11-12(thurs) 填詞人最怕的事（上）

o係網上睇到一篇黃wyman的文章…好抵死…內容好吸引我…一定要轉貼上o黎囉! 好期待下集添呀…

填詞人最怕的事（上）
VERSE-CHORUS-VERSE (黃偉文專欄)
《JET》11月號

說最怕？因為不敢說討厭，「填詞人」身段，不敢放太高。

第一怕被打回頭，QC肥佬的貨品從來出不到我門口，大哥大姐你有商譽，小弟也有自己的招牌，觀眾的眼睛就算不是雪亮的，至少也不是盲的，好貨拿出來有時未必驚天動地，但劣品一獻世即刻人人喊打，而且我們這一行，唉~一首寫得差以前有一千首寫得好的都前功盡廢，怎麼敢一邊打麻雀一邊攪拌一堆字出來混飯吃……我出名寧缺毋濫童叟無欺，要麼就不接，接了就一定不留力，哪怕你是天皇還是新丁我幾時試過大細超？冰火五重天從來做到足何嘗有唔嗲唔吊只做「三重」或者「兩重半」？所以你拿着我挖空心思計過算過度過最適合你「士獃佬」的Haute Couture，請給在下一個夠強的理由才好回來退貨……十幾年前我還初出道，還「順攤」的時候，有個概念寫了五六次給不同的歌手，總是被打回頭，那個題目叫「散步」，講兩隻手指在愛人身體不同「景點」遠足漫遊……小美說「你知啦，呢排阿王同鍾麗緹又有啲緋聞，唔係咁方便唱埋啲咁嘅題材……」？？？林珊珊話「阿伊健呢首歌突然間變咗黃埔花園商場嘅廣告歌……」（OK！呢個我明，當我黑仔）……還有其他不同的人的不同推搪理由，總之，寫寫吓連我自己都覺得這個題目過時了不再新鮮了，從此丟落鹹水海。

第二怕無端端被改，而這種怕又分為兩個部份：（A）歌名被改！改名是我人生裏其中一個最大的 Obsession，很多時寫一整份詞就是為成全一個好名字，所以我改的名大家千祈咪「掂」，否則手都斬埋你……但在我不知情的情況下先閹後奏，出咗街我先知也無符，黃栢高為首的相關集團最喜歡做這樣的事，陳慧琳本來有首歌叫〈一億七千萬雙眼睛〉，我承認有點長，但至少幾有型，到派台時Paco卻粒聲唔出幫我改了做〈星夢情真〉，星咩嘢夢情咩嘢真唧？都九唔搭八嘅，但黃先生後來才告訴我，這個名原來是他叫我當時的老闆俞琤御賜的，雙重的大石「責」死蟹，我仲邊有聲出？邪就邪在，這類我認為近乎污點的作品，常常到最後都變成很hit的，即是條褲爆呔那天才撞到最多人，吹脹。

與其說「咁啱」又是 Kelly，不如話「咁啱」又是Paco，幾年後替陳小姐填了首改篇歌，用了個自己儲了很久很喜歡的歌名〈社會的錯〉，那年Kelly是勁歌的「最受歡迎女歌手」，在頒獎禮上「首唱」新作，我才知這首歌又被「去勢」了，居然不顧與內容無關，就咁用返首歌日文原曲的名字〈Ask〉，我都想Ask吓到底是〈社會的錯〉還是Paco的錯？（嗱嗱嗱，一次過順便澄清埋啦吓，阿劉昇媽首〈Phone殺令〉交出去嗰陣明明仲係〈封殺令〉架吓！）

但在眾多被改名換姓的案例中，最最最莫名其妙的紀錄保持者也不是這個，至今仍然令我抓爆頭的是黎明，不是後來變成了〈為了對你再想念〉的〈靜電〉或者無端端改做〈愛瘋了〉的〈受難曲〉（來自04年《Love & Promises》 EP，喂，明眼人一睇就知唔係我style啦），而是2001年替Leon填的〈休戰日〉，其實當時似乎有鋪「改嘢癮」的黎生已有點微言，所以我已後備了一個〈You're so Cool〉給他揀，因為首歌是講「女友將男友箍得很緊」之類的，係係係，我知兩個都唔係特別標青嘅名，「Cool」與「箍」的食字甚至有少少爛Gag feel，但至少貼題吖大佬，失驚無神這首歌在派台時變了無頭無尾兼「倔雷搥」的〈喜〉，係，〈喜〉，你們上網Google一下這份歌詞就明我的下巴當日為甚麼脫骹了。（好在佢無將同碟的其他歌改埋做〈怒〉〈哀〉〈樂〉唧！）

