2006年3月17日星期五

3-17(fri) 嘉穎仔

首先要特別鳴謝讀者鄧塔, 令我終於有機會睇番"朗豪坊第12集"...多謝晒你o既幫忙!

不經不覺, 今日就係"天幕下的戀人"o既大結局...有d唔捨得添! 下個禮拜o個套...真係太唔該晒! 不得不讚多次...何綺雲真係做得幾好...除o左d克人憎咀臉之外, 前幾日有一幕講佢發現個細妹俾人搞大o左個肚, 大鬧個妹之後再的佢去狂炳個司徒瑞祈, 都係做得好好…真係好有大家姐feel!

Image hosting by Photobucket

點算…呢期鄭嘉穎居然變o左我o既新偶像, 去親k都去唱下佢d舊歌, 仲特登摷番d有佢o既陳年錄影帶出o黎睇! 死未? 上次溫兆倫同邵美琪又係咁, 十幾年前又唔鍾意, 居然佢o地出o左道十幾年先走o黎鍾意! 唔o係呢度講o下都唔知原來有咁多志同道合o既朋友都鍾意鄭嘉穎...哈哈!

喜愛鄭嘉穎就更加係out of character之舉…好唔配合我o既人物性格! 十年來都無諗過嘉穎仔有朝一人會變成我偶像o架嘛! 以前如果有人話我聽佢鍾意鄭嘉穎…我又唔會笑o既, 只係唔會特別認同囉! 一路對佢o既感覺只可以話係neutral, 唱歌就唔係難聽o既…唔太差又唔太好o個隻囉!

睇番佢d舊mv, 尤其係好騎呢咁企o係度齋郁o係對手o既所謂快歌“飛出戀愛街”, 真係好想笑! 阿嘉穎仔真係唔多適合唱快歌! 雖然佢o個時個樣靚仔d, 但一定係依家煞食d…正如有讀話齋, 佢係要成熟d, 有d人生閱歷先更有吸引力! 以前o既佢就好似初出道o既東東咁 (基本上九十年代o既寶麗金, 每年力捧o既新人都係同一個package!), 係一個笑口sai sai o既o靚仔, 但一d都唔吸引! 到幾年前佢復出無線拍"烈火雄心2", d人已經話佢曬黑後好靚仔 (都係呢d黑實型男market勁過白面書生好多…睇古天樂曬黑後o既受歡迎程度就知啦)...o個時係覺得佢型o左, 但都唔係特別buy佢喎!

Image hosting by Photobucket
(1993一千個願意)

反而依家個感覺成熟穩重d, 沉實d (雖然仍附送埋幾分yim悶!)...尤其o係"天幕下"著套西裝, 表現不慍不火咁, 比起mk wong個過份卡通化角色討好好多…原來平平淡淡o既沈朗先最討心歡心! 同埋之前睇劇情簡介講到佢好不擇手段, 但睇套戲又唔太覺喎, 咁都算不擇手段呀? 我又唔覺得佢有利用karen去上位呀!

不過o個段阿詩扮決絕同沈朗分手, 等佢可以無後顧之憂離開佢去星加波發展事業...實在係太老套喇! 呢d橋連15年前o係"浪族闊少爺"時用我都覺得好難受...不過可能真係o個句: "橋唔怕舊, 最緊要受"啦!

Image hosting by Photobucket
(2005三角兩面)

不過又真係估唔到呢套劇真係高收視都呢個地步…我估到會好受歡迎, 但估唔到勁成咁! 不過都o岩o既, 呢期都無咩好戲睇, 同埋呢個朗豪坊實景拍攝gimmick真係幾吸引喎, 至少一開始吸引o左我去睇先! 同埋輕輕鬆鬆鄧梓峰係無死o既! 仲有, 王心慰炮製呢d劇係有一定功力, 除o左上次"甜孫爺爺", 我早排摷番d舊香港電視, 咁o岩睇到90年o既"亞二一族"劇情簡介, 原來個監製又係王心慰! 十幾年前佢已經咁鍾意起用夏雨, 仲有陳秀珠添...都話d監製真係有自己特定(仲要係十年如一日)o既班底! 而佢亦都好鍾意搵多兩個年青新人...當年有鄭伊健同余倩文, 今次有niki+嘉穎仔(sorry, 佢其實唔年輕, 不過至少appears to be!)!

