2006年1月30日星期一

1-30(mon) 春田花花同學會

新正頭不停咁放縱自己, 平時深夜係唔會點會o野o既, 但新年流流覺得要高興d, 食得有咁飽得咁飽…所以夜孖孖走去整番熱我最喜愛o既蘿蔔糕同年糕…年初一仲破例食o左一桶大爆谷…第二日即刻標o左三大粒暗瘡, 真係“原諒我負了代價”!

睇新聞見o個幾個司長今年首次懶係約埋一齊出o黎同全香港o既人拜年…唔知點解, 我覺得好好笑!

跟住o個個第十年o既花車巡遊節目, 居然第一首歌係“傳說”…估唔到呢隻歌廿年後仲hit番! 仲有鄧上文做外景主持, 令我諗起佢幾年前牛高馬大仲有同佢細佬跟老豆鄧英敏出o黎合家做tvb d新年節目…今年點解唔帶埋爸爸出o黎呀? 呢個節目話咁快就十週年, 大家仲記得第一年o既“車?人亡”事件嗎? 啋! 其實呢個活動係由邊年開始變o左夜晚做呢?

Image hosting by Photobucket

年初一同我表姐去o左睇我o地每年一度o既新春電影…今次揀o左“春田花花同學會”…都比我想像中好睇! 一貫地無咩內容無咩劇情, 但都ok好笑…好過我4年前睇o個套什麼“搶包山”劇情, 同埋我最憎常餐快餐環節, 但次次都會重覆呢一part!

最難聽o個隻歌係什麼“齋鹵味”, 好似講粗口咁, 好騎呢! 居然臨尾一睇字幕, 呢隻歌係“葉氏兒童合唱團”唱…?!

呢兩個禮拜不停咁聽到“喜有此理”主題曲o既新年版…其實呢隻歌o既旋律真係幾唔錯, 好輕鬆又好易上口, 究竟幾時卡拉ok先有得唱? 仲要不經不覺原來已經做到第75集, 都真係幾快手! 呢幾個禮拜開始森森代替元秋做佢個角色, 森森雖然演技好d, 但係唔多適合呢個角色, 有d “俱梗”…元秋個感覺百卦+巴喳好多!