終於講到第二怕的（B），就是在未被徵詢之下給改了歌詞並錄了音印了碟，許美靜的〈傾城〉整段A2給剷走了Repeat A1算數，小事，至少是我寫的；林憶蓮張學友的〈日與夜〉：「最好全部記憶收起，終會淡忘你的臉」那麼平庸那麼無嘢，但畢竟一句半句，就算我不告訴大家這是陳輝陽先生一時技癢的神來之（敗）筆，殺傷力也不太大。歷史上最心狠手辣的整形手術，是郭富城很久以前的一首side - cut〈紀念冊〉，原裝歌詞被「東一忽西一忽地『採用』了」，中間混入了30%不是我的手筆，成品堪稱歌詞界的Frankenstein，最慘那名替我 Nip/ Tuck的高手真人不露相，作詞一欄掛的仍是我的名字，對於那位路見不平拔筆相助的俠士（雖然到底是誰我相信也不難猜吧），叼了光這麼多年，真想說句不敢當。

說慘，我其實不知道明明不是自己寫的但要「認頭」慘，還是以下這個更慘，仍然是Aaron的file，幾年前接到一首快歌的訂單，可是那一年實在忙，到了講好的交詞日期我卻未寫好，唯有打電話去千道歉萬道歉，誰料那邊廂已在錄音室等，並說無論我已完成了多少，都先fax過去「唱住先」，我唯有將寫好的整段副歌交出，奇怪是這天之後，沒有人再追歌詞，直到出碟的那天，我看一看track list「咦，點解我未寫起嗰份詞會唱咗嘅？」原來，對方已不等我自己完成了歌詞，但用了我提供的歌名〈神經〉和Chorus第一句的Hookline 「神經，早已經」五粒字，只五粒字大概不構成「盜用」吧，但明明是我的財產呀，唯有當花籃「豪俾佢」啦，對於那位同行，我甚麼都不想追討，不過我覺得我有講這個故事的權利。

第三怕沒有字典的studio，我不敢說是監製不識字，監製是沒必要識字的，否則也不用俾錢請你填詞，但一位盡責的 producer，錄音室裏至少要有本字典吧！遇上唔識讀的字，就算不想打電話問應該負責的填詞人，也得有本工具書才能自食其力呀，以下是一個有邊讀邊的經典案例，一字記之曰：固。

十幾年前李樂詩小姐有首派台歌叫〈失戀於戈壁沙漠〉，歌詞有句「嘗盡失戀的乾涸」，監製大概認為那「三點水」是廢的，CD裏唱出來是乾「固」；一年後我為（OMG，咁啱又係）陳慧琳寫了首〈Yeah Yeah Yeah〉，歌詞有句「欣賞箇中的意圖」，監製大概也當那「竹花頭」是流的，CD裏唱出來的，又是「固」中。

「個」字看到這一篇文章，應該抹一額汗：「好彩人人都識我唧！呼～」（待續）

************************************

話時話, 我呢期雖然仍然有支持晒兩線台慶劇, 但已經由主打“富貴門”轉軚主打“宮心計”…真係又係你估我唔到喇! 雖然我唔鍾意睇古裝劇, 但都真係俾郭太后的勁好戲+唸古裝對白的抑揚頓挫+節奏吸引…仲有李國麟又係好得囉! 老一輩演員全部都真係做得好好, 除o左林漪娸d戲真係嚇死你…尤其係佢做古裝同埋講文皺皺對白時…做咁多年好似愈做愈退步…佢唯一一個我覺得做得比較好o既角色, 係“壹號皇庭”裡面o既madam囉!

噢賣葛! 頭先去睇wiki…唔覺意發現原來蔡淇俊係張國強同關菊瑛的私生子…oh, 咁震撼o既?! 我都覺得奇o架喇, 佢雖然唔再被受tbb力捧, 但都無理由一跌就跌到落去做比路人甲乙丙多少少戲o既公公o架…原來之後係有戲做o既!

仲有, 我忍唔住要又再講多次…點解趙靜儀會變成咁o既樣o既?! 塊面 (esp.個嘴) 好怪, 好似整容失敗咁…即係佢當選89亞姐時雖然都係o個屆之中最唔靚o個個, 但個樣起碼正常呀…但點解近十年見佢個樣好似一次比一次怪咁…?!

另一個嚇死我o既…當然係my jessie啦!!! 我同大家一樣…依家o係“富貴門”一見到佢…都真係頂唔順要即刻fast forward…佢個樣變到 (+瘦到) 呢, 真係唔講都無辦法認得佢係當年o既“賣車匙~”…雖然雜誌話三嫂係最走樣+減極都仲腫腫o地, 無得同其他劇中的中年女士鬥 (只能同做佢奶奶o既家燕媽媽做“兩姊妹”)…但我覺得佢走樣極都仲有個譜喎…原來女人瘦得滯係比肥得滯更恐怖囉…尤其係上o左年紀o既女士, 有d肉地反而顯得精神d同埋後生d…咁如果兩個揀…我係會寧願揀三嫂囉…sorry呀, 車匙!!!

仲有, 其實陳敏之同羅嘉良係咪會變成一對o架? 可唔可以唔好呢…佢o地真係好兩兄妹…好唔襯囉…同撈家上年拍胡杏兒的不相襯程度有得揮~~~!

同埋, 我覺得王浩信今次做得幾好囉…睇到佢個款, 真係覺得有d克人憎o個隻!

仲有呀, 其實家燕媽媽可唔可以唔好成日失驚無神九唔搭八地跳番part舞呢!? 唔該晒!