2007年10月21日星期日

10-21(sun) 楊千嬅all about love演唱會2007

想講好耐, 一直未有機會! 上個禮拜去o左睇“楊千嬅all about love演唱會”…眾所周知我曾經都好buy阿千fa, 所以雖然佢呢期d歌我都真係o翕唔出, 但點都要去支持o下佢o既! 點知, 話俾人聽我去睇佢演唱會, 居然係換o黎俾人笑的下場, 仲要唔止一個…實在太可憐喇! 佢雖然呢期人氣跌, 又無好歌…不過, 畢竟都有d感情分o既…同埋佢d歌, 又真係陪伴我o地度過好多年青的歲月!

其實佢次次演唱會我都有睇, 由第一次00年“少女的祈禱”o個期要撲飛, 到呢個演唱會話佢d飛滯消, 都咪話唔可憐! 不過可能呢個真係娛樂圈o既定律, 無論你幾紅, 總會有機會跌番落去, 大起大跌, 就係娛樂圈的遊戲規則! 你參加得, 就遇o左!

又可能因為全無期望, 仲要不停聽埋d“你預o左聽佢係咁走音啦”的“勸喻”, 個演唱會又出奇地ok喎! 我承認04年睇佢演唱會係幾失望, 因為都唱得幾差o下, 但係今次出奇的進步番d, 雖然唱快歌時依然唔得, 同埋d快歌同舞蹈本身都好唔得, cut o左呢part唱番多d經典舊歌會好好多!

我諗佢都真係驚無得撈, 所以都下o左一番苦功去練番d歌, 同埋佢今次最醒就係都算唱番好多舊歌, 而佢最煞食o既…就係呢d! paco年代d歌都勉強ok, 但跟o左“左手又係肉, 手背又係肉”o既黎生後, d歌真係除o左“唔該晒”之外係俾唔到其他更貼切的comment! 所以佢今次最醒就係無咩唱新歌, 因為都無人識!

其實佢由一出道就遇到好多好歌, 尤其係華星年代, d歌真係揀得好好, 好有健康少女味, 開正佢當年條路! 當年華星幫佢搞o個個image, 成個packaging都好得, 同埋佢d碟真係每次都好精美! 華星捧新人, 的確有一手!

雖然今次都仲有好多好正o既舊歌無唱, e.g. 我最喜歡的“再見二丁目”, “直覺”, 仲有“笑中有淚”…不過我明白都無可能唱晒o既, 佢今次都揀o左好多初出道的正歌好似“狼來了”,“手信”,“因為所以”, “愛人”,“少女的祈禱”, 同埋轉o左新藝寶之後o既“姊妹”, “飛女正傳”,“可惜我是水瓶座”, 仲有後期o既“處處吻”, “烈女”我都幾鍾意o架! 連較冷門o既“出埃及記”都有唱到, 其實都已經好好o架喇喇! 同埋, 真係幾乎首首都識唱晒…原來佢d歌真係陪伴我“成長”…都禁不住要講一句:“我諗, 我係fan屎!”

其實, 佢初出道時真係唱得唔差, 尤其以新人o黎講…係唔知點解, 後期佢愈唱愈倒退, 連我都不得不承認, 近年佢d live performance有d嚇親我! 今次, 佢又有d回復番當年o既感覺…我都戥佢高興! 連個場o既設計同埋d props, 都有番華星年代的感覺! 偶然睇到呢個blog, 又係講今次千嬅演唱會, 亦都係英雄所見略同, 好認同佢講o既o野…仲有埋rundown分埋唱片公司添…好有心! 我都係最鍾意02年前的楊千嬅…華星同佢揀o個條路, 真係好o岩佢!

連報紙都話: “楊 千 嬅 3 年 前 舉 行 紅 館 演 唱 會 時 演 出 失 準 , 頻 頻 走 音 , 前 晚 她 再 踏 紅 館 台 板 , 唱 功 明 顯 進 步 , 難 得 地 全 無 走 音 , 也 沒 有 以 笑 或 哭 掩 飾 失 準”…我唔覺得係全無走音, 不過係少o左好多, 係可以接受的level! 同埋其實我一路都覺得佢講o野係ok叻o架喎, 試下細心咀嚼o下, 佢平時o既答題技巧真係唔差, 唔會得罪人之餘有時仲幾抵死…但係佢o既喪笑真係應該收斂o下!

今次演唱會大家焦點落o係佢同古天樂激吻o個part, 其實都係搞o下gimmick o者! 但係居然有好多朋友唔知道佢o地一路以o黎o既友好關係…其實十年前佢o地o係華星都識o架啦, 仲有97年o既“美味天王”呢, 同埋千fa初出道時佢d tvb版mv都已經成日有古生, 好似“e-714342”咁! 我睇o個晚仲加埋eason, 同埋又係晚晚都有o既梁漢文, 真係好似華星re-u咁! 我記得十年前有個華星25周年(?!)音樂會, 正正係呢幾個人再加埋hocc, 旺嫂歐倩怡同埋何超儀, 好似仲有劉浩龍, 依家都佔o左一半喇!

不過佢同eason+徐浩縈又真係勁o既, 當年俾人搶男友仲可以咁大方, 依家又話同阿徐都ok friend…真係好大方囉佢o地!



