11-30(mon) 贏盡滿城宮心計 + 萬千星虧頒獎禮 2009

嘩! 尋晚條街同d食肆又真係少o左好多人...唔通真係因為"宮心計"大結局?!!!! 情況同上年"家好月圓"或者前年"溏心風暴"大結局時一樣...估唔到呢d以為只會發生o係七/八十年代o既"趕返屋企追大結局"現象, 近年又重現番...真係要高呼一句: "電視精萬歲!!!"

連好多平時唔多追開電視劇o既朋友...都居然話俾我聽佢o地留o左o係屋企睇大結局...真係估唔到"宮心計"有咁大吸引力...! 而我本人都o係酒樓睇o左前半部…雖然係默劇 (因為聽唔到聲) 但全場d食客都睇得異常肉緊...隔離枱d叔叔呀, auntie呀不停咁講..."哎呀...龍裔呀!"..."係啦, 俾個尚宮佢做啦!"咁...搞到我以為自己身處愉景新城參加緊個咩“贏盡滿城宮心計” (雖然我唔係好明呢個名點o黎?! 有些少odd囉!)

我未追到星期五+星期六o個3集呀, 一skip就skip到大結局…不過都尚算跟(+估)到…個結局雖然都有幾多犯駁位 (例如阿金鈴忽然一o野可以殺死o左馬元贄, 咁容易咁皇上就唔洗一直咁驚佢啦! 仲有阿飛燕忽然轉軚幫三好都係有些少兒戲, 仲有其實就算皇上返番o黎, 阿金鈴都唔洗一下子咁淆底, 又無證據話係佢殺死太后o既, 咪一貫咁死都唔認囉…仲要做埋d奸人一貫o係結局會做o既o野...就係忽然自爆晒自己d惡行, 例如殺死布公公同埋累死三好娘親等事件出o黎...又係有些少落雨收柴囉!), 但都尚算緊湊…係有d追看性…抵佢發圍o既…!

唔知過多兩個禮拜o個套爛到唔爛o既"富貴門"大結局時, 會唔會又搞個富貴門夜宴呢?! 不過以呢套劇的受歡迎程度...我驚10圍都坐唔滿! 雖然我呢期都有繼續睇埋撈家+靚靚+馬德鐘o個段多角戀...其實由始至終我都只係睇呢段…雖然都幾淫亂...但總算幾好睇, 幾有張力…同埋撈家同靚靚都演得幾好! 撈家不停咁撩佢個妹阿靚, 而阿靚想愛又不能愛o既矛盾, 都寫+演得幾好…呢段幾好睇!

有日又click o左入"香港網絡大典"…呢度真係成日都有d搞笑o野睇o架喎~~~可以睇o下"香港網絡大典"之"宮心計"!!!

哈哈哈…有朋友推介我睇呢篇“萬千星虧頒獎禮 2009”…又係抵死…笑o左!

個得獎名單都唔錯…不過我我想要求加入阿萬夫人林漪娸囉…佢今次o係“宮心計”o既演出, 真係十分“金草莓” ~~~

娛圈 360：萬千星虧頒獎禮 2009

無綫萬千星輝頒獎典禮下月 4日舉行，可是這僅屬於無綫高層揸弗的選舉，有見及此，本報娛樂版連日來宏觀網民和視迷意見，舉辦了這個萬千星虧頒獎禮，主旨相當明確──就是繼續鞭策無綫，向爛劇說不！　撰文：蘇芬妮

【萬千星虧】一個連陳志雲、樂小姐同珍姐都冇 say嘅頒獎禮。

最虧女主角
薛家燕《富貴門》
薛家燕由《真情》到《皆大歡喜》，以至近年的《銀樓金粉》，始終未擺脫好姨角色，依然是極盡浮誇之能事，其可怕的笑聲、哮喘般的語調、加上無事也擺出一副中馬票的浮誇表情，被網民拿來改圖戲弄，是繼胡囧囧（胡杏兒）後又一傑作。

最虧男主角
鄭嘉穎《宮心計》
鄭嘉穎比較時尚，演古裝劇格格不入，先天已有不足。撇除這點，他在《宮心計》的不濟演出的確有目共睹，莫講內心戲交唔足，連認認真真望住鏡頭念對白都似乎力有不逮，難怪被網友嘲笑為「橡膠穎」。不過，每當他與佘詩曼獨處演對手戲時，即情聖上身雙眼叉足電，內心戲出晒嚟。

最虧劇集
《桌球天王》
就算鄭少秋預料劇集開播因秋官效應而恒指大跌（跌 663點），也估不到大結局平均收視低到得 27點（約 172萬人次）。講真，套用無綫劇集方程式，將桌球穿插主角愛情線本身已教人呵欠連連，當看到秋官和鄧健泓拿着不倫不類的甚麼倚天 Cue及屠龍 Cue來一記「七重天」（好在冇冰火），畫面又出現比 PlayStation一代更遜的 CG，難道觀眾沒有打爆電視的衝動嗎？



我最厭惡電視男角色
鄧健泓《桌球天王》（靳子謙）
鄧健泓自喚陳志雲作 honey後，即時被力捧，無綫還安排他在劇集《桌球天王》擔任第一男主角，並邀得鄭少秋來襯托他的角色。
無奈入行 10年有多的鄧健泓慘被網友狂轟演技不濟，最慘還拖垮劇集收視，打爛秋官收視保證的金漆招牌。

