11-1(wed) hocc live in unity concert

以下又將會係好長o既一篇日記…同上幾次一樣, 請自行找廁所位!

真係唔知點解…每次一講親演唱會, 就會寫成二萬幾千隻字都寫唔完…上次軟硬/草蜢又係咁, 今次何韻詩都係咁…

剛剛過o左o既禮拜五, 去o左睇我好鍾意o既hocc演唱會…不過唔係尾場囉! 尾場居然有另一個我曾經好喜歡+喜歡o左好多年o既女歌手sammi…o徙晒! 佢兩個仲一齊唱o左sammi隻經典歌曲“癲檔”…oh, 我無得睇實在太可惜了! 兩個“偶像”共冶一爐 (係咪咁寫? 唔係好記得…), 好難得o架嘛 (雖然兩年前sammi個演唱會, 都曾經出現過呢個場面!)…不過算啦, 因為係我個秘書妹妹 (依家已經變o左舊秘書妹妹喇…) 特登買飛半請我睇, 仲搵埋佢一jar親朋戚友一齊睇…但係全部都細過我...哎! 可能因為我個樣生得低能, 無人相信我係佢老細…其實我已經想盡辦法搞老自己…電鬈髮, 著得成熟d etc…希望可以pro d, 但都無咩用…真係搵笨!

同d“小朋友”睇演唱會又係別有一番滋味…因為佢o地好young & energetic…會感染埋我! 同埋因為坐得前, d fans好群情凶湧, 一開始就企晒起身…o係受佢o地感染同埋唔企起身你會俾人遮晒o既情況下, 差不多企足全場, 大叫大嚷 (好少見到咁樣o既我呢…)! 不過搞完一整晚真係好鬼累…畢竟我都老喇!


(hocc+sammi)

今次演唱會氣氛真係好勁o個隻, 因為我相信去得睇何韻詩演唱會o個d, 一定係好鍾意佢o個d, 否則根本唔會買飛入場! 唔同話你去睇李克勤或者twins o個種…即使唔係特別鍾意都唔會介意去睇o下o個隻…所以d die hard fans係特別瘋狂o既!

芒姐每次去親演唱會都會打分, 不過要做到公平公正不偏不倚…其實又真係好難! 畢竟今次我都算係fan屎心態…唔同之前草蜢, 軟硬或者郭富城!

Um…咁講啦, 如果我個人認為…即係subjectively, 係可以俾到佢九十分o既 (請自行去對比番其他演唱會所得分數)…但係如果作為一個普通觀眾, objectively, 又未必太高分…事關佢d歌唔夠入屋呀!

唔係話佢d歌唔好聽, 而係你不能做到好似草蜢咁, 就算我唔係佢o地fan屎, 都幾乎可以識晒佢o地所有歌…因為當年電視/電台日播夜播, 真係做到陪伴我o地成長囉! 但係hocc d歌呢, 有幾首可能大家都會有印象, 但係大部份可能都無咩點聽過!

我已經叫做差不多佢所有歌都識晒, 但係近兩隻碟o個d又的確係聽少o左o既 (同埋我個人認為佢最早期o個d“光榮之家”呀, “千千萬萬個我”係好聽過佢近期o個d咩“光明會”好多囉! 而最精彩o個隻碟就當然係歌頌八十年代o個隻啦…你知我同佢一樣咁喜歡八十年代), 所以有d歌都唔多識…佢輸蝕在就係唔夠入屋, 唔夠大路. 同埋d歌唔夠hit囉! 鍾意佢o個d就會好鍾意, 但係唔識佢o既, 咪就係會完全唔識佢個人+d歌囉!

有朋友問我如果係咁可以提議佢點做? 第一, 我唔係paco, 我都無咩資格去comment; 第二, 我都真係諗唔到…其實我覺得又唔需要點改善o既, 反正佢一路都唔係走入屋路線! 咁樣可能不能做到大紅, 但總算有自己一班支持者, 仲要係足夠去紅館開夠三場o既數量喎…算好好o架喇!


(例牌同d souvenir影張相)

其實睇到佢有今日, 都好戥佢高興…畢竟都欣賞o左佢好多年, 直頭可以話係由佢參加新秀開始! o個時覺得呢個女仔幾有格, 唱歌又幾好, 同埋個感覺幾不拘小節, 幾爽朗…係我好buy o個隻style!

