2006年7月16日星期日

7-16(sun) 補習天王

因為o岩o岩o既“有人撞鬼”事件, 令我思考o左好多o野, 再加上聽/睇o左好多o野, 令我得到左一d啟發…

有日忽然睇到報紙上好趣緻o既補習社廣告, 發現o左一d熟悉o既面孔…真係估佢o地唔到…啞晒!

“靚女律師教英文 Interesting?!?!

Stella Cheng

LLB(Hons)HKU, PCLL HKU LLM City U(end of 2006) Solicitor, Hong Kong Solicitor, United Kingdom
靚女律師教英文 Interesting!

會考英文及高考英文UE全部A級
具有6年專業律師資格,英文水平無可置疑
曾於美資跨國律師行擔任事務律師,現職法律顧問,經常出埠開會,具備與外國人溝通之實戰技巧
會考英國文學A級,鑽研英文達最高境界,寫作及分析能力特佳
中學畢業於港島區著名女校“瑪利曼中學”,多年考第一
中學曾參加“香港傑出學生選舉”獲佳績
曾接受星島日報訪問
耐心教學,幫同學打好英語根基,深受同學及家長愛戴


真係好interesting囉…估唔到佢變o左呢個look, 完全唔同晒style, 仲有d似徐子淇添 (不過又有少少翁靜晶feel)…但居然要走去show長腿, 有d核突囉…點解依家做補習要做到咁?!

d人話有無搞錯, 有律師唔做走去做補習先生?! 嘩! 大佬, 有咩問題呀? 如果我有長腿叔叔o既長腿, 我都轉行啦…又搵得多又無咁大壓力(relatively)…同埋因為吹讀書o既水都係我o既強項!

做律師俾到你盡咪搵十萬蚊一個月, 補習天王有成幾十萬甚至幾百萬, 又塑造到你成個明星咁, 萬人景仰…直頭仆倒去添啦! 係成個包裝感覺有少少cheap囉…真係sorry晒!



另一個又係搞笑, 某日太陽頭版係講佢過檔俾舊公司追討過千萬, 仲要list晒佢每個月收入呀, 支出呀, 背景咁樣出o黎…話呢個哥仔係補習界明星, 好似話當年仲曾經簽過寶麗金諗住做歌星添…佢話雖然月入過百萬 (嘩! 嘩! 嘩!), 但係支出都差唔多百萬, 又話要咩prepare教案, 請assistant, 搵人幫佢包裝形象, 呢樣o個樣…真係似明星多過補習老師…


K.OTen

畢業於本港最高學府香港大學,以雙主修科目(Double Major)英文系及中文系考取港大文學院榮譽文學士。
曾以Part-time及 Full-time 全職或代課任教全港十多間中學。
畢業後首年便以「最年青導師」身份任教於香港教育署成人教育組。
次年更被邀出任香港教育統籌局之毅進計劃各文憑的英文科導師。
首位補習導師因影響之鉅,成為全香港所有中文報章之港聞/頭版 (2006年5月3日)。 [芒按: 係因為被人告…被舊公司追討賠償…咁都可以引以為榮?!]
更成為英文報章南華早報 (SCMP) 之港聞採訪對象。
被香港電台節目萬王之王封為 "補習界萬王之王"!
被太陽報稱之為 "神話"!
被壹週刊稱之為 "新一代補習天王"!
K.OTen經常被邀接受傳媒、雜誌及報章訪問,包括TVB周刊、壹本便利、蘋果日報、太陽報、星島日報、新Monday、明報、華懋會會刊、Yes、明Teens等。
及2006年5月開始己成為全香港、台灣之電視、電台、報章雜誌等所有傳媒之爭相採訪對象。




不過講真, 依家d補習行業真係已經變晒質, d補習先生要包裝成明星…佢o地過檔都要大肆報導, o係網上o既discussion forum好多人討論, 又鬧上法庭, 報紙都會報導, 真係仲大件事過d天王天后過檔其他唱片公司…呢個現象都好騎呢o下!

仲要拍晒宣傳廣告, 有d仲要著古裝整什麼 “無間道”, 真係笑死你無命賠…俾著我見到d先生咁騎呢, 真係唔會去補呀!

早兩個禮拜larp到一集“男人之苦”…係講蘇玉華唔做正統老師, 去o左鄧梓峰間補習社度做補習老師…佢初時好唔習慣, 話似做生意多過教書…跟住鄧梓峰仲講什麼“真人班”同“video班”o既分別, 又送coupon, 又叫d學生撕爛本書…呢part幾寫實, 幾好笑, 幾抵死!

不過其實補習變質都唔係呢一兩年o既事, 早o係十年前我o地考會考o既年代, 都已經係補習社充斥, 人人羊群心態地點都要補番兩科o既世代 (包括我自己)…有d同學連英文都要補, 真係匪夷所思 (我唔係話英文唔洗補, 而係以佢o地o既程度, 絕對無咁o既需要)…不過我後來明白點解…第一, 為出風頭; 第二, 可能都會覺得安心d o既! 我都好後悔無去補, 拿幾個A可以期期上雜誌報紙 (主要係當年最強o既年青人雜誌yes!)…嘩! 你知唔知登一個廣告幾貴呀? 有人幫你期期登廣告見報, 抵番晒啦…d虛榮心滿足晒 (我承認我個人係好虛榮o架!)…仲好似話有得遊埠添呀!

不過o個時最強o個間補習社A in A, 唔知點解咁快手就摺埋o左…定係改o左第二個名我o地唔知呢?! 反而第二最強o既現代, 十幾年後仍然頑強地生存緊, 仲有得同d後起之秀鬥一番!



仲有呢段什麼“從雙丸學習Econ”, 真係好精彩, 亦都真係令到d econ concepts生動易記好多! 好鬼死鍾意呢個補習老師...個feel有d似講波又有d似傳教, 更加似超市裡面推銷隻鑊o個d推銷員哥哥...開始明白點解好似佢呢d咁講o野又懶音又口窒又唔覺得太有料o既補習天王點解可以月薪過百萬...咪就係因為夠騎呢囉! 有咁o既demand, 先有咁o既supply!

你話睇完呢d o野, 係咪會俾人好大inspiration先?!