2012年7月20日星期五

7-20(fri) 沒有傳說的登神 馬國明

眾所周知, 我對馬明改觀咗好多年…愈睇佢d訪問, 愈發覺佢o既為人同待人處事真係得…娛樂圈罕有! 對比起陳豪, 我覺得佢先真正係一個筍盤!

睇完呢篇嘢, 你會更欣賞佢o既實而不華, 雖然佢呢d style, 係唔會成為巨星, 但會好kum撈, 同埋人人都會like佢!

同埋我想講, 其實我反而幾buy佢同曾華倩囉!

沒有傳說的登神 馬國明

 是咁的,正當馬德鐘被高登討論區封為「萬能Key馬神」之際,同樣姓馬的馬國明,卻因為在一個訪問中,自爆會用電腦睇鹹網,而得到一眾「巴打」和「絲打」歡心,大讚他夠誠實敢言,更高舉他為「高登男神」。

「我都有上去(高登)睇過,佢哋話我夠坦白呀嘛!睇鹹網有乜問題啫?總之一個正常男人會做嘅嘢,我都會做囉!我唔會標榜我仲係處男囉,咁會好肉酸囉,come on!肚餓咪食飯囉,嗰樣嘢(性)都係本能嚟咋嘛,有乜問題呢?」

唔驚破壞乖仔、純情形象咩?「我由始至終都冇講過我係一個純情乖仔!作為一個演員,我覺得係唔應該有乜嘢枷鎖、有乜嘢形象,唔使行出街買本雜誌,都要戴晒黑超、擺晒甫士咁,成日顧住個靚樣點做戲啫?啲角色唔靚咪唔靚囉!我喺《回到三國》裏面都成日做埋啲好樣衰嘅表情啦!咁嗰個角色(『司馬信』)唔係一個smart、靚仔嘅人嘛!

「我成日都只係想標榜:我係一個正常人!」

是真的,縱使他今天已貴為「登神」,但卻比很多當紅小生更似番個正常人,至少,他肯跟你談緋聞,孰真孰假都寫晒在面上。「我唔介意呢啲嘢,我哋呢行始終係要有o架嘛,多幾個緋聞情侶,去登台搵錢係好好嘅!只要唔好寫得太核突就得喇!」

See,這個在德爾斯廣告裏「傳說中的燈神」,實情是個沒有傳說的「登神」。

不是傳說 1 胡定欣

看馬國明這兩、三年的資料,見報的大都是跟女藝員的緋聞有關,李詩韻、胡定欣、徐子珊、曾華倩名字團團轉,當中尤以胡定欣傳得最密。我索性直接發問:跟胡定欣到底是甚麼時候開始拍拖的呢?「嗯,我哋都係《舞動奇跡》嗰陣開始囉,拍咗年幾兩年拖,斷斷續續咁囉!分手其實好簡單o架咋,只係大家相處咗一段時間,有啲嘢唔係好啱,咁咪分開囉!」拍拖時,大家有協議玩地下情?「係我哋都冇特登去認囉!大家都唔想講咁多,次次都要交代嘅話,唔使做自己嘢咩?其實真係驚煩o架。」

但報道不是說,拍《On Call 36小時》期間,胡定欣為了箍煲,專程到廠探班兼低調客串一場做手術戲份嗎?「佢同《On Call》導演好熟,嗰日佢咁啱喺隔籬廠,導演見到佢,講笑叫佢幫手拍個shot,佢肯咪得囉!唔通我話:『唔好呀!』咁咩?大家冇嘢先會咁啫!

「不過我都明,娛樂新聞會係咁寫,正如話佢為咗我搬嚟太古城住,又話佢因為分咗手而搬走,喂!我住喺太古城廿幾、三十年,佢搬嚟住佢親戚個單位時,我哋都未開始,我都唔知佢住邊!佢搬走,都係因為佢親戚個仔要結婚攞番間屋咋嘛。可能有朝一日,會寫我追番佢呢!哈哈哈!」咁我幫你寫囉。「可能啫,可能啫!」他即時笑得靦腆。

不是傳說 2 都係胡定欣

馬國明坦言,跟胡定欣傳緋聞期間,最令他耿耿於懷的一篇報道,就是指胡定欣姣溝七男的封面古仔。

「我仲記得,呢個封面係佢喺《拳王》啱啱出場嗰日出嘅,話佢乜嘢『姣溝七仔』,呢個報道做乜事啫?我完全唔信囉!我作為一個男仔,都會覺得咁樣寫個女仔唔係咁好睇囉。不過最好笑係,嗰七個男仔中,有個仲要係德哥(監製潘嘉德),你話幾好笑呀!」

那在你眼中,胡定欣又是個怎樣的人?「佢又冇公主病,又會唔會發姣發扽!其實佢係心地幾好嘅女仔嚟o架,又爽朗又唔扭擰!但冇辦法呀,可能佢開頭做啲角色太深入民心啦!同埋如果冇新聞價值,人哋都唔會咁寫你啦!擺封面喎!係咪先?好在係寫得幾搞笑,咪當宣傳囉!同埋佢喺《拳王》裏面,又真係做得幾好o架!所以我諗佢都唔會嬲嘅,不過寫到自己咁差,係女仔都會唔開心嘅!」

有沒有因此乘機o氹番人?「嗯……嗯……咁我都有開解吓佢嘅,我哋依家都仲有電話聯絡。有時遇啱佢睇到我一場戲,佢都會問我點解場戲做成咁。因為我哋大家都係好鍾意做戲嘅人!」再問他,還有機會復合嗎?「暫時做番朋友,大家都幾舒服呀!我哋又唔係鬧大交,又唔係有第三者。始終對朋友要求,同對女朋友嘅要求完全唔同o架嘛。」