我最厭惡電視女角色
胡杏兒《烈火雄心 3》（高惠盈）
自從胡杏兒在《太極》一囧成名，凡有她主演的劇集，例必被網民抽出來做個驗屍報告。胡囧囧的確吸取教訓，放棄從前浮誇的演繹方式，可惜她在《烈火雄心 3》的角色設計實太不討好，經常周旋於王喜和鄭嘉穎之間，又不時哭哭啼啼扮可憐。無可否認，這個獎是無綫連累她的！

最虧回歸男/女演員
呂良偉《富貴門》
薑越老越辣，米雪同夏雨等老戲骨之成功，並不代表年過半百藝人一定掂。久疏戰陣的呂良偉回巢拍攝《富貴門》，飾演 CEO卓一元，但阿呂竟冇晒丁力的氣勢，說話陰聲細氣娘娘腔，完全沒有 CEO霸氣。

戚美珍《富貴門》
硬化的表情，單頻的腔調，加上無論興奮、傷心還是抑鬱，均離奇地一個樣的戚美珍，要演呂良偉賢妻對她或對觀眾來說，都是件苦差。雖說好耐冇拍劇啫，都冇話咁甩皮甩骨 o架？

最虧劇集主題曲
汪明荃《愛在天邊》（《東山飄雨西關晴》主題曲）
《東山飄雨西關晴》乃民初劇，阿姐以懷舊風腔調呈獻，絕對配合劇集娘到爆的主題。阿姐起勁唱出第一句時，儼如帶聽眾感受寒風刺骨的冰冷。

宣傳易 Award
恒生銀行
無綫藝員做埋銀行 top sales都仲得。《富貴門》中，胡楓試過不厭其煩的對着鏡頭重複恒生銀行的退休保障計劃有幾好；劇中任職萬基銀行員工的羅嘉良和馬國明，甚至厚面皮到走進恒生開優越理財戶口，邊翻閱小冊子邊讚戶口怎好怎棒。從前沉悶的《宣傳易》變相在劇集播出，別具娛樂性。

飛躍退步男/女演員
鄭嘉穎、周麗淇
鄭嘉穎貴為視帝，他在《宮心計》的演出明顯跌 watt；至於他的舊愛周麗淇也好不到哪裏，這位 05年「飛躍進步女演員」得主，觀乎她在《桌球天王》的演出，居然跟新人差異不大。

最虧新人獎
梁嘉琪《學警狙擊》
演藝學院畢業生首次拍劇先食網民 50大板，演技和樣貌被批評到一文不值，都是無綫的錯。梁嘉琪在劇中飾演有哮喘病的差婆花若葆，執勤都會哮喘病發，身體的確虧。

最具創意特技效果
《宮心計》
《宮心計》以近鏡呈現侍婢的法式水晶甲來表現宮廷的奢華，又借高樓大廈（箭嘴示）現身宮中來凸顯唐朝興盛，也是別出心裁。無綫加插穿崩鏡頭力證《宮》劇乃本地製作，更是用心良苦。


最虧化妝獎
郭可盈《富貴門》
未知是否受到丈夫林文龍的負面新聞困擾，郭可盈拍攝劇集《富貴門》時骨瘦如柴，在高清鏡頭下，凹陷臉頰更無所遁形，但也為其飾演的奸角 Angie增添幾分猙獰感。

最佳潛水藝員
廖碧兒
廖碧兒曾是無綫頭號吸金機，但去年傾續約時扭扭擰擰，結果俾公司放入雪櫃。潛了近一年水，廖碧兒近日傾掂數，日前出席無綫台慶大晒 35D咪咪示人，正式宣佈她和咪咪一起上岸。

最凸出表現獎
陳法拉《有營煮婦》
新一代性感女神陳法拉在《有營煮婦》中，在沒劇情需要下賣弄性感，甚至突破廣管局灰色地帶，在合家歡時段上演一幕脫剩胸圍通屋走，同場加映除褲如廁，睇到觀眾眼凸凸。

終身成就獎
許文彪《大時代》(芒註: 大佬…唔好玩啦! 許文彪點會係“大時代”呀?!?!?!)
陳錦鴻在《大時代》飾演的許文彪，狂轟地產商炒高樓市陰乾窮人：「出面嗰班人呀，佢哋識建築識起樓咩？佢只係攞少少錢出嚟，攞少少時間，炒起個樓市就不停賺大錢。咁叫公平咩？你出去問吓人，是但問一個人，問佢哋想要啲乜嘢？佢哋答案好簡單，只係想要一間好普通好普通嘅樓。點解佢哋要用成世人嘅時間去供一層樓呀？因為啲有錢佬喺度玩嘢呀！越有錢就越有得玩呀！呢個世界公平咩？」呢個世界唯一嘅公平，咪就係你攞終身成就獎囉！


蘋果無啦啦d熱門文章要俾錢睇, 佢咁做真係太傻喇…一定少o左好多讀者! 要俾錢睇我唔好睇第二份?! o個時o係英國, 海外讀者要俾錢睇, 我即刻轉o左睇太陽囉…又唔係唔睇蘋果會死o既!