8-18(fri) 喜有此理…此有喜理…

上個禮拜有好多節目大結局, 先有做o左幾百集o既亞視版“真情” – “喜有此理”, 又有無線o既 “愛情全保”…其實呢套幾好睇, 不過我依家只係睇到第十集…慢人十幾拍!

“愛情全保”都真係幾好睇, 同埋從中知道多d保險知識都幾好呀! 但係劉玉翠做個懶cool o既律師真係好?命! 仲有蔡子健哥哥點解依家成日做奸人? 阿“紅太陽”劉彩玉又整咩依家成日走出o黎做戲…佢唔係淨係做“都市閒情”o既咩?! 舊年港男亞軍阿Rocky呢期都幾多戲做, 亦都算做得幾好…反而冠軍高鈞賢就真係一年來都無咩發展!



亞視o既“喜有此理”結局篇依然騎呢…最尾o個日仲真係學當年“真情”整個即場phone-in同觀眾真情對話…哈哈! 不過呢套o野係就係超騎呢, 但我有一期都幾鍾意睇o架…事關佢無無聊聊, 仲要勁蝦碌, 有時都幾好笑o下! 初時佢就學“歡樂今宵”咁玩即興, 即日睇新聞, 即日寫稿, 即日播…搞到一片混亂, 但混亂得o黎又幾live喎…同埋其實最鍾意係佢隻主題曲, 好輕快, 好眾志成城, 每次聽到都令人好興奮…”喜有此理…此有喜理…”

舊年11月o岩o岩播時我咁話過:

“前幾日終於有機會睇到亞視套新處境喜劇“喜有此理”(可惜佢同“東張西望”撞時間, 所以o係大部份時間我都被逼放棄o左佢!)…都幾搞笑喎, 好有o個種80年代無線處境喜劇感覺…尤其似“歡樂今宵”! 特別係盧海鵬o係一開場會o翕一句懶押韻o既語句…仲唔係擺明學“蝦仔daddy”?! 係就係無聊d, 不過都叫 “諷刺時弊”, 同埋幾有趣呀! 仲話會搵每日o既時事熱話o黎做主題…好落力囉! 以亞視o既人力物力o黎講, 算係好dum本! 不過元秋d戲真係幾屎o下…但屎又唔代表唔好…咁先浮誇, 咁先好笑嘛!

同埋我最欣賞其實係隻主題曲…好騎呢! 因為上個禮拜朝朝6點半都未目訓, 唔知點解亞視每日o係播晨早新聞之前都會播一次呢隻“喜有此理”主題曲…感覺又係幾眾志成城o個隻! 一輪咀亂七八嘈咁rap一輪…我鍾意! 有d似當年 “卡拉屋企”隻主題曲… “喂, 夠鐘喇, 睇電視, 睇下今集講乜先, 講乜先!” (係, 呢個亦都係軟硬天師“gala gala happy”o既前奏)…但我唔明咩叫“此有喜理”囉…佢又唔似係亂咁調d字呀, 一定有意思o架…係咪我太蠢? 有無人get到點解可以話我聽呢?!”


舊年12月, 我又咁話過: “近期真係好鍾意聽“豈有此理”隻主題曲, 好眾志成城, 好輕鬆, 好開心, 好好笑…d人好落力…尤其樓南光, 唔知卡拉ok又有無得唱呢首歌呢?! 而套劇本身都好騎呢, 好好笑…最好笑係d演員個個都做得好吃力, 因為要即日寫稿即日拍, 個個都好明顯好辛苦咁背d台詞出o黎…好生硬, 好突兀, 但好好笑!”

之後就逐漸轉型, 由每日即興諷刺時弊路線轉o左做“真情”式溫馨家庭倫理長劇路線…連吳浣儀都有感情線…不過佢d感情線反而幾好睇, 幾好笑…今年4月, 我又曾經咁話: “套“豈有此理”騎騎呢呢仲好睇! 呢期話麥家琪患o左個什麼“ka la”失憶症, 逢一, 三, 五就會失憶, 以為自己係學生妹, 仲會著埋校服出o黎! 逢二, 四就都係失憶, 但唔會以為自己係學生妹…d咁o既劇情都俾佢諗到, 真係唔寫個服字都唔得! 完全聞所未聞, 但又幾好笑! 依家好似再唔係每日即場拍o個日o既新聞出o黎…即刻流暢o左好多! 諷刺時弊呢家o野, 亞視未有能力+資源去做到”…

估唔到話咁快就差唔多一年, 套劇終於都要完…



“喜有此理”就完o左, 反而“15/16”就完極都未完, 有d死唔斷氣feel…森美小儀俾人雪之後, 以為搞埋什麼嘉賓主持版就會功成身退啦, 點知佢一個屈尾十話森美小儀雪o左兩個月解凍後, 又重頭o黎過…呢幾集連一級豬楊思琦小姐都可以做主持, 仲要夥拍人氣插水o既賤男梁榮忠, 再加埋d九唔搭八o既嘉賓…真係十分慘不忍睹!

即係唔係話呢個節目唔好睇, 初時一個禮拜一次咪好囉, 之後每日播半個鐘無無聊聊輕輕鬆鬆幾個月都ok, 但依家差唔多搞o左成半年, 咩版本都搞晒啦, 係時候“見好就收”…點知佢o係呢個時候死灰復燃…實在太可怕喇! 點解電視台唔明呢個“見好就收”o既道理? “獎門人”都係播o下停o下o架啦…不如改播收費台o既重點節目“志雲飯局”…我幾想睇喎! 最多佢咪每次o係收費台播完一個月先播o個集囉…咁樣大家都有“so”呀!