2006年5月12日星期五

5-12(fri) 女人唔易做結局篇+歐情怡

o岩o岩睇完“娛樂直播”o既吳美珩訪問…又係幾好睇(最抵死o個度係無啦啦“加插o既觀眾打電話上o黎”環節…真係估佢唔到…又係做得好好!), 不過無鄧萃雯o個集咁好睇!

佢真人確係思路好清晰好pro好有威嚴o個隻, 有d令人不寒而慄o個種感覺! 所以佢做親d專業人士o既角色就真係fit晒…但係佢企圖轉型做多d其他角色, 好似今次個怕事小女人角色或者之前o個d“開心賓館”呀,“人間蒸發”角色亦都唔多討好…始終, 佢都係最適合做醫生律師…無法! 同陳慧珊個case一樣! 個款太pro對一個藝人o黎講真係幾局限!



呢幾集"女人唔易做"真係睇得人好激氣...劇情又變得勁騎呢勁婆媽! d人一下子性情大變, 奸得太奇怪...係, 社會係多奸人, 但並唔係奸得咁騎呢, 奸得咁虎頭蛇尾囉!

其實頭十集真係幾好睇, 個故事, d情節都唔錯...唔知點解由上個禮拜開始就怪怪咁! 由高ling忽然同小齊結婚 (仲要無啦啦已經結o左婚成年!), hil姐大肚再bit左個女出o黎, 跟住小齊+高志力+佢老豆又無啦啦走去搞公司...一切都來得太快但又太奇怪!

高ling咁輕易俾人利用去出賣好姐妹, 蠢得令人想打佢鑊甘...仲有佢同小齊o個段我真係覺得有d唔得…而且佢變得太蠻不講理! 同埋講話小齊暗戀佢o個時都ok, 到佢o地拍拖結婚...就真係有d核突! 恕我老套啦! 唔知點解, 呢幾集反而係supposedly係衰人o既hil姐同賤man最討好!



羅慧娟個角色變得太克人憎太無聊…但睇得人好想發笑, 因為實在太over喇...呢幾集猛咁一邊睇, 一邊簡直想講粗口! 可能頭o個幾集佢戲份唔重, 扮o下好人都幾ok, 但呢兩個禮拜佢d戲份重o左好多, 就做得好怪喇! 原來佢都係做番主持好d!

跟住佢個表妹jackie (陳琪個角色), 忽然一集裡面露出晒狐狸尾巴, 仲俾人玩番轉頭, 未免奸得太低層次...邊有奸人咁易俾人玩殘?! 你有咩資格做奸人呀?! 究竟係邊個寫劇本o架? 呢幾集寫得好差, d twist好無聊!

前兩個禮拜輕輕鬆鬆抵抵死死咪幾好囉...呢兩個禮拜除o左d人性情大變, 又搞埋d感情線大兜亂...每個男角同每個女角都有一手咁...吳美珩+林峰+鄧萃雯+謝天華唔在講, 臨尾個歐倩怡無啦啦又鍾意林峰...好混亂! 最唔混亂o個段咪馬國明同個騎呢徐子珊囉...但又見到佢o地都唔開胃!

(仲有, 原來歐倩怡個爺爺個名叫"please"...哈哈哈! 我一路以為只係公司名o黎o乍! pluto已經搞笑o架啦 (唔知點解諗起隻狗), please就真係不敢恭維囉...!)



旺嫂歐倩怡

又係文章分享時間:

同我o地同年, 又係同學仔o既同學仔…歐倩怡!!! 呢期大hit劇“女人唔易做”o既有錢女大配角! 點解我鍾意睇親o個d訪問, 都係d紅過但又勁dup o既藝人o既呢?

----------------------------------------------------------------------------

旺嫂歐倩怡 (壹週刊 2005-12-08 )

借來五套衫給歐倩怡拍照,有成熟韻味,有活力逼人,落差極大。是,我拿不定主意。

歐倩怡,廿五歲,計起來靚仔小生陳鍵鋒也算她培正中學高一屆的師兄,嬌小身形令外表比真實年齡更年輕,成名作卡通片《櫻桃小丸子》主題曲,本來大條道理青春無敵;但,一句「旺嫂」——同居男友郭晉安大她十五年,近期頻頻傳出婚訊,又令人認定她早熟。

即如她出書教製作蛋糕,究竟是提早晉身「乜太與你」,抑或延續大唔透學生妹的家政課?

