3-8(sat) “美七”

前兩日睇勁歌, 居然有鄭嘉穎同周麗淇一齊上去唱“最美麗的第七天”o既插曲喎! 個人認為佢o地合唱o個隻“抱著空氣”好聽過主題曲好多…隻主題曲真係好八十年代“大江南北”o個隻feel (不過“大江南北”好聽d!)…無綫仲要玩o野到叫鄭嘉穎同泳兒一齊演繹隻歌…點解要咁玩鄭嘉穎呀? 鄭嘉穎雖然真係好有型, 仲要接近40歲反而愈o黎愈型, 型過以前廿幾歲時的“棒球小子”年代好多…但係唱功又真係差d…仲要拍埋泳兒度輪流唱…呢個安排擺明玩o野!

Oh, o個晚勁歌仲有海潮…點解佢會出番o黎o既然?! 報紙話佢徇眾要求有唱番經典名曲“海潮”…但o個晚居然無播到…激死!

至於套“美七”, 其實真係幾令人失望o下! 難怪收視一路都唔高! 劇情係完全唔得, 又話更有深度更感動人, 真係暫時都仲未feel到囉…去日本o個段都幾牽強o下…有d搵戲o黎做 (雖然日本個景真係幾靚…但亦太過hardsell“專業旅運”, 連訂機票o個part都要做埋, o係日本架車又係要不停咁影住個“專業旅運”標誌…同之前情況極度over的“歲月風雲”hardsell雅芳婷+恒生有異曲同功之妙…um…呢個都好少少o既!)…portray到周麗淇好似低能白痴咁…同埋如果現實中你真係遇到游志穎呢d人, 其實正路係會走夾唔透囉…首先你又劈友又行古惑 (雖然佢實則唔係, 但你見到佢咁你都驚啦), 再o黎一單懷疑殺死自己女友事件, 仲要咩都唔解釋咩都唔講, 跟住一下子飛o左去日本唔鬼見o左! 只係因為大家知道佢係男主角應該唔會係壞人…但係如果你係劇中人, 都真係應該幾驚o下! 比著我都揀程醫生啦…起碼背景無咁複雜嘛!

同埋後段未免太慘喇…又話niki會死…真係走“天國的雞批”o個d慘情韓劇路線…溫馨小品咪好囉…搞到咁慘真係唔多想睇! 上次“天幕下”雖然都有d天馬行空位, 但成套都睇得人好開心, 輕輕鬆鬆鄧梓峰加埋俊男美女靚人靚景係佢成功o既最大因素…今次你搞得太慘…真係好影響人心情o架嘛!

跟住廣告時段唔覺得 [手禁] o左去亞視, 見到個新節目“主播天下”, 係搵d新聞主播以閒談形式講o下時事, 都幾有趣…唔知大家有無睇過呢? 亞視搞o下呢d突破少少 (雖然以前都好似做過呢類形式o既半新聞節目) o既時事節目, 好過拍劇啦…反正劇集實唔夠無綫鬥, 反而時事都可以搶o下d唔睇劇集 (尤其我發覺d阿爸係幾鍾意睇亞視o架) o既觀眾! 仲有o個個咩“今日法庭”, 講o下每日法庭的特別案件…其實係有d無聊, 不過題材亦都算幾新鮮, 同埋唔洗自己度咁多內容, 亦都好過o個d吃力不討好o既咩“行行任篤笑”…所以都值得鼓勵o既…等我有時間認真睇o下個節目先!

另外o個套“太極”…劇種我係一d都唔buy, 不過d人我鍾意, 所以我都會睇o下! 吳美珩真係好有氣質, 好有貴氣…抵佢嫁得咁好! 胡杏兒o既民初裝 (or古裝) 真係完全唔得…上次“亂世佳人”已經俾人插爆, 依家又再o黎多次…無綫真係唔好咁玩佢啦, 俾佢做番o個d現代有型專業人士或者嘴jell jell妹妹, 或者“野蠻”o個隻喜劇, 佢會做得好好多…佢一做苦情戲真係趕客! 喂, 不過林峰個民初look真係ok有型…唔知我係咪bias喇…你話我聽!

至於深夜o個套“酒店風雲”…呢期個chloe開始多戲, 佢個角色真係好煩同埋超唔討好…派個咁o既角色俾佢真係無運行! 最諷刺係劇中係話官恩娜d英文好差, 要惡補英文…有時吳唱k仲會教佢添…真係諷刺到爆! 你會見到官恩娜好刻意扮講唔正 (但好突兀)…而吳教佢時反而又真係講極都唔正…點解要咁樣角色對調?! 但係無綫d戲成日都係咁安排o架喎, 上次“衝上雲霄”, 又係班女仔英文好好但又唔洗佢o地講, 反而不停要d男星獻醜, 偏偏佢o地又係全個圈講得最差o個幾個…好鬼可憐!



Wow…仲有呢段“TVB大俠羣星會”…之前有朋友send俾我問我有無睇過?! 又真係無喎! 唔知幾時播o既呢? 完全無印象…同埋點解無啦啦會有呢個節目, 係咪用o黎打亞視d咩大show呢?! 有無人記得?

嘩! o個一代o既小生真係個個都幾打得…劉華同偉仔o個時仲有d肥嘟嘟添…好可愛!