6-20(tues) 心大心細

我諗呢期最受歡迎o既電視節目, 除o左世界盃之外都應該係“美女廚房”, 同親個個講佢o地都話笑爆嘴! 尋晚o係間餐廳, 都聽到隔離[木台]d 人話呢個節目好好睇, 真係去到邊都有人談論! o個三o個主持又係得o既, 仲要個節目本身內容都抵死呀! 一定要叫d唔識煮o野食o既女藝員上o黎先得, 識煮就無咁好笑啦!

鄭中基, 梁漢文同方力申仲要每次都排晒舞咁, 幾娛樂性豐富呀! o個四個“粥粉麵飯”其中一個,我認得係呢期有份做世界盃o個個妹妹“阿雪”…佢呢期紅喎!



而禮拜日另一個節目“心大心細”…其實唔係特別好睇, 只可以話ok啦! 雖然林敏驄都幾搞笑, 不過最重要係睇o個集有咩嘉賓…好似o岩o岩o個個禮拜有曾華倩同梅小惠, 所以都幾好笑o下! 自從亞視婦女節目“女人.come”之後, 我就好欣賞曾華倩…以前以為淨係佢得個樣, 原來佢係好有腦, 講o野仲勁抵死勁搞笑…好笑過佢當時個“跟班”主持/現已升級為“懶gag王”o既杜文澤先生好多…搞到我o個時日日錄呢個“婦女節目”o黎睇!

見到曾華倩同梅小惠…不期然令人諗番起佢o地當年o個套“公私三文治”, 又係一套好經典o既處境劇…依家o個d咩“高朋滿座”真係完全無得比! 我記得96年會考期間除o左重播“楚留香之蝙蝠傳奇”同埋“今生無悔”之外, 仲有呢套“公私三文治”…真係永遠都係到最重要關頭先會“好戲連場”o架喎…激死人!

仲有上個禮拜睇“15/16”, 見到好耐無上電視節目o既傅明憲…嘩! 個樣又變o左樣好多, 一定係又再整多次容!



o係網上見到阿叔年青時個樣…幾有型喎! 今年阿叔最後一屆講波, 但其實係無咩得講…可能要到最尾o個幾場先有機會…真係o徙晒!

依家每晚唯有睇o下o個個什麼“伍晃榮日誌”環節…都幾搞o野o下, 勁騎呢! 仲要成日o係度扮打字, 扮寫o野…懶casual咁, 但又好似其實無咩內容!

仲有最抵死係克勤o係佢最鍾意o既英格蘭打o個日真係唔見o左人, 擺明係返屋企睇有線…之前睇報紙見記者問佢有無睇世界盃賽事, 佢就叫記者寫佢“避而不談”…好鬼醒! 但係依家咁樣一有英格蘭佢就請假…係人都知佢搞咩啦…未免太明顯喇!