2007年12月8日星期六

12-8(sat) 歡樂滿東華2007

好多年無live睇過“歡樂滿東華”, 今年因為要準備搬竇, 忙到甩“碌”…星期六係最後衝刺時間,所以全晚留o左o係屋企執o野, 因此係近n年o黎第一次留o係屋企幾乎睇晒全個節目 (雖然中間落o左街買o野...miss o左呀欣宜的精彩表演)! 雖然今年d表演一d都唔吸引, 但我居然覺得成個節目都ok好睇...我終於發覺…原來我根本就唔係鍾意睇d環節本身 (除o左”卡拉之星”啦), 而係鍾意呢種馬拉松式live show, 同埋o個種眾志成城的現場感覺...好似當年我最鍾意o既節目91年"忘我大匯演"咁!

主持人選今年無o左肥姐, 又無埋志偉…都好弱雞o下…連貽興王都有份…不過又居然無o左amigo! 而honey又居然有得o係新聞前的黃金時段唱歌, 連孫耀威都要1點幾先有得唱…真係無o野好講!

今年的表演嘉賓cast唔止係好弱, 直頭係超弱! 最勁o既環節可能已經係yumiko+周汶錡個什麼“超級『希』『錡』勁飄移”…個環節名就真係超級稀奇喇! 其實我相信佢o地個表演可能係幾有難度, 但一d都唔好睇! 呢d咪就係吃力不討好囉…莫講話飄移, 其實就咁泊位我都覺得好難, 記得n年前學車每次不停練泊位時我都泊到想嘔 (係真係想嘔, 可能成日要倒後望?!)…所以我絕對覺得佢o地呢個表演係有難度…但係就唔好睇, 同埋最慘係睇起上o黎好似無咩難度, 所以根本唔應該構思呢個表演! 反而o個jar新人個“空中疊羅漢”好睇好多…! 同埋阿周汶錡成場“嘴喵喵” (雖然我知佢可能有d不屑阿yumiko, 但戲你總要做d o架啦…), 真係唔知想點?!

鍾麗淇段肚皮舞, 都ok 既, 不過坦白講, 其實我覺得如果唔係梁榮忠的車震事件, 應該唔會搵佢表演一個環節, 仲要係黃金時段…都係想搞o下gimmick o者!

Oh, 仲有…好高興可以再見到"律政新人王"三個舊人一齊出現o係一個環節, 反而唯一一個有得冧庄做“律2”o既陳鍵鋒就無o左影…what a pity!

仲有, 最鍾意o既一part就係個節目臨尾唱"東華心"時即刻剪番全晚o既片段...係咁多喇!

至於最萬眾期待o既“全台藝員卡拉之星大唱遊”環節, 正如上一篇所說, 無o左魯振順同王俊棠…真係失色不少…完全無晒吸引力, 可以熄機! 其實上年開始都已經整體水準下降, d人完全唔夠放…依家連佢兩個鐵膽都無埋…實在令人太失望! 佢o地之前係咪話過唔再參加? 究竟咩原因? 係咪無人捐錢俾佢o地? 就算係, 無綫都應該籌夠佢...無o左佢o地仲點吸引人睇呢個節目…善款數字都即刻會下降啦...!!!

阿黃玉鳳 (樂兒) 姐姐 雖然有o係度, 但居然無份唱…佢係咪籌唔夠錢呀? 其實一兩萬蚊自己捐o左佢都好呀…點可以無份表演o架? 佢當年扮sammi唱”典檔”同埋將”babe”讀成”Barbie”都係經典!

好彩仲有阿“手語人”王維德, 同埋家燕姐班fans, 真係好鬼落力又好鬼pro...家燕姐個look都幾有趣, 同埋佢揀輕快歌係o岩o既…氣氛好d嘛!

手語人依舊走晒音+唔o岩拍子...不過呢樣先係佢o既selling point…夠騎呢嘛! 同埋睇得出真係好落力...下年可以考慮叫埋伍小生一齊唱新歌“請…坐…低” (不過未出, 或者齋o翕先啦)! 佢似乎真係好鍾意劉華呀o下, 年年都唱佢o既歌! Oh…我仲見到佢家姐王敏明幫佢伴舞呀...佢雖然比以前肥o左少少, 但呢個年紀算跳得好好啊...好過佢細佬好多! 見到佢即刻令人諗起哥哥o既”MONICA”, 仲有"蓋世豪俠"一夜白髮再加成身紅衫搞到我好驚的情景!!!

仲有, 梁政珏 (“同事三分親”的may may) 化o左個濃妝反而好怪, 個樣好似陳穎妍, 佢o係"同事三分親"個清純look好似靚好多喎! 同埋依家做兒童節目個陳嘉露姐姐…佢真係唱得幾差o下, 同埋個樣好唔得…佢細細個時同個孖生姐妹成日做YES!的fitting model, o個時都幾可愛, 幾靚女…點知過o左唔夠10年, 依家咁廿零歲就搞到成個師奶咁…點解會咁o架?

同埋, 王友良唔係歌手o黎o既咩? 洗咩參加卡拉之星呀? 好心俾番d機會d四, 五線藝員…人o地一年先得o個一次深宵做主角的機會…你應該上番勁歌啦!

Oh…好懷念前幾年的“騎呢之星”大唱遊…仲有腦震盪o既“多d拍手掌, 包你時時有福享, 中大獎, 唔駛走去搶…”! oh…又係those were the days…!