例講o下我o既心水啦…



根據佢個
http://tvcity.tvb.com/special/anniversary2006/vote/index.html
2006台慶網上投票名單

…好似有以下呢幾個category…一如以往, 等我都係分番“我想”同“我估”兩part咁寫啦:

最佳男主角

我想: 鄭嘉穎…大家都知我幾咁鍾意睇“天幕下的戀人”…不過佢又好似未夠班攞呢個獎! 但係我唔理喇! 林峰o係“女人唔易做”o既表現都唔錯! 仲有謝天華呢…不過男主角一定無佢份o架喇!

我估: 真係唔知點估…有資格o個批又無咩邊個特別出…我可唔可以估番鄭嘉穎?

最佳女主角

我想: “女人唔易做”o既鄧萃雯啦! 不過tvb唔會俾佢o架喇…要俾兩年前如妃都俾o左啦…

我估: 肥田同佘佘之爭…肥田有gimmick, 佘佘“鳳凰四重奏”又幾突破…不過呢期“肥田囍事”口碑無想像中咁好…同埋加多o左個什麼“我最喜愛女主角”…所以我估肥田攞“我最喜愛”, 佘佘攞“最佳”啦…皆大歡喜咪算囉…何必咁執著呢?! 睇o下最後邊個食得多飯局咪會跑出囉!

最佳男配角

我想:“肥田”o既胡諾言…其實佢咁多年o黎都幾落力啊…俾佢啦!

我估: 其實胡諾言都真係有d機會o架…又或者“天幕下”o既夏雨都唔錯!

最佳女配角

我想: 之前一篇都講過…“肥田”o既李詩韻同黃淑儀都做得幾好! 其實仲有一個早前成日激讚佢o既…就係“天幕下”o既大家姐何綺雲…佢o係呢套戲度真係做得好好…好鬼死似o個d好貪錢好恨嫁有錢佬o既女人…克人憎得o黎又好好笑喎!

我估: 無咩邊個特別突出…上年o既湯盈盈今年都跌晒watt…何綺雲又未夠班, 所以我估gigi姐啦!

5) 我最喜愛的電視男角色

我想: 我唔明呢個獎係咪同以前揀十個得獎o個個一樣? 定係呢個獎依家只係揀一個…就係所謂o既“最佳”vs “我最喜愛”呢?! 真係唔知! 是但啦…我都係想估鄭嘉穎o既沈朗或者謝天華o既賤man!

我估: 都係呢兩個…沈朗我喜愛d, 但係賤man應該機會大d o卦…如果鄭嘉穎攞o左最佳男主角o既話…

6) 我最喜愛的電視女角色

我想: 我都幾鍾意niki o既高逸詩, 或者鄧萃雯o既hil姐, 仲有吳美珩o係“愛情全保”入面個角色hazel…不過我估呢三個都唔會得獎…

我估: 肥田…尤其如果佘佘攞o左最佳女主角o既話!

7) 飛躍進步男藝員

我想: 同男主角一樣…我想鄭嘉穎, 謝天華, 仲有胡諾言都ok…但係佢o地會唔會over-qualified呢? 無論年齡, 年資定係“輩份”, 都好似已經過o左呢個獎o既criteria…

我估: 但係唔估佢三個又無咩邊個可以估…唔通“勁歌金曲”崔建邦咩? 如果佢真係得獎我一定會噓佢! 咁我都係估胡仔啦! (但係如果嘉穎攞唔到男主角, 佢都應該好大機會問鼎呢個獎o既!)

8) 飛躍進步女藝員

我想: 之前唔係話得過呢個獎o既演員往後無得再候選呢個獎o既咩?! 點解楊怡同楊思琦仲o係名單裡面? 不過佢兩個應該都無咩機會! 都係o個句, 雖然我唔係特別buy李詩韻, 但係我真係覺得佢做得幾好! 仲有姚嘉妮都做得唔錯…不過佢無理由仲係飛躍o架?

我估: 無線可能會俾徐子珊…唔會係高層女toby呀嘛?! 其實李詩韻都真係有d機會…畢竟無線都叫做力捧緊佢!

9) 最佳節目主持

我想: 唔洗講…“美女廚房”鄭中基! 不嬲都咁欣賞佢…成日都o係呢度講, 無謂再repeat喇!

我估: 當然都係佢啦…你唔係唔俾佢呀?! “美女廚房”收視同口碑都咁好, 無功都有勞呀? 唔通真係俾amigo咩?

10) 最佳劇集

我想: “天幕下的戀人”/“女人唔易做”

我估: 都係呢兩套…“女人唔易做”機會又好似大d…你唔係諗住俾“肥田”呀?!

11) 最佳綜藝資訊節目

我想: “美女廚房”或者陳總有份做o個個“向世界出發”都唔錯o既…因為佢無應該唔會咩獎都俾晒一個節目o卦?!

我估: “美女廚房”/“向世界出發”

12) 最具創意節目

我想: 其實都係“美女廚房”…不過佢好似抄日本/台灣節目炒得好足…雖然都要加入香港元素先會咁成功…不過創意可能唔夠囉! 咁一係揀“老馮日記”都唔錯…係幾有創意幾新鮮…又或者都係“向世界出發”囉…

我估: 都係呢三個節目…如果真係要揀一個我揀“老馮”…不過馮德倫唔係無線人唔知有無機會呢?