睇好o左佢十年, 見到佢終於都熬出頭來, 都好感動…其實佢個感覺似係一個同你一齊成長o既朋友, 多過一個“偶像”囉! 畢竟大家差唔多年紀…見到佢呢十年o既改奱, 又諗o下自己呢十年…由中學生到大學生再到今時今日呢個芒姐…究竟做過d咩有建樹o既事呢? 哈哈…睇佢呢個演唱會, 就好似同佢一齊回憶呢十年咁!

o係o岩o岩入大學o個時, 有個同學仔勁似何韻詩…我係指把聲 (個look都有少少似o既…當時啦!)…就係因為咁, 我特別留意呢個同學仔…因為我比較欣賞女仔把聲沉沉地咁…大家都知我最怕嬌聲人! 不過呢個同學仔依家成個look都完全唔同晒, 唯獨把聲仍然幾似…哈!

仲有, 去睇呢個演唱會前又撞到另一位同學仔, 佢居然話唔知道原來我喜歡HOCC…實在太過份喇! o係我o既日記都提過無數次你都唔放在心…我block左你等你無得再睇芒姐日記!

節錄兩篇曾經提及hocc o既entries (其實我都係要自己去google度search番先記得)…咁樣唔洗由頭講過d來龍去脈嘛…


http://hejnom3.blogspot.com/2004_10_31_archive.html
2004-10-31:

其實時下o既歌手, 除o左李克勤 (校長都ok o既, 不過略嫌有些少out)同鄭中基, 根本無一個真係識講o野, 可以搞到氣氛…新一派o既何韻詩都算幾好 (我指口才…歌藝同舞藝就更加唔洗多講啦! ) 我敢講佢o係不久o既將來一定會成為“最受歡迎女歌手”!

我記得o係99年, 我表姐曾經問過我繼之前睇好鄭秀文同埋楊千嬅之後, 會睇好邊個?

我答佢...何韻詩 [雖然我唔知當時佢知唔知何韻詩係邊個]!

…其實佢o個時根本未有碟出, 係有得做o下sunday新地帶, 翡翠音樂幹線主持, 拍o左套“反黑先鋒”, 同埋偶然o係d騎呢節目 [例如當時夜晚12點幾會有個加州紅o既10分鐘唱k節目]度唱兩嘴…但係自新秀之後我已經覺得佢好掂…所以我見到佢有機會出碟都好高興…至少證明我o既眼光!( 大家記住我今日o係呢度講過呢番說話, 免得日後話我口講無憑! 哈哈哈哈哈!)



http://hejnom3.blogspot.com/2005_01_27_archive.html
2005-01-27:

o岩o岩聽o左何韻詩隻新碟…真係掂喎! 雖則我不嬲都好buy佢, 但客觀地評論, 我真係覺得呢隻碟抵讚…唔怪得知佢話劉培基都罕有地send個message去讚佢!

最抵讚o既係佢呢張大碟o既主題…居然係向我最鍾意o既80年代致敬…“政治”十分正確呀! 所以隻隻歌都好有80年代色彩…尤其依家plug緊向梅姐致敬o既“如無意外”…我直頭以為係改篇自80年代o既舊歌添! 真係幾好聽!“艷光四射”o既快慢版都各有特色, 改o左陳百強隻“等”o既“明目張膽”亦都唔錯…係一隻水準之作! 無啦啦寫o左個碟評添…但係我真係想向大家推介hocc隻新碟嘛!

“勁歌”無o左hocc做主持, 確係失色不少…一係搵鄭中基, 一係搵佢個緋聞男友劉浩龍都ok 呀(劉浩龍依家俾人o既感終於都無咁廢…我都好戥佢高興!)…點會又係amigo o架?!

雖然我仍有每個禮拜“追看”(基本上由8歲開始都keep住有個個禮拜睇), 但係已經無咁熱衷…畢竟好似hocc呢d又唱得又talk得o既主持, 真係無咩幾個…我諗到o既就只有李克勤同埋鄭中基, 女o既就真係只得佢一個! (90年代初sammi主持“週點”都做得幾好o既!) 靚佢就真係唔多靚o架喇…但勝在有型同埋有性格嘛!



