2005年9月12日星期一

9-12(mon) 香港迪士尼之路人甲乙丙 (中)

繼續講埋未講完o既香港迪士尼頭啖湯之旅…呢排迪士尼員工o既態度不停咁俾人投訴…以我所見, 都算ok o既, 不停咁懶friendly, 懶好笑容; 坐火車環樂園遊o既時候, 去到邊d員工又要懶係同大家揮手…但最大問題係佢o地係好typical o既香港人, 本身個樣其實好寸, 但又要扮到懶friendly…即係好似你去到旺角見到全條街o既sales唧出笑容同你揮手, 反而變得好假…有d核突! 我寧願佢o地自然d, 畢竟香港o既文化同外國唔同, 唔可以用番同一條橋o黎“照版煮碗”!

反而同遊樂園o既其他遊客, 就個個都異常friendly…以前叫人幫你影相, 都未必個個肯…依家d路人不單止樂意幫你影, 仲極度落力, 幫你捕捉一個最正o既angle…仲要叫你笑o下呀, 望邊度呀, 影完又叫你睇番個效果…睇o下洗唔洗再補多張! 可能依家有o左數碼相機o既關係, 一影完相就可以睇番影成點, 所以幫你影相o既路人甲乙丙都變得負責任好多, 驚你唔滿意佢o地影出o黎o既效果…所以比起自己影相更落力!

但亦因為有o左數碼相機, 所以大家都有“濫影”o既傾向…係又影唔係又影, 幾乎行三步就影一張相…以前用菲林相機時唔會咁o架嘛!

Image hosted by Photobucket.com

o係人逼人之中, 亦都見到好多明星同名人…我見到o既就有古巨基, 傅明憲, 森美, 馬清揚同錢慧儀.

o個日睇“先睇星期四”, 森美就全集都o係度講佢去迪士尼o既經驗, 佢仲拎番佢o個日戴住o個頂慌死人睇唔到o既浮誇帽上鏡…佢話現場有好多人同佢影相, 咁又係真係o既...戴住頂咁o既帽, 想見佢唔到都唔得啦! 不過有樣o野我好認同佢講, 個叉燒漢堡真係唔多好食…懶係話有特色, 但味道麻麻…早知食芝士漢堡啦!

其實我今次去迪士尼令我諗起海洋公園o既兒童王國, 事關佢o既面積真係細到可以媲美兒童王國…真係不愧為全球最細o既迪士尼! 而o個個“睡公主城堡”亦都矮得可憐…都未見過咁寒酸o既城堡o架!

同埋兩者都有首頗難聽o既“主題曲” (其實not exactly係主題曲o既, 應該係電視廣告歌)…o個時隻 “兒童王國…做主角…快樂常有…與小丑挽手” 已經夠?膽o架啦…依家o個首咩“o黎迪士尼做足準備”就仲頂癮…被大眾公認為一首好騎呢o既廣告歌! 我o地話要作番首風月版o既“他約我去迪士尼”…叫“他約我去迪士尼酒店”…話唔定可以同kellyjackie平分春色, 大hit起上o黎…甚至同佢一齊獲邀出席迪士尼開幕音樂會…陪o下佢, 等佢唔洗俾有線娛樂新聞台影到好可憐咁on居居自己一個企o左o係個酒會度發呆! 真係睇到都戥佢慘!

(待續)