13) 最佳外購節目

我想/我估: 是但啦…完全唔知咩事…“神鵰俠侶”啦好唔好?

14) 最佳宣傳片

我想/我估: 又係唔知咩事…我估“肥田囍事--顛覆全城篇”…都係o個句…是但啦…!

好! 估完! 前排仲睇到一篇分析今年視后會是誰o既文章…又係幾見解獨到o既…



誰是今年視后?

不知何時開始,無線台慶舉辦的頒獎禮,已成電視圈最矚目盛事。公平嗎?公正嗎?公開嗎?卻不管。反正個個一線小生花旦嚴陣以待,努力演戲之餘,並努力與高層斟茶灌水,或者乖乖續約。不再扭計,甚或借用傳媒打心理戰,上年郭可盈與汪明荃一役,成為經典,結果野蠻奶奶以技術擊倒對手,今年烽煙再起,究竟最佳女主角花落誰家?

佘詩曼 代表作《鳳凰四重奏》

熱門程度 ★★★★★

劇集臨近台慶推出,對她有利。一世紀的女人地位,何等宏偉意念?她一個飛,而且信心十足,4種造型性格清晰分野,是演技盡顯的示範作。其實《火舞黃沙》的她,也是芸芸角色中最討好的,年年陪跑,她是不可小覷的黑馬。

蒙嘉慧 代表作《法證先鋒》

熱門程度★★

以資歷論,無可否認,是陪跑分子。但劇集熱爆,她與有榮焉,訪問多了,一花旦地位也漸穩。但先別想獎項,應想想如何令說話不急促,不走音。佘詩曼的雞仔聲也日漸渾厚,蒙小姐,你也可以吧?

蔡少芬  代表作《火舞黃沙》 熱門程度★★★

全年最重本的劇集,至少派一個代表參賽吧?但,獎曾經拿過。奮鬥心應不及其他花旦,而且,《火舞黃沙》的蔡少芬,的確不是她演藝生涯的最佳演出。扮老、聲壓沉,不如看她大癲大肺與黃子華一起黐。午夜劇場的《棟篤神探》,我晚晚追。

鄧萃雯 代表作《女人唔易做》

熱門程度 ★★★★★

網上一致公認是全年最佳,但網上一致認為無線不會頒獎給她。無夠膽破格,順應民意一次嗎?她形象貫徹,憑實力,不賣帳。兩年奪得「最有實力女演員獎」,無論觀眾及她自己,卻不甘心。《金枝慾孽》的如妃,眼中的狠勁陰森仍歷歷在目,以為難以突破,但轉做女強人,又獲得廣大共鳴。OL紛紛封為偶像,一齣小成本製作的《女人唔易做》因而彈出,成為全年收視冠軍劇集(截至9月份)。

吳美珩  代表作《愛情全保》

熱門程度★★★

默默努力多年,終開花結果。不止專業人士,小女人抑或唧你笑,都OK。當然,演技仍未爐火純青,《女人唔易做》中鋒芒亦被掩蓋,但《愛情全保》收視穩穩妥妥,仲想點?今年奪獎機會雖然不大,但5強中應有她。

蘇玉華  代表作《男人之苦》

熱門程度★★★

觀眾的印象是:緋聞不多,乖乖演戲,實力漸見。結論是:碰上度身訂做的優質劇本的話,她可以躍升為另一個鄧萃雯。《奪命真夫》奠定實力派地位,《潮爆大狀》角色不突出,《男人之苦》讓人發現她喜劇活潑的一面。而且極度專業,多場上戲叫人咋舌。憑「專業」兩個字,最佳女主角是有機會染指的。大概是兩年後吧。

胡杏兒 代表作《肥田囍事》

熱門程度 ★★★★★

戲未上演,人已熱爆,史上從未見過。為一齣劇集增肥幾十磅,的確電視史上從未見過。

這番努力,這番苦心,很多人都認為,最佳女主角已是她囊中物。這種評論,對肥杏不公平。她的實力,只等同一口舊豬腩肉?上年《我的野蠻奶奶》火花迸發,劇集成功,她的功勞不少於汪阿姐。今年再發力豁出去,大家要看的,是劇集內肥田的表現。

肥,只是包裝。戲,始終最重要。如果最後得獎,希望大家重視的,是她的演技,而非40磅豬腩肉。

最後, 當然又到芒姐o既歷年台慶回顧時間啦:

2005:

http://hejnom.blogspot.com/2005_11_19_archive.html


http://hejnom.blogspot.com/2005_11_20_archive.html


http://hejnom.blogspot.com/2005_11_21_archive.html


2004:

http://hejnom3.blogspot.com/2004_11_19_archive.html


http://hejnom3.blogspot.com/2004_11_23_archive.html


2003:

http://hejnom3.blogspot.com/2003_11_17_archive.html


http://hejnom3.blogspot.com/2003_11_19_archive.html


2002:

http://hejnom3.blogspot.com/2002_11_19_archive.html


http://hejnom3.blogspot.com/2002_11_20_archive.html