有d朋友o係電視見到周汶錡, 話"oh! 周麗淇靚過佢家姐好多喎!" 依家可能真係o既, 畢竟女人都唔係太kum老, 老o左梗係無咁靚啦...但我好記得niki初出道時, 大家睇完佢個樣都話: "嘩! 係同佢家姐幾似樣, 但點解核突咁多?!" 當然, 依家執過下, 又識得打扮d, 再加上人紅自然靚o既定律, 梗係niki得d啦! 但我諗如果佢同佢家姐同年紀o既時候相比, kathy係靚過niki o既...但我又喜歡niki性格多d, 嘻嘻哈哈, 活潑開朗係得人鍾意d!

原來niki都有blog(如果真係佢自己寫, 咁都寫得唔錯...但我估係d宣傳部幫佢整o既多):

http://hompy.netvigator.com/main/page/nikinikiniki


Image hosting by Photobucket

講番嘉穎仔, 睇o左少少93年新人巡禮, 發覺佢o個年d新人都係"邪", 邪就邪在個個往後o係歌壇都撈得唔多掂, 個個都轉戰電視或電影! 不過咁, 又因為佢o地o個年有一部份新人本身都係拍電視或者電影, 之後先走去唱歌...呢個係92-94年o既trend!

有同嘉穎仔合作”天幕下”o既"車玩玩", 不過佢已經要榮升阿姨級! 仲有同樣係男主角但係擔九點線o個套"鐵血保鑣"o既馬浚偉 (btw, 唔睇番都唔記得佢有首改篇自當年好hit o既國語歌"花心"o既成名作--"幸運就是遇到你"! 上次唔記得“名曲滿天星”定”演鬥廳”佢都有唱…真係差d唔記得有隻咁o既歌!), 仲有依家o既當家花旦黎姿同埋好多套戲都有份做o既"牛肉碎"! 呀, 不得不提係"難兄難弟"?面做肥婆蘭o既白嘉倩...仲有袁潔瑩, 李麗珍, 陳加玲o個jar開心少女組成員! 但係唱得最好o個個, 我覺得反而係你估佢唔到o既吳君如囉! (嘉穎仔個女友阿王馨平都唱得唔差o既...)

而得獎o個幾個, 真係好似全數無唱歌喇, 只係得閒唱o下d主題曲! tvb的金銀銅分別係...男金: 吳奇隆, 男銀: 鄭嘉穎, 男銅: 馬浚偉; 女金: 楊采妮, 女銀: 王馨平, 女銅: 黎姿.

記得當年我係好鍾意金獎兩位得主charlie同?隆...雖然佢兩個唱歌都好唔掂! 可能因為睇完"梁祝", 覺得佢o地好fresh又好襯…當年d人個個都係鍾意睇金城武配charlie, 但我就偏偏鍾意柿隆+charlie多好多! 到依家我都仲ok buy柿隆, 但charlie o係最紅時忍退o左之後, 依家撈唔掂出番o黎已經有好out o既感覺! 所以話, 大勢已去真係大勢已去!

另一樣我好深刻o既就係charlie拿金獎時演唱”不會哭於你面前”入唔到拍子仲伸o左一下?…呢個shot我十幾年來都好記得! 佢o既歌藝, 的確係好失禮! 但當年又真係幾鍾意清純o既佢喎! 仲買o左"不會哭於你面前", "但願你明白"o個d一jar錄都錄到走晒音o既碟! 無法...鍾意係大晒o既!