2005年9月16日星期五

9-16(fri) 妙手仁心3 (中)

其實呢輯“妙手”寫o既感情線都唔算太差o既…除o左悶到揪筋o個段paul+frances之戀…同埋mc+betsy o個段都有d牽強之外!

今期最出位o既應該係曹永廉!!! 一日三線劇集都有佢份 (仲勁過蔡子健擔兩線劇集), 跟住“妙手”臨尾個咩問答遊戲又係佢主持, 播“妙手”之前o個個月餅特輯又有佢份…真係一日走五場!

曹永廉做chris呢個角色真係做得幾好, 好出! 佢o係d訪問度話chris其實就係佢自已o既化身, 佢本身性格都係咁funny, 今次可謂開正佢o個瓣! 其實上次佢都係做呢個角色, 不過今次就更加出…好自然咁流露佢o既喜劇感…尤其佢平時同henry互塞o既對話, 每次都好啜核! 有佢兩個o既場口, 就係笑位所在…d對白都寫得幾精警o下 (雖然可能唔及“妙手1”)!

我諗“妙手仁心”絕對可以話係曹永廉從影十年o既代表作, 仲紅過佢以前做歌星好多! 相信唔止我一個人咁覺得, 因為我都聽過好多人讚佢, 亦都睇過幾篇視評都有力讚佢“沉寂多時終於脫胎換骨”… 我同同學仔都話力追有曹永廉o既parts…除o左同林保怡o既對手戲極抵死外外, 佢同邵美琪o個part都幾好笑…好似家姐教細佬咁o既態度!

但最騎呢o既係, o岩o岩獎門人話我知, 佢睇壹週刊話原來曹永廉已經41歲…41歲喎?! 我無聽錯嘛?! 我以為佢31歲咋…頂多咪35歲?!?!?!?!??!! 佢邊忽似41歲呀? 真係保養得宜! 我以為佢同當年同期出道o既鄭嘉穎差唔多大, 有咩可能已經41?! 咁佢咪成30歲先出道做歌星?! 無o野呀?! 點睇都唔似喎…無論外型定心境都唔似…係咪佢自己記錯o左自己幾多歲呀? 完全匪夷所思! 咁佢咪仲大過邵美琪? 等我仲話佢o地呢對姊弟戀做得非常像樣, 真係好似細佢好多咁…原來佢反而做大過邵美琪…真係十個“晴天pig pig”!

Image hosted by Photobucket.com

而邵美琪今輯呢個look, 都已經型+靚過“妙手2”好多…o個期佢都仍然比較殘! 不過拍“妙手3”時佢都好似未去陳妙瑛度修身, 所以無呢期身材咁正!

真係唔知點解戚其義次次都要安排邵美琪同d細過佢(或者外表young過佢)o既男藝員搞姊弟戀, 跟住又要俾第三者勾o左佢個男友…洗唔洗咁寫實呀?! 真係唔知?景定贈興…又或者係要多d提醒佢同鄭伊健o既故事, 顯示佢作為佢o既前男友係對佢幾咁好!

另外一個不得不讚o既就係姚嘉妮…佢做o個個cheap cheap doctor hunter角色都真係做得幾好! 好真, 好寫實, 我聽d醫生朋友講, 醫院?真係有好多呢d擺明係doctor hunter o既護士…好cheap, 好核突! 下次應該情商一眾醫生去講o下佢o地o既故事! 講真, grace o係初期係一個幾克人憎o既角色…但到中期又變得幾好喎, 好似變番正氣晒咁, 又成日勸呀chris返番anson度…但到後期佢又變得不能自拔…其實佢都有去克制o既, 不過點講都係不道德, 會有報應o既…真係點都要讚多次姚嘉妮做得幾好!

仲有佢個又係做人第三者跟住得到報應o既謢士friend係邊o個o黎o架?! 都做得幾好…唔知佢o係邊度走出o黎呢?!

(下期續)