2006年1月10日星期二

1-10(tues) 勁歌總選經典回顧

無線禮拜日整o左個“勁歌總選經典回顧"節目…其實都係cut番多年來勁歌總選o既精彩片段出o黎, 基本上買o左vcd或者睇番自己d珍藏錄影帶都得…但係佢挑選番d精彩片段再插幾句旁白, 都幾好睇o既…你知我不嬲都最鍾意睇呢d回顧o野!

前幾年d同學仔知我鍾意, 特登送o左頭幾屆 (83-85) o既勁歌總選vcd俾我, 我自己當年亦o係kps執笠前租+dub o左86,87,88o既帶…所以早年o既勁歌, 我都有一個collection…而91之後o既我都有錄晒, 除o左95唔覺意洗o左, 同埋91-93o個幾餅依家都變o左跳到睇唔到畫面之外! 不過又唔會特登?出o黎重溫, 所以今次無線幫我o地重溫d精彩片段都好o既! o個晚本來好眼?, 但係睇完呢個精彩節目, 即刻精神晒!

最抵死係o個日下午見過/提及過o既人, 無啦啦o係d片段都有被提及/出現…首先係播番84勁歌總選譚校長得獎片段…話說當年佢紅透半邊天, 咩獎都係佢?晒, 有一part懶係搞gag…俞琤話譚詠麟你今年威啦, 有好多歌入選又呢樣o個樣, 話佢已經?o左一隻歌, 如果?埋另外九首會點? 校長話會改名叫“譚九章”, 因為九章落地會爆喎! 咁如果十首歌全部中晒呢? 咁就會改名叫“譚1清”, 但係如果一隻都?唔到…就要改名叫譚全罄 (談泉慶)…實在係好…好…笑! 唔該晒!

跟住另一個片段, 就見到money姐, 當然係播番佢最經典o既片段…“剎那光輝唔係永恆”啦! 雖然呢段片其實唔係總選片段 (好似係唔知第二季季選), 而佢亦都唔係呢段片o既主角, 但絕對o係呢件事度擔演一個好重要o既角色…1) 佢個超愕然表情, 2) 企圖截住蔡楓華叫佢唔好再講落去, 3) n年後一講起呢件事仍然有人叫佢回應o下… 最深刻係94年無線有個節目叫“大平反”, 有一集o既主角係蔡楓華, 想幫佢平反番呢件事, money姐亦理所當然係其中一個嘉賓, 佢話即使“紅唇皇子”當年真係講錯o野, 咁多年來佢都受夠啦…我好認同佢呢句說話, 記到依家…雖然, 直至呢一刻, 我都無同佢討論過呢件事!

如果俾著係呢個年代, 蔡楓華呢句說話根本唔係咩一回事, 依家d罵戰呀, “邪不能勝正”呀等言論, 俾蔡?華o既說話激好多啦! 佢唯有嘆句“生不逢時”! 同埋我覺得money姐o既急才同反應都算幾好…雖然佢聽到阿ken o既爆肚都呆o左幾秒, 但之後都企圖截住佢同埋幫兜…表現幾大方得體, 十分唔錯!

如果大家都仲係miss o左呢個片段, 或者想再重溫番呢件80年代樂壇大事件, 可以click番呢條link (尤其係自命“電視精”o既星同學, 居然話連“剎那光輝”事件o既來龍去脈都唔清楚, 我真係好失望, 唔該你重溫o下):


http://www.imagestage.net/files/kenchoi.wmv


蔡楓華的確曾係80年代一個icon, 而佢o既“絕對空虛”亦絕對係一個經典…隻歌幾好聽不在話下, 重溫番佢個鋤到落地o既動作…真係笑爆嘴! 2000年佢“重返樂壇”o係伊館開o左個演唱會, 我都有去支持!

大家仲記得黎明當年參加新秀係唱咩歌嗎? 咪就係扮“芹菜”唱“絕對空虛”囉…連當年最潮o既大shoulder pad都學埋…黎明真係扮得幾似!

又有播90年代男歌手獎爭得最激烈o既年代, 四大天王玩開鎖匙o既片段…劉德華好明顯真係好緊張, 同埋好著緊個獎! 其實最深刻係甩啤牌o個一屆, 人人以為又係劉華?, 點知o黎個反高潮, 居然係黎明…包括劉華本人, 個樣都超愕然! 呢d環節係令人緊張, 但亦令人難堪, 包括睇o既觀眾都覺得太殘忍, 又唔多enjoy, 終於玩o左幾年就返撲歸真唔再玩喇!

跟住又播另一個經典片段, 係89年總選o既“夕陽之歌”vs“千千闕歌”事件, 話當年呢兩隻改篇自同一隻日文歌o既歌曲鬥到難分難解…最後由“夕陽之歌”?到金曲金獎, 陳慧嫻o既經理人仲好不忿添! 呢屆o既總選係money姐同阿旦主持, 我記得呢個係我第一個有錄o既節目, 不過淨係錄o左最尾o個part…咁經典, 真係應該買番呢屆o既vcd!

今次個節目就將兩隻歌crossover…一段播“夕陽”, 一段播“千千”…其實我o地去唱k都好鍾意兩隻歌crossover, 一段唱呢隻歌o既歌詞, 一段唱另外一隻歌o既歌詞! 當年呢兩隻歌真係好hit, 不過要比較兩首, 其實又好似真係“千千闕歌”再hit d喎, 因為夾住陳慧嫻暫別樂壇之勢!

今日見到大我四年o個個表姐, 佢居然又同我講呢個節目…佢話同個二十出頭o既同事講開呢個節目, 話記得當年又好似係“千千闕歌”紅d…但個同事居然同佢講: “eh…千千闕歌…o個時我都應該出o左世o既…” 有無搞錯呀, 細路…唔好扮細喎?! 84年勁歌我都有睇啦, 當時我仲識唱晒金曲金獎“愛在深秋”全隻歌o既歌詞! 不過我近年先發覺, 原來真係有好多人細個都無得睇電視…就算有得睇, 都無得好似我咁“放肆”咁睇…小時候o既我, 真係好vee!