8-19(tues) 北京奧運之…你又大聲喇!

噢…不經不覺, 奧運已經去到接近尾聲…我比較鍾意睇o既體操同埋跳水都差唔到玩晒喇…後段主力o既田徑我又唔係太鍾意睇…反而依家最好睇依然係d現場蝦碌場面同埋d爛gag!

正所謂蝦碌年年有, 今年特別多…現場直播少不免會有d混亂o架喇…開幕禮o個日俾人大造文章o既蝦碌場面, 首推do姐之“你又大聲喇…”…講到好誇, 又話佢發火閙人…其實睇番又無咩o野o既, 只係大聲d, 可能正如佢所講現場環境真係好噪呢…同埋以do姐o既性格, 呢d所謂“鬧”我相信真係算好小兒科囉! 雖則係咁…呢段依然係幾好笑…仲有楊婉儀o個句: 哇哈哈…幾快番到o黎呀...! 跟住阿叻仲要廢到repeat一次…)


(do姐之你又大聲喇…)

睇完呢段do姐之“你又大聲喇…”, 唔知點解令我諗起呢段”流氓大亨大結局之so what...!"…wahahahahhahhahaha! 我記得do姐有一次訪問, 話呢場超過7分鐘的戲係萬子o既個人表演, 所以佢瞓瞓o下真係瞓著o左, 點知忽然聽到萬子大叫一聲“so what”就即刻醒o左, 但又唔敢郁喎...驚要萬子從頭拍過俾佢鬧死…超爆笑!

其實我覺得dodo姐俾萬子句“so what”嚇醒o左之後, 應該即刻彈起身大叫一句: "你又大聲喇..."呀嘛…wahahahaha! 又或者佢忍o左廿年, 依家終於忍唔到人咁大聲喇! :p


(流氓大亨大結局之"so what...!")

至於其他令人難忘的蝦碌, 當然要數上屆雅典奧運o既“方力申同葉璇互串”o個單o野, 過o左四年, 大家仲依然成日提起...不過其實上次已經講過, 睇番段片, 又好明顯係對緊下一part d稿喎…邊有人串人/俾人串仲要討論“跟住係你寸我嘛…”…不過咁樣播o左出街又係騎呢o既…!


(方力申與葉璇“互串”)

仲有, 要再次讚一讚劉璇真係做得好好呀…講o野好字正腔圓同埋個節奏捉得好好…好適合做主持! 尤其係搵佢做體操項目真係一絕…好有大師姐風範, 同埋佢好有face, 個個師弟妹都會俾面佢即刻第一個行埋佢度接受訪問…佢又會好大姐姐咁摸o下人o地個頭安慰o下或者鼓勵o下d師弟妹…問d問題又好appropriate, 講o野又好溫文, 態度恰到好處, 再加上佢有埋體操o既專業知識…又係得o既!

無綫搵到佢做主持真係今屆奧運唯一加分之處…但唔該無綫唔好再逼佢叫d體操選手們講: "我們就是奧運"啦...即刻肉酸晒, 搞到佢本人都肉酸埋...本來成件事攞滿分o架喇…依家要扣番! 希望佢o地餘下幾日唔好再o係度“我們就是奧運”喇!

其他o個d主持…真係不提也罷! 阿一級豬楊思琦小姐後期已經唔洗做主持, 只係被安排出去介紹o下北京d吃喝玩樂景點…但佢都可以講到口窒窒, 一句完整句子都講唔到…tvb都係安排番佢去做d有得NG o既項目啦…或者俾份稿佢背o左先得唔得?! 講到咁都可以出得街o既?!

至於d爛gag…詳情可以睇: 2008年奧運爛gag收集處!