9-15(thurs) 妙手仁心3 (上)

好喇…要趕緊o係“妙手”大結局前寫番幾篇“觀後感”先!

其實今輯overall o黎講都算幾好睇, 至少好過第二輯…事關第二輯俾人感覺太淫亂喇, 感情線大兜亂, 個個都同個個有路…同埋太多支線, 仲有d唔多討好o既3,4線藝員做“主主地o既角色”…好似蔡慧敏, 陳琪, 傅楚卉咁! 而o係“續集一定唔及第一輯”o既原則之下, 呢套同第一輯都唔算差太遠…不過依然係逃唔過d續集最大o既“通病”(或者有d人反而認為係可觀之處)…就係加得太多支線, 劇情唔夠集中, 顯得有d混亂!

o係無睇好多集之下, 我今日都o係唔知頭唔路之下睇o左今日o個集…無啦啦發現甚麼“猴天花”…完全唔知咩事! 上次就sars, 今次就猴天花…但最老土係話要隔離, 跟住仲要安排grace同chris就地一齊o係間房度隔離…好老土…好刻意!

全劇最好睇o個段感情線係henry-sarah-mc o個段三角戀…早期sarah同henry成日針鋒相對o既段時期, 就更加好睇過依家好多! 吳美珩o係套戲入面個造型幾靚, 幾pro…佢係最吸引o個個! 唔係因為有d人彈佢唔夠靚, 我都唔記得佢初初出道時, 我曾經覺得佢真係幾唔靚o下 (要睇佢初出道o既樣, 可以睇深夜重播o既“刑偵3” <但依家只係做緊“刑偵1”o者>…我記得佢o係o個度做一個國語人角色, d國語講得好好聽…尤其對比起佢o既對手“頭大宇”)…佢塊面太長, 個樣好似一隻馬/羚羊/鹿/同類型動物…當年我仲成日話佢同我o地一個叫“馬面”o既鐘點工人好似樣…但係唔知點解, 近幾年又覺得佢幾靚幾型!

佢呢個sarah o既角色, 令我諗起當年“真情”o既羅生肖, 又係做醫生! 當時羅生肖每次一拎起電話就會o翕自己個名“羅生肖”, 我同個friend仲話覺得咁樣好型, 話以後拎起電話都要先o翕自己個名…當然, 往後又唔記得o左呢樣o野!

仲有佢o係“真情”入面o既情人“越南”…依家同佢距離好大, 一個做主角, 一個只可以做2,3線閒角, 其實黃德斌當時都紅過兩o下, 點知無幾耐又跌番落o黎…真係可憐! 仲有, 原來黃德斌係其中一個一連3輯都有份做o既演員…真係完全唔記得佢…原來佢第一輯係做蔡少芬男友, 唔係有人提番起, 我仲以為佢三輯都做唔同角色添!



我發覺我其實一d都唔算係“妙手”o既fans…事關之前兩輯o既劇情我大部份都唔記得, 亦都不曾深究過! 原來, 程志美離過婚…佢前妻係咪梁婉靜呀?! 我真係唔多記得! 而我亦都無咩印象mc有個仔, 仲要係鬼仔?! mc上一輯都係咁克人憎o既咩?! 我又無咩印象! 跟住我初期仲要一路唔知點解覺得mc上一輯係同袁彩雲, 但係原來袁彩雲係同唐文龍! 亦都差d唔記得林保怡係“清風”, 醫生出書…型呀! 仲有上一輯加o左好多o個d二,三線o既角色, 今集o個d人又唔見晒…我記得有個角色好騎呢地叫呀“peace”…係邊個做o架?! 有無人可以喚醒我o既記憶?!

仲有, 個程志美o既角色真係一輯比一輯唔討好…呢輯已經陷入一個極度乏味o既狀態! 尤其話佢有情緒病o個期, 劇情真係好悶…以前溫柔善良o既程志美, 變到好囂張好克人憎, 成日la口la面, 仲要不停呼喝人…唔知點解令我諗起吳啟華以前拍三級片做變態殺手個look…好想叫佢快d死!

而佢同黎姿o個part亦都好悶, 一日o係度打bowling同食豬骨粥…跟住今集去荒山野嶺搵黎姿,又係用番o個種o係蔡少芬病榻前講小王子故事o既腔口…不期然令我諗起佢o係“妙手1”食住個勢推出大碟主打o個隻“每一分每一秒都給你”既?膽讀白…咩 “我記得你曾經同我講過, 你話一生人起碼要睇到一次彩虹, 今日o既彩虹好靚, 仲有d奇怪, 出現o左好耐, 依家仲o係度…如果你依家起身, 仲o黎得切睇得到o架…起身啦! 我知你已經好努力o架啦!"…忽然間, “妙手1”o既感覺返晒埋o黎!

不過講真, 其實無o左蔡少芬同陳慧珊之後,“妙手”已經不再“妙手”…無晒“妙手”o既神髓! 同埋今輯太多醫病戲喇,描寫主角之間感情o既parts反而失色o左…好似變o左d港台醫學節目“醫生與你”咁!

(下期續)