2009年7月23日星期四

7-23(thurs) 王老虎搶親

上個禮拜開始播o個套“王老虎搶親”…套戲未上之前個宣傳短片係咁“搶~搶搶搶搶搶搶~搶搶搶搶搶搶~~~”係幾搶o既…以為會幾好笑o下…但暫時o黎講…em…ok啦…睇o左頭幾集好似係懶好笑居多…有時間又無聊勉強都可以睇o下…無時間就真係無謂攞o黎o徙! 希望佢之後幾集會好d啦…!

咁相比之下“烈火3”又真係好睇好多…雖然佢同“烈火1/2”全部個故事都無關連…不過呢d紀律部隊劇集無綫拍都唔會差得去邊o既! 王喜又的確係最適合做消防員呢d紀律部隊人員o既…雖然佢比起前兩輯真係中年發福o左好多…不過已經比起佢做其他劇好似“珠光寶氣”同埋“爸爸閉翳”o個d個look好好多!

“烈3”雖然係近期比較好睇o既劇, 不過印象中又好似“烈火1或2”好睇d…“烈1”有"南山三虎"o既兄弟情, “烈2”又有瑤瑤同紀德田o個段父女情…仲有當時仲好型o既方中信添!

忍唔住要講多次…點解"大咕窿"呢d咁爛o既節目都可以做完又有做完再有, 死唔斷氣咁…?! 佢之前由獎門人其中一個環節變成獨立一個節目已經夠頂癮o架啦…以為佢做完o左, 點知又可以死而復生, 由一個禮拜播一次變成播足五晚…又係擺你命三千…你買o左個版權都唔駛咁樣播法去虐待觀眾呀…?! 都未睇過d咁悶o既節目...一係你夠膽就玩到盡d, 叫d嘉賓全部著三點式, 咁都叫做有d睇頭呀...依家咁個個笠件t-shirt...連想"目及"女o既觀眾都滿足唔到...咁其實係想俾邊個睇呢?!

書展又o黎喇…今年俾d o靚模玩晒…是但啦…有咁o既demand先有咁o既supply! 但可唔可以唔好日日舖天蓋地咁報導…每日睇, 就算幾正都睇到嫌啦 (何況質素…em…都好過今屆港姐少少o既…)…同埋, 可唔可以包裝得“高檔”少少…依家個感覺有少少cheap! 俾番少少尊嚴自己嘛…小妹妹!
早前睇到呢篇“書展の十不思議事件”…實在係summarize得幾好…超抵死…尤其係theresa o個段!


書展 の十不思議事件

09書展星戰場

香港書展搞咗 20年,得罪講句,幾乎年年都有蝦碌事。就如去年怪風吹襲傅穎連身裙,有誰估到女神會穿阿婆底?鄺美雲為愛犬 Cash撰寫深情日記,但主角不得進場在家獨憔悴;陳苑淇寫下絕對零 Fans的紀錄。不過最精采呢當然是今年 o靚模群攻書展,與道德之士、電車男所引發的恩怨情仇三角錯,嗰頭鬧完又要睇,你話係咪最不可思議先?
撰文:蘇芬妮

傅穎 UFO飛阿婆底 08年

女星在書展爭割肥羊各出奇謀時有所聞,能借助自然界力量的,天下只有傅穎(Theresa)一人。 Theresa去年推出專輯寫真集《Smiling》,既要對抗趙碩之、 Angelababy等 o靚模,又要跟同公司的Stephy暗鬥,內外夾擊。

才女不慌不忙自有妙計,居然想到在灣仔行人天橋派 postcard, 時正值 7月烈日當空, Theresa居然孔明上身來一招借東風,短裙被怪風局部吹起,露出打底褲,成功搶盡風頭。可惜千算萬算, Theresa居然沒有穿 T-back,需知那條阿婆白底褲多麼殺風景呀! Theresa今年再接再厲推出繪本散文集,聲稱遇上疑似鄭中基的愛情騙子,結果被陳輝虹暗寸是幽靈所為,玩完孔明玩幽靈, Theresa真叻女。

趙碩之簽名會腰斬 08年

趙碩之去年推出首本寫真集, 36D胸降簽名會,震盪會展, 200名電車男手持寫真猶如營火會般圍着趙碩之團團轉,結果情況失控,簽名會中途被逼腰斬。當年騎劫書展的,電車男也有份兒。