呢段都幾好睇: 1995年第十四屆新秀-楊千嬅, 陳奕迅清唱+宣佈冠軍時刻…我o個年餅新秀錄影帶又係已經花晒, 依家有得睇番, 勁! Eason真係唱得好好, 千fa又真係勁似鄭秀文, 我仲趣緻到睇完呢個比賽寫信去香港電視o個d信箱問究竟楊千嬅同鄭秀文係咪有咩關係, 點解會似樣似成咁…仲叫佢o地介紹o下楊千嬅o既資料…哈哈! 真係好無聊…不過“小朋友”係咁o架啦! 其實千嬅係o個時仲唱得好過依家添!

跟住就係一年後96新秀佢o地做表演嘉賓, 居然係唱“我本善良”主題曲“笑看風雲變”囉…呵呵呵! 跟住就係一年後96新秀佢o地做表演嘉賓, 居然係唱“我本善良”主題曲“笑看風雲變”囉…呵呵呵! 但係請問楊千嬅個髮型想點? 邊個咁玩佢…定係o個時未有碟出無人理佢個形象?



其實我諗成個演唱會最令人感動o既, 係佢d經典舊歌帶俾人o既回憶…我中學後期至大學, 都係聽佢d歌…一聽番, 又諗番起當年的日子! 其實歌曲最能感動人o既, 就係佢所能勾起o既回憶! 所以d八十年代歌星o既“懷舊”演唱會, 永遠長做長有…因為回憶永遠都係最美好的! 尤其係童年/少年回憶! 搞到人忍唔住要搵番佢d舊歌mv睇o下…因為佢除o左d歌揀得好, d mv都拍得好靚!

佢d歌大部份都係tvb版反而拍得好過卡拉ok版, 唔知點解tvb次次都好俾心機拍佢d mv喎, d男主角又係個個都叫得出名不特止仲幾紅添…早期已經有當紅小生做男主角, 古天樂, 王喜, 郭耀明, 黃德斌, 謝天華etc…tvb真係待佢不薄!

芒姐’s choice:

直覺 (TVB Version )


…男主角係王喜! 其實佢96年出“狼來了”o個隻碟個勢都ok, 到97年夏天第二隻碟個勢更加唔錯! “直覺”係咪眼鏡舖廣告歌?! 我記得o個時天王阿王都話覺得唱“直覺”o個個新人幾好, 楊千嬅仲話聽到佢咁講好開心…證明呢隻歌又真係幾紅!



再見二丁目 ( TVB Version )

…咁當然, 真正令佢廣為人熟悉係呢隻“再見二丁目”!!! 上晒金榜冠軍, 97年夏天呢首歌係勁hit囉 (同期仲有“難兄難弟”主題曲同古巨基o既“歡樂今宵”都好hit!) …呢個mv主角係阿南郭耀明! 亦都係因為呢隻歌令我留意多o左佢, 幾鍾意佢呢個健康爽朗少女的image! 呢隻“二打六”真係齋聽個前奏已經覺得好正, 依家聽番依然正!



手信 ( TVB Version )

…跟住就到97年尾的第三者碟, 呢隻碟 (好似係私日記?) 同下隻碟 (“因為所以”, “我不要你愛我”同“出埃及記”做主打) 都做得好好, 除o左揀歌, 連個packaging都好好, 好精美, 好少會對d唱片咁愛不惜手, 連佢D純影集都買埋…佢真係要好多謝華星班工作夥伴, 幫佢搞成個package搞得咁好, 無類係形象, 揀歌, 出碟, 拍劇, 成條路都fit晒佢, 所以佢一開始可以上得咁快! 所以做藝人除o左要有實力, 真係要好配合天時地利人和…!



E-714342 ( TVB Version )

…呢隻唔洗講啦…古生做男主角! 其實呢期係我好鍾意千fa o個期, 會錄晒所有有佢o既節目…佢呢期個image, 呢個look, 呢個style我都好buy! 睇番原來o個時真係好young喎!



因為所以 ( TVB Version )

…到98年3/4月, 亦都係我考a-level的日子…佢d歌又真係陪伴我渡過整個a-level! 成日都有人問我讀書有咩心得, 其實又真係無…唔講又好似我耍佢咁, 畢竟人人方法唔同, 用o係我身上work你又未必work…如果真係要我諗, 我諗係聽住歌/睇住電視 (我承認到高中睇住電視真係溫唔到, 會分心, 但就可以逼自己快d溫晒書安心睇電視, 係一個好有效o既推動力!), 逼自己o係隻cd播完前要溫好幾多個chapter咁囉…幾有效o架喎!

考a-level o個時, 咁o岩就係plug呢隻歌, 同埋佢同古巨基o係港台有個廣播劇叫“不敢說我愛你”, 我每日都追住聽, o個兩隻主題曲一隻就係“不敢說我愛你”, 另一隻就係“因為所以”! 我記得佢出碟o個日我仲特登仆落街買新碟, 真係好少可會咁做! 又或者考緊試個人太癲啦! 仲有o個期佢有個function o係太古城kps舉行, 我都有特登o係溫書溫到悶悶地時, 走落去一睹佢o既風采o架…但當然無去搵佢簽名啦, 我一向都唔走呢個路線!

呢隻歌都係我好鍾意o既其中一首…今次男主角係謝天華!



愛人 ( TVB Version )

…98年冬天就plug “愛人”, 呢首又係好好聽! o個期又係考試, 入大學後第一個semester exam, 搵考試時又係係咁聽係咁聽呢首歌…repeat又repeat! 今次mv男主角係黃德斌!



好, 回顧完畢…佢咁多歌之中, 我都係最鍾意華星年代o個d!