(得o既得o既得o既…@1996新秀+2005翡翠歌星賀台慶)

大家知道前文後理之後, 都會知我曾經係幾咁喜歡hocc (繼sammi同千嬅之後)…真係由佢新秀時已經開始留意佢!

o個年佢o係度唱maria cordero隻“o徙氣”係咁“得o既得o既得o既得o既…”…我仲記憶猶新 (雖然舊年“翡翠歌星賀台慶”佢又玩多次)! 仲有佢天才表演時扮城城又唱又跳“鐵幕誘惑”, 其實佢跳舞都幾得o架…不過都唔夠同我o地一樣大, 當年只得16歲o既旺嫂歐倩怡唱phantom咁頂癮! 仲有最早俾人叮出局o既“賤男二號”鄧健泓…點知佢輸o左之後一個屈尾十就做o左兒童節目主持, 後來仲係三個之中第一個有得出碟o既添!

o個年新秀同之前eason+千嬅+滕麗明(名)o個屆我都有勁睇…96年因為o岩o岩考完會考有個超長暑假, 更加係咩電視汁都撈埋! 仲癲到真係想去參加o下新秀o架, 反正好似幾好玩咁…不過見到要大熱天時去禮頓道一號排長龍咁辛苦, 所以都係無去到lu…哈哈!

記得o個年hocc話為o左評判梅姐當年參賽件戰衣同埋為o左見偶像所以參加新秀, 所以印象好深刻…覺得呢個參賽者都幾有趣! 仲要把聲同個style都同梅姐幾似…最終仲俾佢守得雲開贏o左再得埋件金色戰衣…見到佢得獎個樣真係好似d小fan屎咁開心, 都好戥佢高興! 跟住過幾年仲俾佢做埋梅姐個徒弟…又真係幾傳奇o既!

新秀之後佢同歐倩怡都簽o左華星, 仲唱埋小丸子主題曲…大家記得o個時小丸子/歐倩怡有幾紅嗎?! 佢走cutie路線+把聲又咁嬌俏係適合去唱小丸子o既…但係阿詩把聲咁沉再加埋個型格style, 唱唱小丸子真係有d格格不入…o個時覺得要佢唱兒歌真係o徙晒! 唔係話兒歌唔好…我本人都係兒歌fans…但係要o岩style先得o架嘛!


(hocc@小丸子)

之後見佢一直浮浮沉沉…主持o下“sunday新地帶”+“翡翠音樂幹線”+n個旅遊特輯…同埋夜晚12點幾加州紅唱k時段…雖然都係一d好o既訓練 (你唔見華星個個新秀出o黎都主持“sunday新地帶”o既咩? 梁炳, 千嬅, eason, hocc, 劉浩龍etc…sammi都主持o左成年“週末任你點”啦! 其實華星呢個安排都唔錯o既, 起碼可以訓練到d新人口才同埋面對鏡頭都淡定d, 仲有就係都係o個句…入屋d嘛!), 但係hocc唱功咁好無得做歌星又真係o徙o左! 同埋覺得以佢o既條件, 成就真係不止於此囉!

當時我都有因為佢而成日錄“翡翠音樂幹線”o黎睇 (加上我以前真係幾鍾意睇呢個節目)…仲有, 99年佢幫tvb拍o左套電視劇叫“反黑先鋒” …係同陳浩民一對, 佢好似係做一個老師添…其實呢個形象對咁rock o既佢o黎講都幾係怪…不過我o個時都幾鍾意睇佢! 好記得o個時有d電視discussion forum有人問呢個女仔係邊個? 話個樣唔算靚, 塊面太長似隻馬 (sorry晒, 不過唔係我講o既)…其實我覺得佢都ok好樣, 同埋勝在有格嘛! 好靚就絕對唔係, 不過都唔差呀! 但係呢, 佢都係唱番歌會好過做戲扮淑女好多!