Cash出書不得內進 08年

入書展買書當然要帶 cash啦,可惜不是人人都可以,至少鄺美雲(Cally)就唔得。去年Cally斥資六位數字,為愛犬 Cash推出寫真《Cash Happy Book》,平日見Cash穿金戴銀食鵝肝嘆水療,過着上等人生活,偏偏會展有嚴文規定禁止動物入場,理得你是神犬拉茜抑或是導盲犬小 Q,害得 Cash落魄神傷好幾天呀!反正 Cash冇得入場, Cally今年新書《雲觀世界》教人用佛學角度投資,無謂勾起 Cash傷心事啦!

o靚模比堅尼搶灘 09年

書展被明星騎劫已是不爭的事實,今年除了一眾 o靚模出寫真集外,連一眾明星名人推出超過 40本書,都算是破了書展紀錄。書展還未揭幕已日日頭條,也是史無前例, o靚模今年推出比堅尼寫真《夏 の盛放》(右圖),引死唔少電車男。講笑咁講,貿發局明年也不需擔心如何推廣書展,反而有如 Isaac哥所說,諗清諗楚怎樣改善噪音、疏通人流、以及劃分甚麼明星區簽名區算罷!

陳苑淇簽名會零 Fans 07年

07年書展現場直播:櫃台搭好了,鐵欄架起了,私家筆也注滿了墨水,陳苑淇一切準備就緒,只等待 fans光臨,這樣等了 5分鐘,等了又 5分鐘,眼見人家的攤位擠滿人群,再看自己的寵物新書《牠們不是名牌》堆滿幾層,這下子陳苑淇心急了,暗忖難道寵物書真的連一本也很難賣出嗎?結果她成為書展簽名人數最低紀錄保持者。與她鄰坐的麥玲玲,以 4名 fans之差力挫陳苑淇。據知今年麥玲玲的新書《女人都是這樣談情的》不會搞簽名會,點解?因為陳苑淇冇書出囉。

Niki疑搵槍手代筆 06年

這個「才女」輩出的新世代,明星出書傳有幕後代筆已不是新聞。周麗淇( Niki) 06年推出《 Child Woman手冊》,由好友傅佩嘉畫插圖,文字聲稱由 Niki包辦,但字裏行間卻流露着傅佩嘉的筆迹。被人笑足一年, Niki翌年食髓知味推出散文集《細味心事》,今年還撰寫日本東北遊記,力證自己滿肚墨水唔使假手於人。

欣宜減 90磅大蛻變 04年

當市面湧現乜乜堂、物物站的特效減肥清單時,大家都對收身療法的成效存在過疑惑。不過只要親眼看見鄭欣宜 04年現身書展的 cute樣,你就會相信廣告口號並非信口雌黃。欣宜當年激減 90磅,推出《我的減肥日記》在書展擺賣,以粉紅色花邊厘士配襯的黑色吊帶背心現身簽名會,昔日肥嘟嘟的形象一掃而空。過百市民圍着欣宜評頭品足之餘,還拿相機拍下這個奇蹟。

謝霆鋒寫真大割價 03年

o靚模出寫真就行通街,靚仔出寫真又如何? 03年霆鋒人氣麻麻,連帶寫真集都乏人問津,結果要大劈價由原價$128減到$45散貨,就連簽名會捧場人數都只得烏蠅仔數十隻,該煨囉!至於自命型男的余文樂當年都輸喺啤梨葉文輝手上,兩人同場較量舉行簽名會,啤梨迷以人海戰術淹沒樂仔,唔講還以為他是啤梨 fans之一。

張小嫻簽名女王 00年

女星 o靚模殺入書展前,全是真正才女的天下。 00年的書展,綠洲就如海市蜃樓般浮現在這片文化沙漠中。當年一眾女作家如張小嫻、林燕妮、李敏、梁芷珊及深雪等都有舉行簽名會,與 o靚模不同的是,她們是真心想見讀者。當中以張小嫻最受歡迎,簽名會由下晝 3點開始,一簽簽到 6點,人龍從未斷過。

刀光劍影成歷史 98年

曾幾何時,香港書展最多人看的並非是書,而是甚麼雪飲狂刀、絕世好劍等名字響噹噹、但僅能開信的模型刀仔。當年書展還會展出漫畫,吸引大批年輕人入場,令真正想來買書的讀者帶來不便。直至 99年,漫畫節跟書展分拆,書展賣刀也成為歷史。