不是傳說 3 曾華倩

至於年前傳了多時的曾華倩,又真的拍過拖嗎?「唔係,梗係唔係啦!但我哋好夾,同佢好好傾!佢個人其實冇乜嘢,好好笑o架佢!你識落佢就會知。但係……唔知呢,嗰陣我唔敢開始、唔敢去追囉!」介意她的年紀比你大?「我又唔介意喎!最緊要夾囉!就算係細我十幾年嘅,我都可能得o架!一個人成唔成熟呢,同年紀冇關o架嘛!我識好多四十幾嘅人,都仲係好幼稚啦!」但那時的報道,寫到是幽會啊。

「其實我哋只係普通朋友嗰隻飲吓茶啫,幽會點會去嗰啲地方呢?係咁啱去咗一、兩次飲茶,就畀人影到,我同佢都莫名其妙!好彩我同華倩真係好熟,如果係第二個,真係驚人哋以為我放料出去博宣傳,然後再周圍講吓,跟住個個女同事都以為我係啲咁嘅人,你唔死呀?但華倩就唔會咁樣諗我囉!因為我哋真係好熟o架!我哋到依家都仲係好好朋友,有時喺化妝間撞到,我哋都會雞啄唔斷o架!

「其實我嗰陣並唔介意同佢傳緋聞,我係驚多啲囉!因為第一次傳,我唔知公司會點諗,會唔會照我肺。不過,係囉,嗰陣我係唔敢開始,又唔敢去追囉。」

不是傳說 4 筍盤二號

事實上,這兩年,馬國明所演的角色都很討好,人氣急升,代言、出席活動的機會多了,搵錢也多了,難怪他繼陳豪之後,被封為「筍盤二號」。「『筍盤二號』?未有耐到我啦!陳智燊先係,啲雜誌係咁寫嘅!其實以我角度,只要未結婚嘅,有番咁上下成熟,開始有啲事業基礎,搵到啲錢,都會係筍盤囉!所以陳豪、阿峯(林峯)、Bosco(黃宗澤)、(吳)卓羲,都係筍盤嚟o架!我自己呢,就真係未有耐囉!起碼有間大啲嘅樓,可以畀到個安穩生活屋企先啦,呢啲嘢,我覺得男仔係要有承擔囉!」

但近年的代言和活動,不是令收入大增了嗎?為何至今還未有錢換大屋呢?「係儲到啲嘅,《On Call》之後,我啲job都係多咗啲嘅,但如果有內地劇拍吓,我會儲得快啲,依家啲樓價……等佢落番少少先啦。呢幾年公司唔夠人,我一路都冇期出去拍內地劇,日日都踎喺TVB,已經有四、五套撞咗期,都幾甘o架!所以我都好想公司多啲小生拍劇,咁我哋咪可以多啲時間出去拍劇囉!最理想梗係每年有半年時間喺TVB,有半年喺出面啦!」

換另一個角度,那有女藝員自動黐埋身嗎?「嘩!我好驚呢啲新聞!即係寫到阿邊個邊個嗒自己糖咁,都係嗰句囉,我覺得咁樣寫女仔唔係咁好,好似好cheap咁囉!但你話寫我溝邊個女仔又唔同喎,男仔追女仔天經地義呀!我寧願你寫我溝邊個溝唔到好過!因為呢啲嘢對男仔嚟講,真係冇所謂!」馬國明,你真係太大方了!

登神的Sony Ericsson

被封為「登神」(高登男神),當然不止因為馬國明承認睇鹹網咁簡單,查實,他還有很多可取和可愛之處,有別於其他當家小生的。

例如,他至今仍是跟家人同住,甚至會跟母親拖住手仔出街。

 「我好鍾意同屋企人住,我亦都好鍾意黐喺屋企,屋企係最舒服嘅!所以我一直好想快啲買間大啲嘅屋同屋企人住,因為錢用喺屋企度,永遠都唔會嘥!

「我依家都會同阿媽出街,同佢拖手有乜問題?我由細到大都係咁o架啦!依家佢哋年紀大,好應該係由我哋去照顧番佢哋囉!好天經地義呀!所以我唔驚畀人話我裙腳仔o架!」

 又例如,他不愛追潮流和科技產品,手機並非時下最普及的iPhone或 Samsung Galaxy Note。「我都唔追電話嘅。」說罷,他從袋裏拿出一個格仔包包來,再從裏面拿出一部Sony Ericsson的XPERIA。「呢部機,二千幾,夠用咪得囉!」 至於那個袋手機的包包……「哈哈哈!我阿媽o架。」

信我,在我所認識的當家小生中,用阿媽的包包來載手機,只有馬國明一個。

 " 回到三國"…呢個禮拜我都未睇番…至於"護花危情"…已經變成鍾嘉欣音樂特輯…不過都話呢d無劇情齋係咁情情塔塔的婆媽戲…我like o架, 好似"真情"咁婆媽的, 我也很like!


(2012年6月20日NOW 102觀星台《雙梁計》嘉賓:黃美棋)

有日睇到報紙, 見到話依家被捧為"高登女神"o既童星黃美棋接受梁榮忠同梁奕倫o既"雙梁計"訪問…即刻令我諗起我最鍾意睇o既"刑事偵緝檔案", 所以就click咗入去睇呢段訪問…當日高婕個姨甥女棠棠已經亭亭玉立…真係不得不慨嘆時光飛逝…係幾靚女喎…好少童星大個仲可以keep到…希望佢唔會好似80年代最紅童星李泳豪同李泳漢咁撈唔起啦!