記得上緊呢套戲o個期, 咁o岩成日要去佐敦練歌, 試過o係澳洲牛奶公司+o個頭附近撞過佢幾次…不過當時無咩人認得佢! 其實o個時我都有諗過不如去搵佢簽番個名, 再話佢知我表姐o岩o岩問我睇好邊個後起之秀往後會成為最受歡迎女歌手…我話睇好你o架! (但我相信如果我真係咁講, 佢都會幾驚o下!)…同埋呢d咁odd o既o野我基本上係唔會做o既, 尤其當人o地係享受緊私人時間, 無謂要人簽名啦…雖則當年o既佢都應該ok高興o既, 同埋我睇佢個人都唔似會托人手[月爭]o個隻!


(hocc)

講番今次個演唱會呀…之前都講過, 其實每個歌手第一個演唱會, 都會係最好睇o既, 因為佢o地儲o左幾年歌, 一定會係第一個演唱會唱晒出o黎…之後o既演唱會要搞突破, 所以未必一定好睇!

咁今次係我欣賞o左咁多年o既hocc第一個演唱會, 更加要睇啦! 佢基本上都真係唱實所有有plug過o既歌咁滯…唯獨係之前講o個樣囉…佢唔夠多真正大hit o既歌! 其實可以唱番幾首其他人o既歌呀…尤其係佢偶像梅姐o個d, 同埋其他八十年代歌手o既歌都唔錯呀!

有一part個theme相信係講八十年代…o係佢唱“你是八十年代”之前, 都有一jar dancers出o黎跳o左好多八十年代o既經典舞步…例如大家最熟悉o既“無心睡眠”的“腦交戰”動作…我以為o個part佢會唱番d八十年代o既歌…點知無! 其實佢係現今o既歌手之中最有資格去唱番八十年代d歌o既…因為佢同我o地一樣都係成日話自己熱愛八十年代…同埋我相信佢當年都睇唔少電視或者聽唔少歌! 如果呢part加番d八十年代經典歌曲…咁就perfect喇!

另外最impressed相信都係佢十年後再跳番“鐵幕誘惑”囉!


(hocc@1996新秀《鐵幕誘惑》)

同埋, 佢呢個演唱會個look實在太太太太似梅姐喇…我以為自己睇緊“美麗傳說”添!

hocc唱live依舊係幾有水準…不過我睇o個晚佢把聲都有d沙! D人成日話佢同盧巧音係twins,分唔清佢o地邊個打邊個…我覺得真係sorry晒佢囉…佢唱歌好過盧巧音咁多 (其實各方面都好好多)! 自命實力派o既盧小姐唱功有幾唔得我都講過好多次, 無謂再講喇…希望佢真係會檢討o下啦! 要明白不進則退…仲要係退得好勁o個隻!

雖然我相信阿詩唔介意俾人話佢同盧巧音係twins…因為現實生活佢o地應該都真係幾friend o下! 事關o係以前friendster仲未有得揀轉private o既時候, 睇過好多明星o既friendster…盧巧音呀, 劉浩龍呀, hocc呀, even徐浩縈咁…o係d testimonials度睇到佢o地真係應該幾friend囉! 其實佢o地走o既路線係幾似o既, 不過唱功又真係差一截! 我唔知點解candy會倒退成咁?


(梅姐)

哈哈…其實我除o左欣賞hocc o既唱功, 舞功, 口才, 把聲沉沉地之外, 仲有我最buy o既英文好呢…同埋佢男仔頭o既性格我都好欣賞…因為似我呀嘛…哈哈哈! 仲有一樣, 就係佢個名最後o個兩個字同我個名其實都幾相似o下…所以份外有親切感! 見到佢d fans舉住“阿c”字樣o既牌…直頭當佢o地係哎緊我添啦! 哈!

仲有, hocc呢個short form/nickname真係幾型o下…邊個改o既呢?!

Oh, 原來佢寫o野都唔錯添…大家可以去睇o下佢個blog…都update得幾密o架! 依家d明星都真係個個都要寫番個blog先夠潮, 先可以留住d fans…正所謂“用心留住你”嘛!

阿c都算寫得幾唔錯o下 (今次呢個係objective standard)…內容不俗, 幾趣怪, 幾係佢個style, 好似真係聽緊佢講o野咁, 同埋佢個人都幾有創意…可能佢都愛蔡一智啦!


HOCC BLOG