3-6(mon) 難兄難弟

上回講完隻原聲大碟, 今回都係時候講番套劇…一向最鍾意睇呢d歌舞片, 仲要係懷舊o個隻, 更加頂癮! 97年首播時無機會o係呢度同大家分享我o既觀後感, 所以今次重播點都要盡情講!

不嬲深夜如果偶然遇到d鬼馬粵語長片, 我都會被吸引?o係度睇o下…尤其係時裝/歌舞/工廠妹o個隻, 總之得閒有d五六十年代香港景睇o下o既, 我就好鍾意! (連“巴士奇遇結良緣”我都睇過幾次!) 又可以睇o下香港多年來o既轉變, 又可以知道當時香港人o既生活…粵語長片都有佢可觀之處…但如果一做“篤篤撐”就可以拜拜喇!

講番呢套戲, 佢由粵語片年代講到電影息微, 再講埋唔洗收費o既無線電視, 再到ending o既90年代…簡直一套戲講晒香近50年歷史…I like it!

睇到d人著住d懷舊格仔衫又唱又跳, 扭頭扭髻…隔幾場就有歌舞睇, 最鍾意呢d (所以都好鍾意睇當年松松姐姐o既“天涯歌女”…因為集集都有歌聽有舞睇!)! 雖然佢o地跳得有d吃力, 但幾好笑! 尤其兩個女主角排晒舞跳“莫負青春”o個段, 仲有李奇同喬峰扮野花, 笑死我! 不過記得當時見佢o地一上“勁歌”o個d節目要自創o下舞步就亂晒籠…都係睇套劇正d! (題外話: 去k時睇到真寶珠姐去年個演唱會, 有五公主 [欠芳芳姐同寶寶姐]一齊跳“莫負青春”…幾位auntie夾埋近三百歲, 但跳得仲好過呢兩位青春花旦…粵語片年代d藝人係跳得喎! 仲有, 我覺得依家o既沈芝華有d似翁靜晶!)

d劇情係就係無聊o架喇, 但就係“輕輕鬆鬆鄧梓峰”先睇得開心…睇o左咁多次 (其實都唔係好多次, 至少唔會睇呢part就知道下一part將會講咩), 好多無聊笑位/小動作都仍然笑死你, 證明真係幾好睇…係一套我唔介意全家一齊睇o既戲!


(97年難兄難弟原聲大碟)

呢d講粵語片時代o既戲, 係趣怪d…因為即使d用詞, 語氣, 生活習慣…都同我o地o既好唔同, 淨係呢d, 都夠笑死你! 你都無解o既…

有人話吳鎮宇扮得唔係好似謝賢, 話羅嘉良扮李奇似d! 但我話其實唔係, 因為呂奇本身多特徵, 易扮好多; 同埋其實最尾o個幾集吳鎮宇扮老謝賢真係扮得好似…演技呢樣o野, 始終吳鎮宇高幾班!

不過最驚喜o個個都係張可頤, 呢套真係令人眼前一亮…因為陳寶珠不嬲無咩太明顯o既特色, 完全無人估到張可頤做呢個角色可以咁大放異彩! 連d語氣, 舉動都學埋…真係好出, 同埋個造型都好靚…抵佢因為程寶珠呢個角色上到位!

其實撈家都做得好好, 尤其d小動作同語氣都好人發笑! 哈…呢期我最鍾意學李奇講o野!

扮得最唔似o個個, 相信都係邵芳芳! 唔係話宣萱演技唔好 (雖然都唔見得特別好), 但真係無忽似囉! 不過依家睇番, 宣萱o個時真係靚好多, 呢幾年佢老得好快, 面色仲好黃!

做阿珍已經嫁o左人o既滕麗明o個時cutie好多, 以前d牙參差不齊反而可愛d…依家換晒牙, 係就係好齊, 但太artificial! 謝源個妹黃紀瑩o個時d懶音真係勁得好交關, 依家都仲係, 但原來已經好o左好多! 仲有, 林曉峰真係幾鬼馬, d英文亦真係幾唔錯!

做寶珠個馬姐o個個“人生交叉點”剔小姐陳燕航 (點解咁記得佢個名? 因為當時阿旦次次都o翕一次剔小姐同交叉小姐個名) 亦都做得幾好, 幾似一個馬姐喎!

原來追狄華o個個程寶珠個阿哥…“百萬富翁”陳啟泰係扮緊劉家傑…我睇o左十幾集都唔知?!


(98年添食o既神探李奇迷你月曆)

劇情方面都算ok, 仲可以帶出好多60年代香港o既特色! 又爆好多粵語片年代o既趣聞…于素秋做戲要搵人配音, 曹達華賭馬, 狄娜拍艷情片, 仲有扮任姐同仙姐o既苑?丹同郭少云都做得好抵死, 好鬼似! 尤其係苑仔…唱都唱得幾似! 仲有“女殺手”, “玉女添丁”, “工廠妹”呢d, 都係60年代的經典!

有一集佢o地以為謝源死o左, 講佢回魂…雖然已經睇過, 但今次睇依然笑爆咀! 同個個講起, 都係話最深刻呢一幕!

仲有好記得李奇幫謝源幕後代唱o個一幕…佢唱到喊…好慘! 呢一幕好深刻! 隻cd都有收錄吳鎮宇特登唱得好難聽o既version同埋羅嘉良懶唱得好version o既“姑娘十八似花嬌”!

同埋, 佢o地唔知邵芳芳同戴眼鏡o既高秀萍係同一個人, 實在夾硬o左d…戴o左個眼鏡唔係有咁大分別呀?

睇番d外景, 又係粵語片取景最多o既雍雅山房…但係唔明點解d椅次次都唔同色? 我懷疑佢o地係咪年年都油過顏色o既呢?!

(p.s.之前去鳳城食飯, 見到一個茄喱啡同佢老婆去?外賣, 個waitress仲叫佢虞生…終於o係呢套劇見到佢做酒樓部長…原來佢叫虞天偉!)