7-3(sun) 多餘！藉口！鍾意嗰陣玩屎都話好o架啦啦啦啦啦~~~

嘩! 呢期d娛樂新聞真係好爆…個人認為某程度上楊思琦狠飛拍拖九年o既李永豪比起鋒芝o個單更爆…第一, 係因為鋒芝變已經睇到悶喇, 第二, 係因為楊c琦一向個形象係極度純品近乎低能 (觀乎佢一向o既對答)…居然一嘢做到咁絕, 聲都唔聲就飛起李永豪…佢o既狠真係無人能及, 相信形象比起傳媒形容到佢好拜金o既廖碧兒更插水! 反而鋒芝你明知佢哋兩家人都係愛登事家庭咁款, 佢哋做咩都唔會感到咁驚訝!

同埋其實阿思琦姐要分手無問題, 合則來不合則去, 尤其係根本大眾一向都唔睇好佢哋…但佢咁樣處理法真係令人O咀…同埋會唔會殘忍咗d?! 依家大眾係中鄙視豪仔變成勁同情佢! 明明上個月仲同人拖晒手咁出o黎慶祝生日, 又話就快結婚…一個屈尾十居然飛起佢, 仲夾硬話係幾個月前o既事…咁即係當時係走出o黎做戲? 同埋觀乎個男o既反應, 應該真係事前毫不前情 (應該未好戲都呢個地步啩?!0…仲要一腳撘兩船呢d係群眾最鄙視o既, 如果真係有埋餡就更加唔知講咩好…同佢一貫個形象未免太大落差, 似乎佢真係唔想再出o黎撈!

其實如果佢一早話同李永豪分手d人完全唔會覺得反感, 第一d人一向唔睇好佢哋, 仲話佢飛得遲, 應該早d”醒覺”添…但佢依家咁一腳撘兩船仲要拖到最後一刻先忽然一下子飛人, 就真係處理得無可再差! 佢呢d想兩者兼得 (或者至少想兼到要爆煲o個一刻), 唔想做抉擇, 唔樣做衰人, 拖得就拖就搞到今日咁…好鬼肉酸! 同埋豪仔真係好鬼慘咁!

真係只能夠話…世事真係無奇不有, 仲有世事如棋局局新! 你今日以為咁, 點知聽日已經變成第二樣…呢期d娛樂新聞真係日日新鮮日日甘, 追慢一日都追唔到…仲有, 睇高登o個d comments又係啜核 (尤其咩以遞補機制, 應該由同一名單的李泳漢補上…好賤格, 但我笑咗!)…不過都唔夠呀鼎爺, 佢真係句句都咁抵死! 咩“多餘！藉口！鍾意嗰陣玩屎都話好o架啦。”, “（分手有冇先兆？）邊有呀？死人都有先兆啦！”…又真係好有道理…金句連連…鼎爺好波! 思琦妹今次就真係…一舖清袋喇!



至於李家鼎就火爆地表示唔明楊思琦點解會無端端嗌分手，和鬧爆思琦多年來黐飲黐食外，講到有指思琦嫌李泳豪迷上玩飄移賽車嘥錢，鼎爺更怒火中燒地說：「多餘！藉口！鍾意嗰陣玩屎都話好o架啦。」



楊思琦同李永豪分手唔講原因 [18:12] 2011/06/28

【東方互動 專訊】 楊思琦出席公開活動時向傳媒表示有重要事情宣佈，她眼泛淚光的說：「我同濠仔（李永豪）分手！」但不肯透露原因，問何時作出這個決定，楊思琦說：「幾個月前已經有呢個決定，選擇依家講，係因為想事情淡一啲先，咁樣我會容易啲同大家講。」雖然與李泳濠的愛情最終以分手收場，但楊思琦依然維護男方：「愛情冇話對錯，唔想有太多揣測，一直以來外界對濠仔印象都唔係太好，唔想再有負面報導。」

李泳豪提分手嗚咽　鼎爺爆晒粗

【on.cc 東方互動 專訊】 晚上七時半，李泳豪在父親李家鼎陪同下到電視城為新劇《拳王》開工，全程木無表情的他，因經不起傳媒追訪與楊思琦分手，不禁數度嗚咽，他說：「真係唔知點解！不嬲都冇事，我今日都未聯絡到思琦，都唔知道點解會咁講，我哋最近喺前日通過電話，仲係男女朋友咁！（一度嗚咽）都唔知發生咩事，點解佢有咁o既決定？大家咁多年一齊都有付出。」之後情緒激動的他要求中止訪問。

至於鼎爺對思琦指兩老一早知情，即激動得爆粗：「佢癡線o既！我都唔知咩事，仲plan緊結婚。（分手有冇先兆？）邊有呀？死人都有先兆啦！上個星期都仲同佢一齊食飯。」

至於被指是第三者的Andy，巧合地在微博留下勝利宣言：「十一年的感情終於有了結果。我將會盡最大的努力，照顧和愛護她。我相信我一定能讓她幸福！」

8點幾o個套”團圓”其實想點? 呢幾集已經好d…頭5集老套到呢…想講“溏心風暴”o個隻家族爭產但又無咁有彰力…有d似“真情”但又唔夠婆媽! 同埋用咗成10集去解釋人物關係…搞咩呢?

d人話陳錦鴻似少年萬梓良…又的確係形容得幾好…佢真係郁吓就好激動…好萬子囉! 咁多個依然係郭晉安d戲最好…個角色幾型添! 唱k呢期d角色依舊有d廢, o徙咗佢…其實佢近年d戲improve咗好多! 同埋之後係咪會鋪排徐子珊同郭晉安會撘上? 兩兄弟愛上同一個女人呢d橋段呢? 睇依家個發展似係會咁! 仲有好少見陳曼娜做好人, 做呢d委屈女人…都做得唔錯, 因為佢一向係演開d潑婦o架嘛! Toby演技亦都好似進步咗!

至於接”怒火街頭”o個套”真相”…睇咗少少, 其實係幾ok o既, 但點會兩套律師戲接住咁上, 雖然話兩套係唔同style唔同approach…但係咁樣排陣法都係有d怪! 睇多幾集先再講…