7-28(fri) 周慧敏演唱會

7-28(fri) 周慧敏演唱會



呢期好耐都無咩機會睇電視, 上星期日終於有機會睇番d節目…除o左所有唔同年紀+唔同階層+唔同職業o既朋友都一致公認為呢期最好睇o既節目“美女廚房”之外, 仲無啦啦o係11點睇到個“周慧敏演唱會”精彩片段!

周慧敏開演唱會, 好多人都問我有無睇, 事關大家都知我係一個“演唱會精”, 逢演唱會必睇…無錯, 前幾年的確係, 但已經“熱情不再”o左好耐! 依家只係會睇一d我之前無咩點睇過o既歌手o既演唱會, 或者係一d真係好鍾意o既歌手o既演唱會, 又或者係最開正我o個瓣o既“懷舊”演唱會…所謂“懷舊”, 意指懷八十年代的舊, 甚至係懷九十年代初的舊…都係o個句: “情意結”嘛!


(大v@1994)

周慧敏…其實絕對係屬於我o地個年代, 但我又真係不曾喜歡她! 雖然佢個人overall其實ok o既, 但總覺得佢yim yim悶悶 (which係我最怕o既o野), 唱歌又唔多好聽…佢又唔係話走音, 但係你唔會覺得動聽o個隻囉…仲要佢有d雞仔聲, 尤其大家知我唔prefer人把聲高音, 個人認為把聲沉沉地好聽好多…所以我唔知佢當時d碟有無佢d寫真集咁賣得?! 我諗除非係好好好鍾意佢o個d, 否則聽碟齋聽佢把聲無佢個樣, 應該唔會太有衝動去買!

所以當年我會寧願聽關淑怡, 王菲, even葉蒨文, 林憶蓮, 彭羚, whoever (當然仲有我最愛o既sammi)…都唔寧願聽周慧敏! 佢d歌, 除o左“自作多情”, “最愛”, “天荒愛未老”, “感情的分禮”等, 我都真係唔識多隻! 今次睇佢呢個演唱會精彩片段, 好多歌都唔識! 有d位特登唔望電視機, 嘩! 真係唱得唔多好聽…唯有望番佢個樣算喇!


(大v@2006)

佢個樣同埋身形, 又真係keep得幾好…我個人認為直頭好過以前囉! 第一, 以前佢作為一個廿幾歲o既女藝人, 當然對佢要求多d; 第二, 客觀地比較佢依家同十年前個樣, 我又真係覺得佢依家仲好o左喎…可能因為佢以前太厚粉 (呢樣我又係勁怕…有期佢直頭走“日本藝妓”路線囉!), d牙又好黃 (唔知係咪煙屎牙?!)…我真係從來都唔覺得佢係大眾形容到咁絕色佳人囉! 同埋佢絕對唔係my cup of tea…通當d少男係會好迷佢, 女仔我就真係無咩聽過話鍾意周慧敏喇!

不過不得不承認, 周慧敏絕對係九十年代一個icon, 甚至可以叫做一個legend! 第一代玉女掌門人, 閃卡皇后 (雖然呢樣一半要多得佢o既另一半倪震先生)…捨佢其誰?! 試問o個個年代o既年青人, 有邊個係無佢張yes card旁身o架 (無論你係好想擁有定係被逼抽到啦o下)?