2006年2月28日星期二

2-28(tues) “富貴逼人”系列

“娛樂直播”又有王賢誌訪問佢d親戚朋友, 今次係佢表姨向海嵐…內容其實有D悶, 唯一發現係阿“向海”其實幾識講o野, 幾大方得體, 抵佢雖然唔太靚, 但可以拿到港姐冠軍! 呢期寫緊介紹“無頭東宮”o既o野, 點知佢又咁o岩講起“無頭東宮”, 話係佢o既代表作 (除o左“楊貴妃”之外)…咁我都覺得佢o係呢套裡面其實已經做得幾好, 同埋古裝好樣過時裝好多! 加上呢套劇劇情其實幾趣怪, 當時都睇得幾高興!

上個禮拜講過“超級靚聲演鬥廳”, 今個禮拜o個輯依然係走o個d“龍鳳呈祥賀台慶”男女大鬥法路線…但個男廳長伍衛國無論係主持功力定歌唱技巧都唔多掂…除o左五十幾歲都keep得幾好之外, 我諗唔到點解要搵佢?! 不過個樣keep得好, 係咪應該去拍劇rather than唱歌?!

又有d舊片段可以睇番, 原來“戲班小子”有無線三虎o既咩?! 我淨係知有董瑋同埋劉華, 但係睇番d片段先知原來仲有苗僑偉同黃日華…真係聞所未聞?!

仲有, 呢個節目依家次次都有羅敏莊, 原來佢已經變o左老牌歌手?! 但係佢扮葉麗儀唱上海灘真係好造作囉! 曾幾何時, 佢以“文員A”身份o係港台做dj同埋客串做杜文惠個唱歌節目“人間定格”o既主持, 我有一半係為o左聽佢唱歌先聽呢個節目…點知佢愈唱愈唔掂, 後期已經變到成個杜文惠咁!

不過佢做戲更差, 繼上次好嚇人o個套“蕉蕉”一屋兩家三姓人之後, 今次o係“天幕下的戀人”又做同類o既”女主角的情敵”角色, 仲要比上次更唔討好, 要做爛賭二! 做戲又唔得, 唱歌又愈見造作, 我呢個曾經幾buy o既“偶像” (其實絕對唔算係偶像, 但唔知點classify佢)…真係唔知可以做咩好?!

Image hosting by Photobucket

今日收到金美姐姐o既英倫特拉法加廣場農曆新年紀念品…”大唐雙龍傳”相架…我覺得幾搞笑o下! 多謝晒! 大家真係見親tvb物品就諗起我…咁我係咪應該放六叔張相入去?!

仲有, 亞視呢個禮拜開始為o左紀念驃叔, 會播“再向虎山行”, 下個禮拜又會做另外一套, 不過我最深刻反而係細個新年時去戲院睇o既“富貴逼人”系列…後來仲將“富貴逼人”+“富貴再逼人”+“富貴再三逼人” 全部租晒番屋企睇! 相信呢d亦係80年代人o既集體會憶!