10-11(mon) 楓華再現+sa-will戀

改革後的勁歌真係唔同d…食老本呢d嘢啱晒啦…好過每集都搵d英皇歌手或者班超級巨聲o黎撐場…真係觀眾唔悶佢o地自己都悶啦!

嘩! 上個禮拜六o個集終於等到"楓華再現"...特登要睇高清台一個鐘足本添啦! 真係好感動…從前的紅唇皇子啊!!!睇到我都想即刻哼番句: "你那笑臉迷住了我心智(iq成熟時~)"! 睇得出佢真係有put effort…首先係成個人fit咗好多…應該減咗成十幾廿磅…你估真係咁易咩? 要好有恒心 (係塊面[手查]得黑得滯囉)! 同埋唱功亦都好番好多…至少好過2000年"楓華再現演唱會"o個時好多…應該真係有練過吓! 唱"絕對空虛"o個段無咁好, 但係唱"倩影"真係唔錯囉…無唱歌咁耐算係咁啦…直頭同以前有得揮添呀!

蔡楓華 - 倩影 @ 10-10-2010 勁歌金曲…

(題外話…有說佢當年呢首“倩影”係作俾戚美珍…唔知係咪真呢? 但當年個mv又真係搵戚美珍拍o架喎!)
[更正: oh...search到喇...d前輩話應該係陳秀珠先啱! (http://php.craxy.net/ps/dcs2.php?tid=13028143&p=2)]

見佢因為一句說話搞到摺咗廿年, 真係好唔抵...莫講話佢o個句說話其實只係年少氣盛o既佢一時意氣衝口而出, 而未必真係如d人所講係衝著哥哥而來…而就算真係, 現今歌手比佢失言程度高百倍都有啦...點解佢會搞成咁呢?! (雖然後來d人話佢"失言"之後其實仲未立即o係樂壇消失...呢樣我真係唔多肯定, 又只能怪我生遲咗幾年...miss咗香港樂壇最最最光輝的年代!) 查實我覺得佢講o個句說話頂多係o個個場合+o個個moment講有少少inappropriate, 再加上80年代o既藝人比起現在o既藝人講嘢世故同得體好多, 所以聽起上o黎有d"un耳"...但句說話本身…真係無問題喎! “刹那光輝唔代表永恒”…直頭係至理名言添啦! 所以我o地認為其實佢係無運行多於一切...一個人黑起上o黎真係呼吸都係錯o既!



25年後見佢終於有機會出番o黎唱歌…我都同money姐一樣咁感動囉! 同埋我想講, money姐呢d真係真心朋友囉…有情有義…真係要俾個”like”佢!

同埋蔡楓華今次真係正常過正常喎, 講嘢有紋有路, 對答如流...邊忽似癲? 你癲佢都未癲啦! 我開始有d懷疑佢之前係扮癲囉! 最衰無人upload佢o既訪問片段啦! 仲有, 原來佢真係幾"高大威猛"o個隻...ending佢拍埋晒所有歌手一齊再出場, 佢係高過晒全部人一個頭有多囉…難怪佢當年曾經被封為白馬王子!



睇完"楓華再現"之後, 搞到人好想重溫番d勁歌金曲經典片段同埋更經典o既“IQ成熟時”囉囉囉囉囉!!!

芒姐話過…如果ken choi真係開演唱會, 我第一個買飛支持佢囉!

蔡楓華 - 絕對空虛 @ 10-10-2010 勁歌金曲…


另一樣要講o既, 當然係呢期最爆o既娛聞…"蔡卓妍承認與陳偉霆拍拖 3個月"!!! 呢個真係估佢唔到囉...個人認為又係可以列入“一百歲唔死都有新聞”系列之一!

“姊弟戀”我覺得無咩嘢喎…但佢兩個…總之係一句: “估佢唔到”囉! 上次睇"美麗密令"覺得佢o地呢段"姊弟戀"都幾搞笑, 點知居然嚟真! n年前睇"老夫子"又係覺得栢芝同霆鋒勁襯...但心諗一定無可能...因為當時栢芝同緊東東一齊, 檸檬又緊同王菲...點知後來真係一齊咗...原來呢個世界真係無嘢係無可能! 我諗鄭中基同angelababy睇完呢單新聞都o咗嘴! 同埋阿鄭生應該真係會心如刀割囉...你話如果阿sa如之前傳聞所說撘上內地富商都無咁嬲呀...居然係輸俾william, 簡直剷紋身十次都唔夠...要自刎添呀...慘!

我身邊有好多朋友都勁憎william…我就一般佢啦…不過我認同佢真係mk過mk wong! 正如有朋友refer我去睇吓阿sa個微博…話阿sa d fans o既留言超搞笑…好似「SaSa..我還是不敢相信! 為什麼選擇的是他呢? 我希望你幸福..難道真的要逼著我接受他麼」, 「為啥每次都是快要演唱會的時候搞出這種事」, 「好難接受晚安,我最希望可以幸福一輩子的人,祝福的話實在說不出口呀！怎麽辦，我覺得他不能給SA幸福」,「我愛你們整整八年,現在的我卻很迷茫」etc…wahahaha! 呢d真係名副其實o既"忠粉"…真係好好笑…睇得出佢o地真係感到好晴天pig pig囉!

仲要當你諗到原本年頭係傳angelababy介入, 令中基同阿sa分手...點知原來"實情"係剛剛調番轉 (亦都當然, 真相係永遠都唔會有人知…或者佢o地係夾埋一齊谷人氣都唔定呢…世事有咩係無可能?!)! 依家呢四個人忽然玩crossover…洗牌大執位…佢o地應該約埋一齊去開一轉枱啦! 真係七國咁亂…只能夠話"劇情"未色太峰迴路轉…鷹皇應該食住個勢開套戲拍一拍佢啦!

呢段新聞簡直印證咗世事無奇不有, never say never, 世事如棋局局新囉...::p

(後記: 唔知點解尋晚睇完"娛樂頭條"sa-will兩人現場"演繹"之後...成件事反而變得假咗?! hoho! 在場有人叫佢o地嘴o個part簡直笑咗囉...佢o地兩個似未練熟台戲的小朋友多d...:p)