拿不定主意不只我,歐倩怡也如此,一時揚言請觀眾留意她的事業,一時像小女孩伸懶腰呻自己不太捱得。訪問初段,歐倩怡一派成熟男人背後的女人,含蓄穩重;熱身過後,又可以口沒遮攔到埋怨小學五年級已月經初潮,導至長不高……

於是我開始懷疑:郭晉安怎會搞上Lolita?郭晉安真人並非阿旺,他很cool,入行前做過船廠油漆工、油畫師,全是考耐性的行業。歐倩怡說:「嘻,兩夫妻總要像拼圖一凹一凸,如果我也唔出聲,豈不是好悶?d人成日話安仔唔肯娶我,不如諗?,一個廿幾歲女仔點捨得咁快嫁俾四十歲男人,根本好正常。」

對,《櫻桃小丸子》的歌詞最殺食是「Be Le Ba La」,成熟男人背後,其實正需要一個不太成熟的女人來逗笑解憂,沉默寡言的郭晉安有福了。

問題天天都多

歐倩怡是聰明的,聰明的女人不用裝成熟,天真反而滑不溜手。

七九年生,正如她說,梅艷芳的《壞女孩》於她是童謠,學生時代追星追過鄭伊健、袁詠儀——那麼,按年份計也應追過郭晉安吧?郭晉安成名作《城市故事》在八六年。[芒按: 哈哈哈哈哈…我真係有“追捧”過郭晉安囉!]

「咁又無喎,細個鍾意聽情歌,睇愛情片;《城市故事》那種諷刺時弊劇集,真係好少睇。」郭晉安曾對記者說,歐倩怡不喜歡?上「由細睇男朋友睇到大」的尷尬,這種答法輕輕略過年齡差距,彼此心裡好過點。

OK,就由崇拜梅艷芳說起。歐倩怡父親從事保險,母親做護士,她讀培正,學過歌劇考上五級鋼琴,算得上小家碧玉,九六年參加新秀歌唱比賽,梅艷芳擔任評判,她獲「自我潛質表現獎」,簽約華星唱片公司。


(96新秀決賽入圍者…包括小丸子, hocc同埋鄧健泓)

偶像成功的途徑,歐倩怡都順利跟?走上了,沒料到不過數年,華星宣告停產。

「那時正籌備第二張大碟,已錄了六首歌,停產前一晚,我還在錄音室。第二天,為宣傳做交通安全大使,記者突然告訴我消息又問回應,我著到成身制服(交通安全隊)奪路而逃,像賊捉兵,回家哭了一晚。

「同公司的梁漢文、古天樂一早另有路數,只得我一個戇居居。如果我做酒樓,失業都可以向勞工處求助,藝人又好似唔得……」

歐倩怡說,好在全家信佛,既來之則安之,唯一深入民心是《櫻桃小丸子》。唱兒歌出身本很正常,范曉萱便如此,反正到時到候自可轉型;歐倩怡卻是,以為起步點,原來那已經是歌唱事業的最高峰,沒一點佛家覺悟,怎撐得下去?

錄了的歌沒機會推出,然後久不久會在容祖兒、梁詠琪唱片內發現似曾相識的曲詞,原來華星將版權賣了給人家。

「現在返大陸登台,俾個stage我,雖然觀眾只會點唱《小丸子》,我一樣唱得開心,反正,『問題天天都多』。」

「問題天天都多」,也是《小丸子》名句。

未窮過

從此,歐倩怡形象停留在不諳世務的小女孩,改為拍劇,《秀才遇?兵》演刁蠻千金,《奪命真夫》演富家女,連《怪俠一枝梅》演乞兒,劇情搞來搞去原來也是落難公主。

「我真係好似未窮過。」歐倩怡笑了。令監製選角認定她有錢,除了小康之家生得白淨外,更因為七年前(十九歲)交上郭晉安,現同居於西貢匡湖居,Benz出入。

「那時一齊拍了個旅遊特輯,又不是他追我,又不是我追他,十幾日的工作裡有點好感,回港交換相片,吃吃飯,就開始了。」

歐倩怡說,以前也與大自己十幾年的對象拍過拖,但維持不久。

「嘗試過扮成熟去配合男朋友,好辛苦,這裡(指指腦袋)一定不夠他鬥。要咁似做乜先?安仔喜歡我,我喜歡他,正因為彼此不同。

「當初也想地下情,沒幾個月便給記者撞破,安仔問我要不要講大話下去。本來最驚華星不鍾意不再捧我,沒多久華星停產,無所謂捧不捧了。藝人拍拖都是如此,要驚好多?可以驚,但不要將自己想得太大,邊驚得咁多?

「拍拖節目離不開睇戲唱K。安仔不算悶蛋,從前畫油畫純為賣給遊客賺錢,現在,你以為他還會自閉整天來畫嗎?他很遷就我,人流最多的時間也照拖手shopping。

「問題只是安仔近排太hit,如果無咁紅會易搞?,但作為女人,難道不想男朋友成功嗎?」

歐倩怡應該真是討成熟男人歡心的女人。

不介意做阿四

演藝事業幾不順利都好,歐倩怡心知肚明。「我的不幸運,在很多人心目中,已很幸運。女人的事業離不開結婚生仔,兼顧得到才是大贏家。

「但我對感情有保留,不相信世上有永遠的愛。傳媒只會問安仔幾時肯娶歐倩怡,為什麼不去問我幾時先肯定性嫁人?我自己也不知道。

「針無兩頭利,台慶頒獎(郭晉安獲最佳男主角),不去,人家會話情變;我去,又被寫成跟出跟入做阿四。爸爸媽媽說,有人寫總好過無人寫?。是呀!幾多花旦買晒靚衫搵晒鑽石贊助,都無我影咁多相呀。

「我最大的幸運,其實是我天生樂觀。」[芒按: 呢句真係智理名言!]

郭晉安對女友畢竟尊重。記者想專訪歐倩怡,一心以為取得郭晉安批准便水到渠成,郭晉安卻說:「你還是自己問她好——家強,你也不敢唔俾面老婆吧?」

歐倩怡說:「我唔介意做阿四,只介意騷擾到家人。早前另一本週刊扮舊街坊送果籃拍我父母門,然後借意人有三急入屋偷拍。他們知不知道這樣會連累看更被指疏忽失職?老人家失了業很難搵工。」

講到激動處,她湊近錄音機扮卡通聲說:「果籃收過了,下次唔該送魚翅、鮑魚、燕窩、Plasma……」

歐倩怡就是如此,一番大道理後總愛以一句玩笑一個鬼臉作收結,通情達理得來一笑置之,從不板起面孔——她的腦筋怎會鬥不過郭晉安?


(96新秀雜誌報導)

食蛋糕

歐倩怡精於計算,出蛋糕烹飪書,模仿的是Jamie Oliver。「我睇準時下OL也愛入廚,便不怕被人當我師奶。」

但還是不明白,烹飪需要耐性,怎適合蹦蹦跳的小丸子?

「我希望百足咁多爪,人家歌影視幾棲,我劇煮雙棲囉,不失為求存方法。是,我從小學什麼玩意都三分鐘熱度,但,愛情不是玩意。

「蛋糕不同麵包,整麵包要搓搓,蛋糕呢,要果斷,拂雞蛋講時機,拂到最『企身』便要即刻入焗爐,否則會變稀粒。」

像開花結果也要講時機?歐倩怡又一個鬼臉,笑而不答。

「拍劇亦講耐性,起初不喜歡,覺得那是唱歌不成的安慰獎。安仔叻,但幫不到我什麼,直到去年《奪命真夫》,他開始教我分析角色,他認為我程度夠才逐漸滲些給我。」

歐倩怡樂天知命,刁蠻千金是定型了,新劇《女人唔易做》,又是連鎖店太子女,但今次對白滿口心理學名詞,自言讀書不多(中五畢業)的她一一背誦如流,甚至夾雜日文。

「定型有定型好處,至少是條戲路。人家局限你,你不應局限自己,堅持下去,總會見一點曙光。

「其實我最欣賞的演員不是安仔,是蘇玉華。《阿旺》收得,但我還是喜歡古裝版(指《戇夫成龍》)多些,今次太催淚彈了,搞到好似《天國的雞批》(階梯)。」

廿五歲的口沒遮攔,畢竟識保留,趁她開心問她有沒有附屬咭,她不停笑:「你估?,估中有獎。」

拿她沒法子。

「獎你食蛋糕。」

又一招

歐倩怡是煙民 [芒按: 嘩! 真係估佢唔到!],郭晉安則早戒掉。訪問裡,歐倩怡一根未抽,她說:「還有些心癮。」

這答法,聰明。

否認一句很容易,又倍顯賢良淑德,但轉過頭即被娛記偷拍到豈不肉酸?事實上本刊便曾經影到。誠實不失為最佳策略。

即使認定她大煙剷而非少少心癮,也不得不佩服其耐力,尤其這數小時內我故意不斷朝她吞雲吐霧,伊人就是忍得口,寧俾人知莫俾人見。

歐倩怡繼續說:「有一個方法一定令女人戒甩——結婚大肚,什麼煙酒夜蒲,還不乖乖投降?」

連消帶打,間接催婚而不著痕跡,郭晉安有難題了。